Kamakura ເມືອງແຫ່ງວັດທະນະທຳຍີ່ປຸ່ນດັ່ງເດີມທີ່ຄົງກີ່ນອາຍ ແລະ ຄວາມຮູ້ສຶກອັນເກົ່າແກ່ຢ່າງແທ້ຈິງ

0
191

Kamakura ເມືອງທີ່ຕິດກັບທະເລ ແລະ ຫ່າງອອກມາຈາກໂຕກຽວພຽງແຕ່ 60 ກິໂລແມັດ ຫຼື ໃຊ້ເວລາປະມານ 1 ຊົ່ວໂມງເທົ່ານັ້ນໃນການເດີນທາງໄປເຖີງ.

ຫຼາຍທ່ານອາດຈະເຄີຍໄປສະຖານທີ່ແຫ່ງນີ້ມາກ່ອນແລ້ວ ແຕ່ເຊື່ອບໍວ່າ ປະຫວັດຄວາມເປັນມາຂອງເມືອງນີ້ແມ່ນບໍ່ທຳມະດາເລີຍ

ໃນສະໄໝກ່ອນນັ້ນ KAMAKURA ເຄີຍເປັນເມືອງທີ່ມີບົດບາດສຳຄັນທາງການທະຫານ ເນື່ອງຈາກ ທ່ານ ມິນາໂມໂຕ ໂຢຣິໂຕໂມະ ໄດ້ເລືອກເມືອງນີ້ໃຫ້ເປັນຖານຫຼັກໝັ້ນຂອງຝ່າຍທະຫານ ໃນປີ 1192 ແຕ່ຫຼັງຈາກສະຕະວັດທີ 14 ເມືອງນີ້ກໍຄ່ອຍໆໝົດອຳນາດທາງການປົກຄອງລົງ ແລະ ໄດ້ກາຍເປັນເມືອງທ່ອງທ່ຽວ ແລະ ຂື້ນຊື່ວ່າເປັນເມືອງກຽວໂຕ ຕາເວັນອອກ (Kyoto of Eastern Japan) ເນື່ອງຈາກມີສານເຈົ້າ, ວັດວາອາຣາມ ແລະ ສະຖານທີ່ອັນສຳຄັນທາງປະຫວັດສາດຫຼາຍແຫ່ງ ນອກຈາກນີ້ຍັງມີຊາຍຫາດທີ່ສວຍງາມ ແລະ ໄດ້ຮັບຄວາມນິຍົມຢ່າງຫຼວງຫຼາຍ ໃນຊ່ວງພັກຮ້ອນອີກດ້ວຍ.

ແລະ ສີ່ງທີ່ຫ້າມພາດທີ່ຈະໄປຢ້ຽມຊົມກໍຄື ພະໃຫຍ່ Daibutsu ຫຼືທີ່ໄດ້ຮັບການຂະໜານນາມວ່າ Great Buddha of Kamakura ພະພຸດທະຮູບມີລັກສະນະເປັນສີຂຽວ ເນື່ອງຈາກຖືກສ້າງຂື້ນດ້ວຍ ໂລຫະຜະສົມທອງແດງ ແລະ ເມື່ອຖືກກະທົບກັບສະພາບອາກາດເຊັ່ນຝົນຕົກ ແລະ ຫິມະ ພະພຸດທະຮູບຈະເກີດປະຕິກິລິຍາ ກາຍເປັນສີຂຽວ.

