ເສັ້ນທາງການຕໍ່ສູ້ປົດປ່ອຍປະເທດຊາດຂອງປະທານສຸພານຸວົງ ຫຼື ເຈົ້າຊາຍແດງທີ່ໂລກຮູ້ຈັກ

    0
    93

    ປະທານ ສຸພານຸວົງ ເກີດເມື່ອວັນທີ 13 ເດືອນກໍລະກົດ ປີ 1909 ທີ່ແຂວງຫຼວງພຣະບາງ, ເປັນເຊື້ອເຈົ້າລ້ານຊ້າງຫຼວງພຣະບາງ, ເປັນປະທານປະເທດແຫ່ງ ສປປ ລາວ ຜູ້ທຳອິດຫຼັງຈາກປ່ຽນແປງການປົກຄອງຈາກຣາຊາອານາຈັກລາວເປັນສາທາລະນະລັດ ປະ ຊາທິປະໄຕ ປະຊາຊົນລາວ ເມື່ອ ຄ.ສ 1975 ທົ່ວໂລກຮູ້ຈັກໃນນາມ “ເຈົ້າຊາຍແດງ” ຫຼື The Red Prince.

    ປະທານ ສຸພານຸວົງ ກັບເສັ້ນທາງຕໍ່ສູ້ປະຕິວັດເພື່ອປົດປ່ອຍຊາດບໍ່ແມ່ນເສັ້ນທາງທຳມະດາ, ເພາະວ່າເພີ່ນມີຕົ້ນກຳເນີດມາຈາກຄອບຄົວໃນຣາຊະວົງບວກກັບຄວາມຮູ້ຄວາມສາມາດ ແລະ ຄວາມສະຫຼາດຫຼັກແຫຼມ ຊຶ່ງເພີ່ນໄດ້ສຳເລັດການສຶກສາຢູ່ໃນລະດັບສູງທັງຈາກພາຍໃນ ແລະ ຈາກຕ່າງປະເທດ. ເພີ່ນມີເງື່ອນໄຂຄົບຖ້ວນທີ່ຈະໃຊ້ຊີວິດແບບອຸດົມສົມບູນໃນການສ້າງຖານະທີ່ດີງາມໃຫ້ແກ່ຕົນເອງ, ແຕ່ເພີ່ນຊໍ້າຜັດເລືອກວິຖີຊີວິດຂອງນັກກອມມູນິດ-ຂອງນັກຕໍ່ສູ້ປົດປ່ອຍຊາດ. ເພີ່ນບໍ່ພຽງແຕ່ເສຍສະຫຼະຕັດຂາດຈາກຊົນຊັ້ນຂອງຕົນເອງເທົ່ານັ້ນ ແຕ່ເພີ່ນຍັງກາຍເປັນຜູ້ທີ່ເດັດດ່ຽວໜຽວແໜ້ນຕໍ່ສູ້ກັບຊົນຊັ້ນນັ້ນເອງອີກດ້ວຍ.

    ການຕັດສິນໃຈດັ່ງກ່າວແມ່ນບາດລ້ຽວທີ່ຍິ່ງໃຫຍ່ ແລະ ສູງສົ່ງໃນຊີວິດການເມືອງຂອງເພີ່ນ, ຊຶ່ງໄດ້ສ່ອງແສງເຖິງຄຸນທາດປະຕິວັດຂອງນັກຮັກຊາດທີ່ດູດດື່ມ. ໃນທຸກການເຄື່ອນໄຫວປະຕິວັດອັນລະອິດລະອ້ຽວ ທັງເຕັມໄປດ້ວຍການທົດສອບນາໆປະການໃນແປວ ໄຟແຫ່ງການຕໍ່ສູ້ປະຕິວັດປົດປ່ອຍຊາດ, ເສັ້ນທາງການປະຕິວັດຂອງນັກຕໍ່ສູ້ປົດປ່ອຍຊາດຂອງປະທານ ສຸພານຸວົງ ທີ່ໄດ້ສະແດງອອກໃຫ້ເຫັນເປັນພຶດຕິກຳຕົວຈິງ ນັ້ນແມ່ນໄດ້ຮັບການຝຶກຝົນຫຼໍ່ຫຼອມການເສຍສະຫຼະໃນສະໜາມຮົບຕໍ່ສູ້ປ້ອງກັນຕົວເມືອງທ່າແຂກ, ໃນເວລານັ້ນເພີ່ນໄດ້ກ່າວວ່າ: “ເຖິງຕາຍກໍບໍ່ກິນແໜງ ເພາະຕາຍເພື່ອປະເທດຊາດ, ຈະຕ້ອງສູ້ໄປເຖິງທີ່ສຸດ” ເຖິງວ່າການຕໍ່ສູ້ເພື່ອປ້ອງກັນຮັກສາຕົວເມືອງທ່າແຂກບໍ່ສຳເລັດຜົນກໍຕາມ, ແຕ່ວິລະກຳອັນຍິ່ງໃຫຍ່ ແລະ ແບບຢ່າງການເສຍສະຫຼະອັນໂດດເດັ່ນຂອງປະທານສຸພານຸວົງໃນວັນທີ 21 ມີນາ 1946 ປະຫວັດສາດຄັ້ງນັ້ນຍັງຄົງຝັງເລິກຢູ່ໃນຄວາມຊົງຈຳຂອງປະຊາຊົນເມືອງທ່າແຂກ ແລະ ປະຊາຊົນລາວໃນທົ່ວປະເທດມາຈົນເຖິງທຸກວັນນີ້.

