ຮອງນາຍົກລັດຖະມົນຕີລົງຢ້ຽມຢາມ ແລະ ເຮັດວຽກຢູ່ແຂວງຊຽງຂວາງ

0
325

ໃນຕອນເຊົ້າວັນທີ 13 ສິງຫາທີ່ຜ່ານມາ ທ່ານ ບຸນ​ທອງ ຈິດ​ມະນີ​ ກໍາມະການ​ກົມ​ການ​ເມືອງ​ສູນກາງ​ພັກ ຄະນະເລຂາທິການສູນ ກາງພັກ ຮອງ​ນາຍົກ​ລັດຖະມົນຕີ ປະທານ​ຄະນະ​ກວດກາ​ສູນ​ກາງ​ພັກ ປະທານ​ອົງການ​ກວດກາ​ລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມຄະນະຢ້ຽມຢາມ ແລະ ເຮັດວຽກຢູ່ແຂວງຊຽງຂວາງ ໂດຍມີ ທ່ານ ບຸນຕົ້ນ ຈັນທະພອນ ເລຂາພັກແຂວງ ເຈົ້າແຂວງຊຽງຂວາງ ມີບັນດາຄະນະປະຈໍາພັກແຂວງ ພ້ອມດ້ວຍພະນັກງານຫລັກແຫລ່ງອ້ອມຂ້າງແຂວງເຂົ້າ ຮ່ວມ.

ໂອກາດລົງເຄື່ອນໄຫວຢ້ຽມຢາມໃນຄັ້ງນີ້ທ່ານຮອງນາຍົກລັດຖະມົນຕີໄດ້ຮັບຟັງການລາຍງານກ່ຽວແຜນການພັດທະນາດ້ານເສດຖະ ກິດ-ສັງຄົມໂດຍສັງເຂບ ບົດສະຫຼຸບການສືບຕໍ່ແກ້ໄຂຜົນຂອງການກວດກາໄມ້ຢູ່ແຂວງຊຽງຂວາງ ແລະ ແຜນການກະກຽມດໍາເນີນກອງປະຊຸມໃຫຍ່ 3 ຂັ້ນກ່ຽວກັບການພັດທະນາເສດຖະກິດ-ສັງຄົມຂອງແຂວງ ຊຶ່ງໃນໄລຍະຜ່ານມາແມ່ນມີການຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນພາຍໃນ (GDP) ບັນລຸໄດ້ 3.728,19 ຕື້ກີບ ສະເລ່ຍໃສ່ຫົວຄົນ 1.747 ໂດລາຕໍ່ຄົນຕໍ່ປີສາ ມາດເກັບລາຍຮັບທ້ອງຖິ່ນໄດ້ 51.566,55 ລ້ານກີບ ເທົ່າກັບ 36,33% ແຜນການຂອງປີ ດ້ານກະສິກຳສາມາດປັກດໍາເຂົ້ານາປີໄດ້ 12.111 ເຮັກຕາ ເທົ່າກັບ 44,11% ຂອງແຜນການປີ ສໍາລັບການປູກຝັງ-ລ້ຽງສັດແມ່ນປູກສາລີຫວານ ແລະ ສາລີແຂງໄດ້ 11.916 ເຮັກຕາ ເທົ່າກັບ 55,81% ຂອງແຜນການປີ ການລ້ຽງສັດໃຫຍ່ປະເພດງົວ ຄວາຍ ແລະ ມ້າ ມີຈໍານວນ 230.000 ກວ່າໂຕ ແລະ ກໍານົດປະເພດຜະລິດເປັນສິນຄ້າຕົ້ນຕໍຂອງແຂວງ ມີການລ້ຽງສັດໃຫຍ່ ປູກສາລີ ປູກເຂົ້າໄກ່ນ້ອຍ ປູກມອນ-ລ້ຽງມອນ ແລະ ການປູກໄມ້ແປກພັນເພື່ອຂີດເອົາຢ່າງ ສົ່ງສິນຄ້າອອກຊາຍແດນສູ່ຫວຽດນາມໄດ້ 42,11 ຕື້ກີບ ເທົ່າ 34,68% ຂອງແຜນການປີ ສິນຄ້ານຳເຂົ້າໄດ້ 104,68 ຕື້ກີບ ເທົ່າກັບ 45,16% ຂອງແຜນການປີ ນອກນັ້ນ ປະຊາຊົນໄດ້ມີໄຟຟ້າຊົມໃຊ້ກວມ 95% ຂອງຈໍານວນຄອບຄົວໃນທົ່ວແຂວງ ມີເສັ້ນທາງເຂົ້າເຖິງບ້ານ 99,58% ຂອງບ້ານໃນທົ່ວແຂວງຄອບຄົວທຸກຍາກຍັງເຫຼືອ 1,72% ຂອງຄອບຄົວທົ່ວແຂວງ ດ້ານການສຶກສາບັນດາເມືອງໃນທົ່ວແຂວງໄດ້ປະກາດຈົບມັດທະຍົມຕອນຕົ້ນບໍາລຸງ ປະຊາຊົນສາມາດເຂົ້າເຖິງດ້ານສາທາລະນະສຸກ 100%.