ເມື່ອກ່ອນ ພະໃຫຍ່ Daibutsu ແມ່ນປະດິດສະຖານຢູ່ພາຍໃນວັດ ແລະ ໃນລະຫວ່າງສະຕະວັດທີ 14-15 ອາຄານຂອງວັດແມ່ນໄດ້ຮັບຜົນກະທົບຈາກພາຍຸອາຄານວັດເກີດມີການຜຸພັງລົງ ເຫຼີອໄວ້ພຽງແຕ່ພະໃຫຍ່ Daibutsu ນີ້ເປັນສີ່ງທີ່ຫາເບີ່ງໄດ້ຍາກຫຼາຍທີ່ຈະເຫັນພະພຸດທະຮູບຕັ້ງໂດດເດັ່ນຢ່າງສະຫງ່າງາມ ປະດິດສະຖານຢູ່ທີ່ວັດໂຄໂຕຄຸອີນ KOTOKUIN ນັບວ່າເປັນສັນຍາລັກທີ່ສຳຄັນຫຼາຍ ຂອງເມືອງ KAMAKURA ໂດຍຖືເປັນພະພຸດທະຮູບທີ່ສູງເປັນອັນດັບ 2 ຂອງຍີ່ປຸ່ນ ດ້ວຍຄວາມສູງ 11.312 ແມັດ ແລະ ມີນໍ້າໜັກປະມານ 122.000 ກິໂລກຣາມ ຮອງຈາກພະໃຫຍ່ທີ່ວັດ ໂທໄດຈິ ທີ່ເມືອງ ນາຣາ.

ພາຍໃນວັດຍັງມີດອກໄມ້ຊະນິດໜື່ງທີ່ເບັ່ງບານສີສັນສວຍງາມໃນຊ່ວງລະດູຝົນ ຈະພົບເຫັນຫຼາຍໃນເມືອງນີ້ບໍ່ວ່າຈະເປັນພາຍໃນວັດ, ບ້ານເຮືອນ, ແຄມຖະໜົນຫົນທາງ ແລະ ສານເຈົ້າທີ່ສຳຄັນຕ່າງໆ ດອກໄມ້ຊະນິດນີ້ແມ່ນສ້າງຄວາມສົດໃສໃຫ້ກັບຊ່ວງລະດູຝົນໄດ້ເປັນຢ່າງດີ ຄືດອກ Hydrangea ຫຼື ອະຈິໄຊ (あじさい).

ດ້ວຍຄວາມທີ່ເຄີຍເປັນອະດີດເມືອງຫຼວງ ບັນຍາກາດຂອງເມືອງ ຄາມາກຸຣະ ຈື່ງຄົງກີ່ນອາຍ ແລະ ຄວາມຮູ້ສຶກອັນເກົ່າແກ່ ອີກທັງຍັງເຕັມໄປດ້ວຍວັດທະນະທຳຍີ່ປຸ່ນແບບດັ່ງເດີມ ພ້ອມດ້ວຍສານເຈົ້າ ແລະ ວັດຢ່າງຫຼວງຫຼາຍອ້ອມເມືອງ, ນອກຈາກນີ້ ຊ່ວງທີ່ສວຍງາມທີ່ສຸດທີ່ຄວນຈະໄປທ່ຽວຊົມແມ່ນແນະນຳໃນຊ່ວງລະດູໃບໄມ້ຫຼົ່ນ ເພາະຈະໄດ້ເຫັນເຖີງຄວາມງາມຂອງພະໃຫຍ່Daibutsu ແລະ ດອກຊາກຸຣະ ທີ່ເບັ່ງບານສວຍງາມອີກດ້ວຍ.

ນອກຈາກພະໃຫຍ່ Daibutsu ແລ້ວ, ເມືອງ Kamakura ຍັງມີສະຖານທີ່ທ່ອງທ່ຽວທີ່ໜ້າສົນໃຈ ແລະ ອາຫານທີ່ສົດໃໝ່ຈາກທະເລ ຣົດຊາດຊັ້ນດີ ພ້ອມໃຫ້ທຸກຄົນໄປຄົ້ນຫາ, ຢ້ຽມຊົມ ແລະ ສຳພັດໄດ້ແລ້ວ.

ສຳລັບຂໍ້ມູນເພີ່ມຕື່ມຂອງສະຖານທີ່ທ່ອງທ່ຽວຂອງເມືອງ Kamakura ສາມາດຄົ້ນຫາໄດ້ທີ່: https://www.city.kamakura.kanagawa.jp/visitkamakura/en/places-to-go/shrines/index.html

 

ສະໜັບສະໜູນໂດຍ: ກະຊວງການຕ່າງປະເທດຍີ່ປຸ່ນ ແລະ ສະຖານທູດຍີ່ປຸ່ນແຫ່ງ ສປປ ລາວ.

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.