ເປັນຫຍັງຄົນເຮົາຄືຕິດການພະນັນ?

0
189

ຄົນຈຳນວນຫຼາຍຕ່າງກໍພາກັນສົງໃສວ່າເປັນຫຍັງຄົນຈຶ່ງຕິດການພະນັນ ບາງຄົນຫຼິ້ນແຕ່ເຊົ້າຮອດຄໍ່າ ຫຼື ຫຼິ້ນໝົດມື້ໝົດຄືນໂດຍບໍ່ເຮັດຫຍັງ ເຫດຜົນຫຼັກອາດເປັນຍ້ອນວ່າການພະນັນແມ່ນການສ່ຽງດວງຊະນິດໜຶ່ງ ແລະ ຄົນສ່ວນຫຼາຍກໍມັກທີ່ຈະສ່ຽງດວງຢູ່ແລ້ວ ດັ່ງນັ້ນ ມັນຈຶ່ງເຮັດໃຫ້ຄົນທີ່ຫຼິ້ນການພະນັກຮູ້ສຶກມ່ວນ ຮູ້ສຶກທ້າທາຍທຸກຄັ້ງທີ່ຫຼິ້ນ ບາງຄົນກໍຫຼິ້ນເພື່ອແກ້ເຫງົາ ຫຼິ້ນເອົາມ່ວນ ບາງຄົນກໍຫຼິ້ນເພື່ອຫາລາຍໄດ້ ຫາກຳໄລຈາກການຫຼິ້ນແບບຈິງຈັງ.

ການພະນັນສາມາດເຮັດໃຫ້ຄົນຕິດໄດ້ບໍ່? ຊຶ່ງບອກໄດ້ເລີຍວ່າບໍ່ ແຕ່ມັນຂຶ້ນກັບຄົນທີ່ຫຼິ້ນຫຼາຍກວ່າ ຂຶ້ນກັບຄວາມຄິດ ຄວາມຕ້ອງ ການ ບໍ່ແມ່ນເພາະພະນັນເຮັດໃຫ້ຕິດ ຄິດແບບງ່າຍໆກໍຄືພະນັນເປັນພຽງເກມບໍ່ແມ່ນຊີວິດ ບໍ່ມີຄວາມສົນໃຈໃດໆ ມີແຕ່ພຽງຄົນຫຼິ້ນເທົ່ານັ້ນໃຫ້ຄວາມສົນໃຈກັບມັນ ແລະ ຢາກທີ່ຈະຫຼິ້ນມັນເອງ ດັ່ງນັ້ນ ຄົນທີ່ຕິດການພະນັນສ່ວນໃຫຍ່ຈະເປັນຄົນໂລບມາກ ຫຼິ້ນແບບບໍ່ມືນຫູມືນຕາ ບໍ່ນຶກເຖິງຄົນອື່ນ ເອົາແຕ່ໃຈຕົວເອງ ສັງເກດໄດ້ວ່າຄົນກຸ່ມນີ້ຫຼິ້ນບໍ່ພໍເທົ່າໃດກໍເງິນໝົດ ເປັນໜີ້ ມີຫຍັງກໍຂາຍໝົດເຖິງຂັ້ນສິ້ນເນື້ອປະດາຕົວ.

ຄົນຕິດການພະນັນເປັນຍ້ອນຫຍັງ? ເປັນເພາະນິດໃສ ຫຼື ປ່ວຍ?  ສຳລັບສາເຫດຂອງການເສບຕິດການພະນັນນັ້ນປັດຈຸບັນຈັດໄດ້ວ່າເປັນພະຍາດທາງສະໝອງ ໂດຍງານວິໄຈໄດ້ພົບວ່າ ວົງຈອນການທຳງານຂອງສະໝອງຂອງຜູ້ທີ່ຕິດການພະນັນມີລັກສະນະຕ່າງຈາກຄົນທົ່ວໄປເຊັ່ນ ການຄວບຄຸມຕົນເອງ ນອກຈາກນີ້ ສານສື່ປະສາດໃນສະໝອງຊະນິດໜຶ່ງຄື serotonin ອາດເສຍສົມດຸນ.

ຄົນທີ່ຫຼິ້ນການພະນັນຈົນເຖິງກັບເປັນພະຍາດທີ່ເອີ້ນວ່າ ພະຍາດຕິດການພະນັນ (Pathological gambling) ມີລັກສະນະຄ້າຍກັບການເສບສານເສບຕິດຄື ຈິດໃຈຈະຈົດຈໍ່ຢູ່ກັບການຫຼິ້ນການພະນັນຕະຫຼອດເວລາຈົນບໍ່ສາມາດຄິດ ຫຼື ເຮັດສິ່ງອື່ນໄດ້ ມີແຕ່ຄວາມຢາກຫຼິ້ນ ຊຶ່ງມັນຍາກທີ່ຈະຄວບຄຸມ ໃນທີ່ສຸດກໍຈະຫຼິ້ນການພະນັນໂດຍບໍ່ມີການຍັບຍັ້ງ ເວລາຫຼິ້ນໄດ້ກໍເກີດຄວາມໂລບເພີ່ມຂຶ້ນເວລາຫຼິ້ນເສຍກໍເສຍດາຍ ແລະ ຢາກໄດ້ເງິນຄືນແລ້ວກໍຈະຫຼິ້ນແກ້ເກມ ໃນທີ່ສຸດກໍເສຍເງິນຈຳນວນຫຼາຍ ເຖິງຈະເສຍແຕ່ກໍຄິດເຂົ້າຂ້າງຕົນເອງວ່າມັນຕ້ອງມີໄດ້ມີເສຍ ການປອບໃຈຕົວເອງແບບນີ້ເຮັດໃຫ້ຜູ້ຫຼິ້ນບໍ່ສາມາດຢຸດຫຼິ້ນໄດ້ ການຂາດສະຕິຄວບ ຄຸມຕົວເອງບໍ່ໄດ້ເປັນອາການສຳຄັນຂອງພະຍາດການພະນັນ.

ເນື່ອງຈາກວ່າການປິ່ນປົວຜູ້ປ່ວຍທີ່ເປັນໂຣກການພະນັນແມ່ນບໍ່ໄດ້ຮັບຜົນດີ ດັ່ງນັ້ນ ການປ້ອງກັນຈຶ່ງສຳຄັນກວ່າການປິ່ນປົວ ຊຶ່ງຕ້ອງເລີ່ມຕັ້ງແຕ່ເດັກນ້ອຍ ພະຍາຍາມສົ່ງເສີມໃຫ້ເດັກນ້ອຍໄດ້ມີກິດຈະກຳດີໆເຮັດເພື່ອໃຫ້ເກີດວົງຈອນຄວາມເພິ່ງພໍໃຈຊີວິດຂອງຕົນເອງ ໃຫ້ເດັກນ້ອຍໄດ້ຮັບປະສົບການທີ່ດີຈາກກິດຈະກຳທີ່ຖືກຕ້ອງ ສອນໃຫ້ໃຊ້ຄວາມສາມາດຂອງຕົນເອງໃນການທຳມາຫາກິນໃຫ້ຫຼາຍກວ່າການສ່ຽງໂຊກ ສອນໃຫ້ຮູ້ຈັກລໍຄອຍຄວາມສຳເລັດ ທີ່ສຳຄັນຜູ້ໃຫຍ່ຕ້ອງເປັນແບບຢ່າງທີ່ດີ.

 

ບົດໂດຍ:​ບຸດສະດີ ສາຍນໍ້າມັດ
ແຫຼ່ງຂໍ້ມູນ: psyclin, cumentalhealth

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.