ໃນການສືບຕໍ່ແກ້ໄຂຜົນຂອງການກວດກາໄມ້ໃນໄລຍະຜ່ານມາໄດ້ແຕ່ງຕັ້ງຄະນະສະເພາະກິດສືບຕໍ່ແກ້ໄຂຜົນການກວດກາໄມ້ທີ່ເມືອງໝອກ ແລະ ສືບຕໍ່ກວດກາໄມ້ທົ່ວແຂວງຊຽງຂວາງ ໂດຍປະຕິບັດຕາມເນື້ອໃນຈິດໃຈຂອງຫ້ອງວ່າການສໍານັກງານນາຍົກລັດ ຖະມົນຕີເພື່ອສືບຕໍ່ກວດກາໄມ້ຕົວຈິງຢູ່ 5 ເມືອງ ໂດຍວິທີການແຍກໄມ້ຖືກກົດໝາຍ ຜິດກົດໝາຍ ປະມູນຂາຍໄມ້ ເຮັດສັນຍາຊື້-ຂາຍໄມ້ ທວງເອົາເງິນພັນທະ ທວງຄ່າຂາຍໄມ້ ແລະ ຄ່າປັບໄໝໄມ້ ຄຸ້ມຄອງການເຄື່ອນຍ້າຍໄມ້ ສືບຕໍ່ດັດສົມໂຮງງານປຸງແຕ່ງໄມ້ ກວດກາພາຫະນະ ແລະ ອຸປະກອນຕັດໄມ້ ຜ່ານການຈັດຕັ້ງປະຕິບັດດັ່ງກ່າວໃນປີ 2016 ສາມາດກວດພົບເຫັນໄມ້ທົ່ວແຂວງ 97.488.885 ແມັດກ້ອນ ໃນນີ້ ໄມ້ທີ່ຖືກຕ້ອງ 70.199.640 ແມັດກ້ອນ ບໍ່ຖືກຕ້ອງ 27.972.023 ແມັດກ້ອນ ພ້ອມທັງຍົກໃຫ້ເຫັນດ້ານດີ ດ້ານອ່ອນ ແລະ ຂໍ້ຄົງຄ້າງທີ່ຕ້ອງໄດ້ຮັບການແກ້ໄຂ ແຜນການກະກຽມດໍາເນີນກອງປະຊຸມໃຫຍ່ 3 ຂັ້ນ ໄດ້ມີ ການຈັດຕັ້ງເຜີຍແຜ່ເຊື່ອມຊຶມໃຫ້ຄະນະບໍລິຫານງານພັກແຂວງ ເມືອງ ຮາກຖານ ແລະ ຄະນະໜ່ວຍພັກອ້ອມຂ້າງແຂວງ ໄດ້ມີ ການຈັດກອງປະຊຸມເພື່ອສະຫຼຸບລາຍງານຜົນການຈັດຕັ້ງປະຕິບັດຂອງບັນດາເມືອງ ແລະ ຮາກຖານອ້ອມຂ້າງແຂວງ ພ້ອມນັ້ນ ຍັງໄດ້ຈັດຕັ້ງເຮັດທົດລອງການກະກຽມຢູ່ອົງຄະນະພັກເມືອງພູກູດແລ້ວສືບຕໍ່ລົງຊຸກຍູ້ໃຫ້ບັນດາເມືອງຕ່າງໆໄດ້ສືບຕໍ່ກະກຽມ.

