ໂຊໂລມອນ… ຍອມໃຫ້ຈີນເຊົ່າເໝົາເກາະຍຸດທະສາດ

0
497

ຈີນເຊົ່າເໝົາເກາະໜຶ່ງຂອງໝູ່ເກາະໂຊໂລມອນ ພາຍຫຼັງປະເທດກາງມະຫາສະໝຸດແປຊິຟິກແຫ່ງນີ້ຍຸຕິຄວາມສຳພັນກັບໄຕ້ຫວັນແລ້ວຫັນມາສະຖາປະນາຄວາມສຳພັນທາງການທູດກັບຈີນເມື່ອເດືອນຜ່ານມາ ໂດຍບໍລິສັດທີ່ເຊົ່າໄດ້ອ້າງການກຽມໂຄງສ້າງໂຮງກັ່ນນໍ້າມັນ ແຕ່ເກາະດັ່ງກ່າວອາດໄດ້ໃຊ້ປະໂຫຍດທາງການທະຫານ.

ລາຍງານຂອງສຳນັກຂ່າວເອເອຟພີລາຍງານເມື່ອວັນທີ 17 ຕຸລາຜ່ານມາວ່າ ເອກະສານເຮັດສັນຍາທີ່ຫຼຸດອອກມາໄດ້ເປີດເຜີຍໃຫ້ເຫັນວ່າ ແຂວງເຊັນທຣັລຂອງໝູ່ເກາະໂຊໂລມອນໄດ້ເຮັດຂໍ້ຕົກລົງຄວາມຮ່ວມມືທາງຍຸດທະສາດ ວ່າດ້ວຍເກາະຕູລາກີ ຊຶ່ງເປັນເກາະທີ່ມີທ່າເຮືອນໍ້າເລິກກັບບໍລິສັດໄຊນ່າແຊມ ກຣຸບ ເມື່ອວັນທີ 22 ກັນຍາຜ່ານມາ ການເຮັດສັນຍາເກີດຂຶ້ນ 1 ວັນຫຼັງຈາກໝູ່ເກາະໂຊໂລມອນ ແລະ ຈີນ ສານສາຍພົວພັນທາງການທູດຢ່າງເປັນທາງການພາຍຫຼັງຈີນສາມາດຊັກຈູງໃຫ້ໂຊໂລມອນຕັດຄວາມສຳພັນກັບໄຕ້ຫວັນ.

ເກາະຕູລາກີ ມີພື້ນທີ່ປະມານ 2 ກີໂລຕາແມັດ ມີປະຊາກອນປະມານ 1.200 ຄົນ ເກາະດັ່ງກ່າວເຄີຍເປັນທີ່ຕັ້ງຂອງຖານທັບເຮືອຍີ່ປຸ່ນ ແລະ ຍັງເປັນສະໝໍລະພູມສູ້ຮົບທີ່ດຸເດືອດໃນສະໄໝສົງຄາມໂລກຄັ້ງທີ 2 ທັງນີ້ ໃນສັນຍາສະບັບດັ່ງກ່າວບໍລິສັດໄຊນ່າແຊມໄດ້ກ່າວເຖິງການພັດທະນາໂຮງກັ່ນນໍ້າມັນເທິງເກາະ ແຕ່ທ່າແຮງທີ່ບົ່ມຊ້ອນຢູ່ເທິງເກາະນີ້ຈະຖືກໃຊ້ ປະໂຫຍດທາງການທະຫານສຳ ລັບຖານທັບຂອງຈີນ ຊຶ່ງຖືເປັນການສ້າງຄວາມວິຕົກກັງວົນໃຫ້ອາເມຣິກາ ແລະ ອົສຕຣາລີ.

ຂໍ້ຕົກລົງດັ່ງກ່າວໂດຍແຂວງເຊັນທຣັລເຕັມໃຈໃຫ້ໄຊນ່າແຊມເຊົ່າເກາະຕູລາກີທັງໝົດເກາະ ລວມເຖິງເກາະເລັກໆນ້ອຍໆອ້ອມຮອບເພື່ອພັດທະນາເຂດເສດຖະກິດພິເສດ ຊຶ່ງສັນຍານີ້ຄອບຄຸມອຸດສາຫະກຳຕ່າງໆທີ່ເໝາະສົມຕໍ່ການພັດທະນາ ຊຶ່ງລວມເຖິງການພັດ ທະນາດ້ານນໍ້າມັນ ແລະ ແກ໊ສ ຂະນະທີ່ບໍລິສັດໄຊນ່າແຊມໄດ້ກ່າວໃນຖະແຫຼງການວ່າ ບໍລິສັດພ້ອມຮ່ວມມືກັບໂຊໂລມອນໃນຫຼາຍດ້້ານ ຊຶ່ງລວມເຖິງການຄ້າ ໂຄງສ້າງພື້ນຖານ ການປະມົງ ແລະ ການທ່ອງທ່ຽວ.

 

 

 

 

 

ຮຽບຮຽງ: ເພັງສະຫວັນ

ຮູບພາບ: thaipost

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.