ເມືອງອຸທຸມພອນເສຍຊີວິດແລ້ວ 2 ລາຍຈາກໄຂ້ເລືອດອອກ

0
34

ປັດຈຸບັນ ບັນຫາພະຍາດໄຂ້ເລືອດອອກຢູ່ພາຍໃນເມືອງອຸທຸມພອນ ​ແຂວງສະຫວັນ​ນະ​ເຂດ ຍັງບໍ່ມີທ່າທີວ່າຈະຫຼຸດໜ້ອຍຖອຍລົງ ນັບມື້ມີທ່າອຽງເພີ່ມຂຶ້ນ ຍ້ອນວ່າປີນີ້ສະພາບຟ້າຝົນຕົກແກ່ຍາວຈິ່ງເຮັດໃຫ້ຍຸງລາຍມີບ່ອນວາງໄຂ່ຫຼາຍ ແຕ່ເຖິງຢ່າງໃດກໍຕາມ ທາງຫ້ອງການສາທາລະນະສຸກເມືອງກໍໄດ້ມີການສະກັດກັ້ນ ແລະ ໂຕ້ຕອບເພື່ອບໍ່ໃຫ້ມັນມີການແຜ່ລະບາດໄປຫຼາຍກວ່ານີ້ ໂດຍທົ່ວເມືອງພົບຜູ້ເປັນພະຍາດໄຂ້ເລືອດອອກແລ້ວ 379 ກໍລະນີໃນ 50 ບ້ານຂອງບ້ານທັງໝົດທົ່ວເມືອງ 70 ບ້ານ ແລະ ມີຜູ້ເສຍຊີ ວິດແລ້ວ 2 ຄົນ.

ທ່ານ ດຣ ບຸນໂຮງ ແສງອາລຸນ ຫົວໜ້າຫ້ອງການສາທາລະນະສຸກເມືອງອຸທຸມພອນໄດ້ໃຫ້ສຳພາດວ່າ ຫຼ້າສຸດ ທາງຫ້ອງການສາທາ ລະນະສຸກເມືອງແມ່ນໄດ້ໂຕ້ຕອບຢ່າງຮີບດ່ວນໂດຍຈັດສົ່ງທີມງານລົງໄປໂຄສະນາສຸຂະສຶກສາໃຫ້ຄວາມຮູ້ກ່ຽວກັບພະຍາດໄຂ້ເລືອດອອກ ພ້ອມທັງຜົ່ນຢາຂ້າຍູງຕາມບ້ານເປົ້າໝາຍທີ່ເກີດເປັນພະຍາດໄຂ້ເລືອດອອກຫຼາຍກວ່າໝູ່ເຊັ່ນ ບ້ານໄຊຍະເພັດ ຈະເລີນສຸກບ້ານແມດ ມະນີວົງໄຊ ໄຊສົມບູນ ເຊໂນ ອຸດົມມີໄຊ ແລະ ບ້ານວົງພັນສີ ຄຽງຄູ່ກັນນີ້ຍັງໄດ້ມີການປັບປຸງທີມງານໂຕ້ຕອບປິ່ນປົວໄຂ້ເລືອດອອກໂດຍສະເພາະ ຊຶ່ງໄດ້ເອົາແພດທີ່ມີປະສົບການ ແລະ ຜ່ານການຝຶກອົບຮົມມາຫຼາຍຄັ້ງເປັນຜູ້ຕິດຕາມໂດຍກົງຢ່າງໃກ້ ຊິດກັບຜູ້ປ່ວຍເປັນພະຍາດໄຂ້ເລືອດອອກ.

ທ່ານ ດຣ ບຸນໂຮງ  ຍັງກ່າວອີກວ່າ ສຳລັບສະຖານທີ່ຮອງຮັບຄົນເຈັບທີ່ເຂົ້າມາປິ່ນປົວຢູ່ໂຮງໝໍເມືອງອຸທຸມພອນແມ່ນຖືວ່າພຽງພໍໂດຍສະເພາະຄົນເຈັບທີ່ເປັນພະຍາດໄຂ້ເລືອດອອກແມ່ນມີສະຖານທີ່ປິ່ນປົວສະເພາະມີທັງໝົດ 8 ຕຽງນອນ ນອກຈາກ​ນັ້ນ​ຍັງຂໍຝາກໃຫ້ປະຊາຊົນແຕ່ລະບ້ານຈົ່ງຢ່າໄດ້ຖືເບົາຖ້າຫາກລູກ-ຫຼານຂອງຕົນເປັນໄຂ້ກໍໃຫ້ຮີບຮ້ອນເອົາໄປພົບແພດໝໍຢູ່ໂຮງໝໍ ຫຼື ສຸກສາລາໂດຍດ່ວນ ແລະ ບໍ່ໃຫ້ໄປຊື້ຢາມາຮັບປະທານເອງໂດຍຕົນ​ເອງເພະມັນເປັນອັນຕະລາຍເຖິງຊີວິດໄດ້ ສິ່ງສຳຄັນກໍແມ່ນບໍ່ໃຫ້ປິ່ນ ປົວຢູ່ບ້ານ ຕ້ອງໄປກວດເລືອດກ່ອນວ່າຕົນເອງເປັນໄຂ້ຫຍັງ ຖ້າພົບເປັນພະຍາດໄຂ້ເລືອດອອກກໍຮີບປິ່ນປົວທີ່ໂຮງໝໍຢ່າງ​ຮີບ​ດ່ວນ.

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.