    ໃນວັນທີ 29 ຕຸລາ 1949 ຊຶ່ງແມ່ນໄລຍະທີ່ປະທານສຸພານຸວົງໄປລີ້ໄພຢູ່ປະເທດໄທ ແລະ ເພີ່ນໄດ້ປະກາດຕໍ່ສື່ມວນຊົນວ່າ: “ພວກຂ້າພະເຈົ້າຂໍຢ້ຳຄືນອີກເທື່ອໜຶ່ງເຖິງຄວາມເຊື່ອໝັ້ນໃນໄຊຊະນະ ແລະ ພວກຂ້າພະເຈົ້າຈະບໍ່ຢູ່ໂດດດ່ຽວບົນເສັ້ນທາງອັນເປັນທຳນີ້ແຕ່ປະການໃດ, ເພື່ອນມິດອິນໂດເນເຊຍ, ຫວຽດນາມ, ກຳປູເຈຍ ກໍພວມກ້າວເດີນບົນເສັ້ນທາງອັນດຽວກັນນີ້ ແລະ ພວກຂ້າ ພະເຈົ້າກໍໄດ້ຮັບການສະໜັບສະໜູນອູ້ມຊູຈາກປະຊາຊົນຜູ້ຮັກຫອມອິດສະຫຼະພາບທັງປວງໂດຍສະເພາະແມ່ນບັນດາປະເທດເພື່ອນບ້ານທີ່ຍິ່ງໃຫຍ່ ຊຶ່ງເປັນກຳລັງໃຈໃຫ້ແກ່ພວກຂ້າພະເຈົ້າສະເໝີ”, ຄຳປະກາດດັ່ງກ່າວຢືນຢັນໄດ້ເຖິງຄວາມເຊື່ອໝັ້ນໃນກຳລັງແຮງຂອງມະຫາຊົນ ແລະ ທັງເປັນການປຸກລະດົມກຳລັງໃຈໃຫ້ປະຊາຊົນລຸກຂຶ້ນຕໍ່ສູ້ປົດປ່ອຍປະເທດຊາດ.

    ນັບແຕ່ນັ້ນເປັນຕົ້ນມາ, ຂະບວນການຕໍ່ສູ້ປົດປ່ອຍຊາດຂອງປະຊາຊົນລາວໄດ້ມີການນໍາພາ ແລະ ມີການເຄື່ອນໄຫວເປັນເອກະ ພາບໃນທົ່ວປະເທດ. ປະທານສຸພານຸວົງໄດ້ກາຍເປັນຄັນທຸງເຕົ້າໂຮມປະຊາຊົນລາວບັນດາເຜົ່າ, ນັກສຶກສາ, ປັນຍາຊົນ ແລະ ຊັ້ນຄົນຕ່າງໆ ນັບທັງວົງເຊື້ອເຈົ້າເຂົ້າຢູ່ໃນແນວໂຮມແຫ່ງຊາດຕໍ່ສູ້ປົດປ່ອຍຊາດ ພາຍໃຕ້ການນຳພາຂອງພັກ. ຈາກນັ້ນ ຂະບວນການຕໍ່ສູ້ປະຕິວັດໄດ້ຂະຫຍາຍຕົວໄປໃນຫຼາຍຮູບແບບ, ດ້ວຍກຳລັງປະກອບອາວຸດ, ການເມືອງຖືກກົດໝາຍ ແລະ ເຄິ່ງຖືກກົດໝາຍ ໄດ້ແຜ່ລາມໄປໃນທົ່ວປະເທດ, ບຸກຕີສັດຕູຢ່າງຕໍ່ເນື່ອງ. ໃນເວລາທີ່ປະທານສຸພານຸວົງ ແລະ ບັນດາຜູ້ນຳຂອງແນວລາວຮັກຊາດ ຖືກຈັບກຸມຄຸມຂັງຢູ່ທີ່ຄຸກໂພນເຄັງ, ຕໍ່ສະພາບການດັ່ງກ່າວນັ້ນປະທານສຸພານຸວົງກໍມີຄວາມທຸ່ນທ່ຽງ ແລະ ມີຄວາມເຊື່ອໝັ້ນຕໍ່ການນຳພາຂອງພັກ, ເພີ່ນໄດ້ກ່າວໄວ້ວ່າ: “ຖ້າກໍລະນີມີການຍິງເປົ້າເຮົາເອງຈະເປັນຜູ້ອອກໜ້າກ່ອນໝູ່ ເພາະເຮົາໄດ້ຢູ່ໃນນາມຜູ້ເປັນຫົວໜ້າ”.

