ແກ້ງຄ້າຢາດັກໂຈມຕີເຈົ້າໜ້າທີ່ຕຳຫຼວດເສຍຊີວິດ 14 ລາຍ

0
5636

ສຳນັກຂ່າວ AFP ແລະ ຣອຍເຕີໄດ້ລາຍງານເມື່ອວັນທີ 15 ຕຸລາຜ່ານມາວ່າ ກຸ່ມມືປືນຊຶ່ງເຊື່ອວ່າເປັນສະມາຊິກໃນແກ້ງຄ້າຢາໄດ້ຊຸ້ມໂຈມຕີຂະບວນລົດຂອງເຈົ້າໜ້າທີ່ຕຳຫຼວດເມັກຊີໂກທີ່ລັດມິໂຊອາກັງ ເຫດການດັ່ງກ່າວສົ່ງຜົນໃຫ້ເຈົ້າໜ້າທີ່ເສຍຊີວິດທັງໝົດ 14 ລາຍ ທັງ ນີ້ ຖືເປັນການໂຈມຕີເຈົ້າໜ້າທີ່ຄັ້ງຮຸນແຮງທີ່ສຸດນັບແຕ່ປະທານາທິບໍດີ ອັນເດຣສ ມານູເອລ ໂລເປຊ ໂອບຣາດໍຣ ຮັບຕຳແໜ່ງເມື່ອທ້າຍປີຜ່ານມາ.

ລາຍງານຂ່າວດຽວກັນໃຫ້ຮູ້ອີກວ່າ ຂະບວນລົດຫຼາຍຄັນຂອງເຈົ້າໜ້າທີ່ຕຳຫຼວດຢູ່ລະຫວ່າງໄປປະຕິບັດໜ້າທີ່ໃນເຂດອາກີລີຢາໃນລັດມິໂຊອາກັງພາກຕາເວັນຕົກຂອງເມັກຊີໂກ ຊຶ່ງເຂດດ່ັງກ່າວມັກເກີດເສິກລະຫວ່າງແກ້ງຄ້າຢາ ແກ້ງອາຊະຍາກຳ ແລະ ກຸ່ມຕິດອາວຸດປ້ອງກັນຕົນເອງຫຼາຍກຸ່ມໃນຊ່ວງຫຼາຍປີຜ່ານມາ ໂດຍສະເພາະແກ້ງຮາລິສໂກເຈເນີເຣເຊິນໃໝ່ (CJNG) ກັບແກ້ງຄູ່ກໍລະ ນີ.

ໂດຍຄຳຖະແຫຼງຂອງກະຊວງຄວາມໝັ້ນຄົງທີ່ເຜີຍແຜ່ທາງທະວິດເຕີລະບຸວ່າ ລັດຖະບານເມັກຊີໂກປະນາມການໂຈມຕີໃນເມືອງອາ ກີລີຢາທີ່ມີຕຳຫຼວດລັດມິໂຊອາກັງຖືກຂ້າເສຍຊີວິດ 14 ລາຍ ລັດຖະບານກາງໄດ້ຕິດຕໍ່ລັດຖະບານຂອງລັດມິໂຊອາກັງ ແລະ ຈະທຸ່ມເທກຳລັງທັງໝົດເພື່ອຫາຕົວຄົນກໍ່ເຫດ ແລະ ຈັບມາດຳເນີນຄະດີ.

ຂະນະທີ່ລາຍງານຈາກສື່ທ້ອງຖິ່ນໄດ້ລະບຸວ່າ ມືປືນກຸ່ມນີ້ຊຶ່ງໃຊ້ລົດໂຟວິລຫຸ້ມເກາະຫຼາຍຄັນເປັນພາຫະນະຍິງຖະຫຼົ່ມລົດກະບະ 3 ຄັນຂອງເຈົ້າໜ້າທີ່ຕຳຫຼວດ ທັງນີ້ ຍັງມີພາບຖ່າຍສະຖານທີ່ເກີດເຫດທີ່ເຜີຍແຜ່ທາງໂຊຊຽວຊຶ່ງເຜີຍໃຫ້ເຫັນຊາກລົດຕຳຫຼວດທີ່ຖືກເຜົາໄໝ້ໝົດຄັນ ລວມເຖິງຂໍ້ຄວາມຈາກ CJNG ປະຖິ້ມໄວ້ໃນຊາກລົດໂດຍໄດ້ເຕືອນວ່າ ຫ້າມສະໜັບສະໜູນກຸ່ມອາຊະຍາກຳຄູ່ກໍລະນີຂອງເຂົາເຈົ້າ ຊຶ່ງລວມທັງແກ້ງລອສວີອາກຣັສ.

ສ່ວນແກ້ງ CJNG ຊຶ່ງມີທີ່ໝັ້ນໃນລັດມິໂຊອາກັງເຄີຍຖືກລະບຸວ່າຢູ່ເບື້ອງຫຼັງການໂຈມຕີເຈົ້າໜ້າທີ່ຕຳຫຼວດໃນລັດຮາລິສໂກຫຼາຍຄັ້ງເມື່ອປີ 2014 ຊຶ່ງແກ້ງຄ້າຢາຕິດອາວຸດແກ້ງນີ້ໃຊ້ການຂົ່ມຂູ່ ແລະ ຍັດເງິນໃຕ້ໂຕະເພື່ອຄວບຄຸມເຈົ້າໜ້າທີ່ຕຳຫຼວດໃນລະດັບທ້ອງຖິ່ນ ແລະ ເມື່ອປີ 2014 ກໍເຄີຍເກີດເຫດດັກໂຈມຕີຕຳຫຼວດໃນລັດຮາລິສໂກຫຼາຍຄັ້ງໃນຊ່ວງ 6 ອາທິດມີຕຳຫຼວດຖືກຂ້າຫຼາຍກວ່າ 24 ລາຍ ໃນນັ້ນ ລວມເຫດການເຮລິຄອບແຕຂອງເຈົ້າໜ້າທີ່ຖືກຍິງຕົກ 1 ລຳ.

ຂະນະທີ່ປະທານາທິບໍດີ ໂລເປຊ ໂອບຣາດໍຣ ຊຶ່ງຮັບຕຳແໜ່ງເມື່ອເດືອນທັນວາ 2018 ໄດ້ໃຫ້ຄຳໝັ້ນວ່າຈະຟື້ນຟູຄວາມສະຫງົບຮຽບຮ້ອຍແຕ່ກໍຍັງຄົງບໍ່ສາມາດຄວບຄຸມອາຊະຍາກຳຮຸນແຮງໃນປະເທດນີ້ໄດ້ ແລະ ມີທ່າອຽງວ່າໃນປີ 2019 ຈະມີການຄາຕະກຳເພີ່ມຂຶ້ນຫຼາຍກວ່າປີຜ່ານມາ ໂດຍຂໍ້ມູນມາຮອດເດືອນສິງຫາມີການຄາຕະກຳແລ້ວ 23.063 ລາຍ ສ່ວນໃນປີ 2018 ມີການຄາຕະກຳເຖິງ 33.749 ລາຍ.

 

 

 

ຮຽບຮຽງ: ເພັງສະຫວັນ

ຮູບພາບ: thaipost

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.