ສຳນັກຂ່າວຕ່າງປະເທດລາຍງານໃນວັນທີ 11 ເມສາ 2024 ສານໃນເມືອງໂຮຈິມິນ ປະເທດຫວຽດນາມ ຕັດສິນໂທດປະຫານຊີວິດ ນາງ ເຈືອງ ມາຍ ລັ່ນ ອະດີດເຈົ້າແມ່ອະສັງຫາລິມາຊັບເຈົ້າຂອງບໍລິສັດ Van Thinh Phat Group ໃນຄະດີກ່ຽວກັບການສໍ້ໂກງຄັ້ງໃຫຍ່ທີ່ສຸດໃນຫວຽດນາມ ທີ່ມີຄວາມເສຍຫາຍມູນຄ່າກວ່າ 12,500 ລ້ານໂດລາ.
ນາງ ເຈືອງ ມາຍ ລັ່ນ ອາຍຸ 67 ປີຖືກຈັບຕັ້ງແຕ່ປີ 2022 ແລະ ຖືກຕັ້ງຂໍ້ຫາຫຼາຍຂໍ້ຫາ ໃນການຕິດສິນບົນເຈົ້າໜ້າທີ່ ການຝ່າຝືນກົດລະບຽບການກູ້ຢືມຂອງທະນາຄານ ແຕ່ຂໍ້ຫາທີ່ໜັກທີ່ສຸດກໍຄື ການສໍ້ໂກງຊັບຈາກທະນາຄານ ໄຊງ່ອນ ຄອມເມີຊຽວ ແບ້ງ (SCB) ລະຫວ່າງປີ 2018-2022.
ນອກຈາກໂທດປະຫານຊີວິດໃນຄະດີສໍ້ໂກງແລ້ວ ສານຍັງຕັດສິນໂທດຈຳຄຸກ 20 ປີອີກ 2 ຂໍ້ຫາລວມເປັນ 40 ປີ ໃນການຕິດສິນບົນເຈົ້າໜ້າທີ່ ແລະ ຝ່າຝືນລະບຽບການກູ້ຢືມຂອງທະນາຄານ, ນອກຈາກນີ້ຍັງຖືກຕັດສິນໃຫ້ຕ້ອງຊົດໃຊ້ຄ່າເສຍຫາຍເປັນເງິນ 674 ລ້ານໆດ່ອງ ຫຼື ຫຼາຍກວ່າສອງເທົ່າຂອງມູນຄ່າ 12,500 ລ້ານໂດລາໃນຄະດີສໍ້ໂກງທະນາຄານ (SCB)
ແຫຼ່ງຂ່າວ: ກຸງເທບທຸລະກິດ