ຫຼຸດໂຄຕາພະນັກງານ-ລັດຖະກອນໃໝ່ເພື່ອຫຼຸດຜ່ອນພາລະແບກຫາບຂອງງົບປະມານລັດ

0
352

ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວລາຍງານຕໍ່ກອງປະຊຸມໂດຍໄດ້ເນັ້ນວ່າ: ລັດຖະບານຈະຫລຸດໂຄຕາພະນັກງານລັດຖະກອນໃໝ່ລົງຕື່ມ ຈາກຈຳນວນ 3.000 ໃນປີ 2018 ມາເປັນ 1.500 ສຳລັບປີ 2019.

ໃນປະເດັນກ່ຽວກັບການປັບຫຼຸດຈຳນວນໂຄຕາລັດຖະກອນນັ້ນທ່ານໄດ້ກ່າວວ່າ ໃນປີ 2019ນີ້, ລັດຖະບານຖືວ່າເປັນປີປ່ຽນແປງທີ່ສຳຄັນ ໃນການສ້າງແຜນລາຍຮັບ-ລາຍຈ່າຍ ໂດຍອີງໃສ່ຄວາມສາມາດທາງດ້ານງົບປະມານຕົວຈິງ ເພື່ອສ້າງແຜນລາຍຮັບງົບປະມານ ແນ່ໃສ່ຫຼຸດຜ່ອນການຂາດດຸນງົບປະມານ ທີ່ຊໍ້າເຮື້ອມາດົນ ແຜນການປີ 2019 ຕ້ອງເປັນແຜນທີ່ມີລັກສະນະຫັນປ່ຽນຢ່າງເລິກເຊິ່ງແທ້ຈິງ ໃນເງື່ອນໄຂທີ່ພວກເຮົາມີຄວາມຫຍຸ້ງຍາກດ້ານງົບປະມານ ຄືປັດຈຸບັນລັດຖະບານຈະສຸມໃສ່ການແກ້ໄຂໄພພິບັດ ແລະ ຈັດສັນງົບປະມານໃຫ້ແກ່ວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ການລົງທຶນທີ່ຈຳເປັນເທົ່ານັ້ນ.

ສະນັ້ນ,​ ເພື່ອເຮັດໃຫ້ລະບົບອົງການຈັດຕັ້ງລັດມີປະສິດທິພາບ ແລະ ກະທັດຮັດນັ້ນ ລັດຖະບານຈຳເປັນຕ້ອງຫຼຸດໂຄຕາພະນັກງານ-ລັດຖະກອນໃໝ່ ລົງໃນແຕ່ລະປີ ເພື່ອຫຼຸດຜ່ອນພາລະແບກຫາບຂອງງົບປະມານລັດ ແຕ່ຈະເໜັ້ນໜັກໃສ່ການຍົກລະດັບຄວາມຮູ້ດ້ານວິຊາການ ແລະ ຫົວຄິດປະດິດສ້າງຂອງພະນັກງານ-ລັດຖະກອນ ເພື່ອສ້າງຂີດຄວາມສາມາດໃນການປະຕິບັດໜ້າທີ່ວຽກງານໃຫ້ມີປະສິດທິພາບ ແລະ ປະສິດທິພາບດີຂຶ້ນກວ່າເກົ່າ ຫັນເອົາພະນັກງານສູນກາງລົງຊ່ວຍທ້ອງຖິ່ນ ຕາມທິດທາງຂອງສູນກາງພັກວາງອອກໃຫ້ໄດ້ຮັບໝາກຜົນທີ່ດີ.

 

 

 

 

 

 

 

 

 

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ເສດຖະກິດ-ການຄ້າ

ອອກ​ຈາກ REPLY ເປັນ

Please enter your comment!
Please enter your name here