ຮົງກົງຂາຍບ່ອນຈອດລົດລາຄາແພງສຸດໃນໂລກ!!

0
287

ສຳນັກຂ່າວຕ່າງປະເທດລາຍງານເມື່ອບໍ່ດົນມານີ້ໂດຍອ້າງການເປີດເຜີຍຂອງສຳນັກຂ່າວເຊົາໄຊນ່າມໍນິ້ງໂພສວ່າ ເສດຖີຊາວຮົງກົງ ຈອນນີ້ ເສິງ ຊຸນອີ (Johnny Cheung Shun-yee) ນັກທຸລະກິດຄົນດັງໄດ້ປະກາດຂາຍບ່ອນຈອດລົດ (ແບ່ງຂາຍ 1 ເລນ) ຂະໜາດ 12,5 ຕາລາງແມັດໃນລາຄາ 7,6 ລ້ານໂດລາຮົງກົງ ຊຶ່ງເຮັດໃຫ້ກາຍເປັນການຊື້-ຂາຍບ່ອນຈອດລົດທີ່ມີລາຄາແພງທີ່ສຸດໃນໂລກ.

ລາຍງານຂ່າວດຽວກັນລະບຸອີກວ່າ ບ່ອນຈອດລົດແພງທີ່ສຸດໃນໂລກຢູ່ເທິງອາຄານ The Center ໃນເຂດເຊັນທຣັລ ຊຶ່ງເປັນເຂດທຸລະກິດການເງິນທີ່ສຳຄັນຂອງຮົງກົງ, ລາຄາດັ່ງ ກ່າວຖືວ່າເປັນລາຄາທີ່ສູງກວ່າລາຄາຊື້-ຂາຍເຮືອນໂດຍສະເລ່ຍໃນຮົງກົງເຖິງ 3 ເທົ່າ.

ຂະນະທີ່ ຈອນນີ້ ຊຶ່ງມີເພນເຮົາ (ເຮືອນພັກສ່ວນຕົວ) ຢູ່ໃນອາຄານດັ່ງກ່າວໄດ້ກ່າວວ່າ ກ່ອນໜ້ານີ້ຕົນເອງໄດ້ຕັດສິນໃຈຂາຍບ່ອນຈອດລົດ 4 ເລນໃຫ້ກັບຄົນທີ່ອາໄສໃນຕຶກດຽວກັນ ກ່ອນຈະຕັດສິນໃຈຂາຍບ່ອນຈອດລົດເລນສຸດທ້າຍຍ້ອນວ່າຜູ້ຊື້ຕ້ອງການບ່ອນຈອດລົດເພີ່ມ ແຕ່ບໍ່ໄດ້ລະບຸຊື່ຂອງຜູ້ທີ່ມາຊື້ວ່າແມ່ນໃຜ.

ບ່ອນຈອດລົດລາຄາ 7,6 ລ້ານໂດລາຮົງກົງຖືວ່າເປັນໂຕເລກທີ່ຫຼາຍກວ່າລາຍໄດ້ໂດຍສະເລ່ຍໝົດປີຂອງຄົນຮົງກົງເຖິງ 30 ເທົ່າ ແລະ ເປັນລາຄາທຽບເທົ່າກັບຄອນໂດມີນຽມ 1 ຫ້ອງນອນໃນເຂດເຊັນທຣັລ ແລະ ກ່ອນໜ້ານີ້ໃນເດືອນສິງຜ່ານມາ ເສດຖີຄົນນີ້ກໍໄດ້ຂາຍບ່ອນຈອດລົດຂະໜາດ 2 ເລນໃນຊັ້ນໃຕ້ດິນຂອງອາຄານໃນລາຄາລວມກັນ 12,7 ລ້ານໂດລາຮົງກົງ.

ຢ່າງໃດກໍຕາມ ຂ່າວດັ່ງກ່າວໄດ້ສະທ້ອນໃຫ້ເຫັນເຖິງຊ່ອງຫວ່າງຊົນຊັ້ນລະຫວ່າງຄົນຮັ່ງມີ ແລະ ຄົນທຸກໃນຮົງກົງ ທ່າມກາງກະແສການປະທ້ວງໃນຮົງກົງທີ່ຍົງຄົງດຳເນີນຕໍ່ໄປໂດຍບໍ່ຮູ້ວ່າຈະສິ້ນສຸດລົງເມື່ອໃດ ຂະນະທີ່ຄົນຮົງກົງສ່ວນໃຫຍ່ເກືອບຈະບໍ່ມີໂອກາດທີ່ຈະມີເຮືອນເປັນຂອງຕົນເອງໃນເຂດເສດຖະກິດທີ່ມີຄ່າຄອງຊີບທີ່ສູງລະດັບໂລກແຫ່ງນີ້.

 

 

 

 

ຮຽບຮຽງ: ເພັງສະຫວັນ

ຮູບພາບ: posttoday

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.