    ນໍ້າໃຈເດັດດ່ຽວຕໍ່ສູ້ປົດປ່ອຍຊາດ ແລະ ຄວາມເສຍສະຫຼະຕໍ່ການປະຕິວັດຂອງປະທານສຸພານຸວົງ ໄດ້ສ່ອງແສງເຖິງຄຸນທາດການປະ ຕິວັດຂອງນັກກອມມູນິດ ແລະ ນັກຕໍ່ສູ້ປະຕິວັດທີ່ກ້າແກ່ນ, ເປັນບົດຮຽນ ແລະ ເປັນແບບຢ່າງທີ່ດີເດັ່ນໃຫ້ພວກເຮົາ ແລະ ໃຫ້ແກ່ຄົນລຸ້ນຫຼັງສືບທອດໄດ້ຄົ້ນຄວ້າຮ່ຳຮຽນຕະຫຼອດໄປ. ປະທານສຸພານຸວົງສົມແລ້ວທີ່ປະຊາຊົນລາວບັນດາເຜົ່າ ແລະ ປະຊາຊົນຜູ້ຮັກຫອມສັນຕິພາບຍົກຍ້ອງ ແລະ ພ້ອມທັງໃຫ້ນາມມະຍົດວ່າເພີ່ນເປັນ: “ວິລະບູລຸດແຫ່ງຊາດ ແລະ ເປັນເຈົ້າຊາຍແດງຂອງຊາດລາວ”.

    ໃນວັນທີ 1 ແລະ 2 ທັນວາ 1975, ກອງປະຊຸມໃຫຍ່ຜູ້ແທນປະຊາຊົນທົ່ວປະເທດໄດ້ຜ່ານບັນດາມະຕິຕົກລົງທີ່ມີລັກສະນະປະ ຫວັດສາດ ແລະ ເປັນເອກະສັນກັນໃນການແຕ່ງຕັ້ງປະທານສຸພານຸວົງເປັນປະທານປະເທດຄົນທຳອິດຂອງສາທາລະນະລັດ ປະຊາ ທິປະໄຕ ປະຊາຊົນລາວ.

    ເຈົ້າສຸພານຸວົງເປັນປະທານທີ່ເຄົາລົບຮັກຂອງປວງຊົນລາວຈົນເອີ້ນກັນວ່າ “ລຸງສຸພານຸວົງ” ໄດ້ດຳລົງຕຳແໜ່ງປະທານປະເທດຈົນເຖິງ ຄ.ສ 1986 ຈຶ່ງລາອອກຍ້ອນເພິ່ນມີບັນຫາດ້ານສຸຂະພາບ. ທ່ານໄດ້ປາກົດຕົວຕໍ່ໜ້າສາທາລະນະຊົນຄັ້ງສຸດທ້າຍໃນສະໄໝປະຊຸມພັກຄັ້ງທີ 5 ເມ່ືອເດືອນມີນາ ຄ.ສ 1991 ເພ່ິ່ນໄດ້ເຖິງແກ່ມໍລະນະກຳເມື່ອວັນທີ 9 ມັງກອນ 1995 ທີ່ນະຄອນຫຼວງວຽງ ຈັນ.

     

    ຮຽບຮຽງໂດຍ:​ພຸດສະດີ

    ອອກ​ຈາກ REPLY ເປັນ

    Please enter your comment!
    Please enter your name here

    This site uses Akismet to reduce spam. Learn how your comment data is processed.