ໃນໂອກາດດຽວກັນ ທ່ານຮອງນາຍົກລັດຖະມົນຕີໄດ້ໃຫ້ກຽດໂອ້ລົມພ້ອມໃຫ້ທິດຊີ້ນໍາ ເປັນຕົ້ນແມ່ນໄດ້ເນັ້ນໃຫ້ເອົາໃຈໃສ່ວຽກງານ ປກຊ-ປກສ ອັນເປັນໜ້າທີ່ພື້ນຖານຍາວນານທີ່ຂາດບໍ່ໄດ້ ຕ້ອງໄດ້ເຮັດເປັນປະຈຳເພື່ອສະກັດກັ້ນ ແລະ ແກ້ໄຂຕໍ່ກົນອຸບາຍຂອງພວກສັດຕູ ກຸ່ມຄົນບໍ່ດີທີ່ສ້າງບັນຫາຕ່າງໆໃນແຕ່ລະບ້ານ ບັນດາປາກົດການຫຍໍ້ທໍ້ຕ່າງໆ ແລະ ເພີ່ມຄວາມເອົາໃຈໃສ່ສຶກສາອົບ ຮົມໃຫ້ປະຊາຊົນເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ ສືບຕໍ່ເອົາໃຈໃສ່ໃນການປະຕິບັດແຜນພັດທະນາເສດຖະກິດ-ສັງຄົມປະຈຳປີ 2019 ທີ່ແຂວງວາງອອກຕິດພັນກັບການຊຸກຍູ້ຂະບວນການຕ່າງໆ ສູ້ຊົນປະຕິບັດບັນດາຄາດໝາຍ ເພື່ອເຮັດໃຫ້ແຜນການມີປະສິດທິຜົນ ​ເອົາໃຈໃສ່ໃນການຜະລິດລະດູຝົນຕິດພັນກັບການຜະລິດເປັນສິນຄ້າ ເອົາໃຈໃສ່ແກ້ໄຂບັນ ຫາພະຍາດພືດ ແລະ ສັດ ກວດກາແກ້ໄຂຜົນກະທົບຈາກໄພພິບັດທໍາມະຊາດ ສືບຕໍ່ແກ້ໄຂບັນຫາໄມ້ທີ່ມີພະນັກງານລັດພົວພັນ ບັນຫາສຳຄັນຕ້ອງຕີລາຄາແຍກປະເພດຄວາມຮັບຜິດຊອບຂອງແຕ່ລະຄົນໃຫ້ແຈ້ງລະຫວ່າງຜູ້ເຮັດຜິດຕົວຈິງ ແລະ ຜູ້ທີ່ມີການພົວພັນ ຂົງເຂດວັດທະນະທຳ-ສັງຄົມແມ່ນໃຫ້ສືບຕໍ່ສູ້ຊົນບັດດາຄາດໝາຍ ໂດຍສະເພາະວຽກງານການສຶກສາຕ້ອງໄດ້ປັບປຸງໃຫ້ດີຂຶ້ນ ເອົາໃຈໃສ່ແກ້ໄຂບັນຫາພະຍາດລະບາດ ເອົາໃຈໃສ່ຄຸ້ມຄອງແຮງງານພາຍໃນ ແລະ ຕ່າງປະເທດ ແລະ ບັນຫາສຸດທ້າຍແມ່ນກ່ຽວກັບການກະກຽມກອງປະຊຸມໃຫຍ່ 3 ຂັ້ນເຊັ່ນ ກະກຽມບົດລານງານການເມືອງ ແຜນພັດທະນາເສດຖະກິດ-ສັງຄົມ ບົດສຳ ຫຼວດການນຳພາຂອງຄະນະພັກ ຕ້ອງຕີລາຄາໃຫ້ຖືກຕ້ອງ ແລະ ວາງທິດທາງຕໍ່ໜ້າໃຫ້ແທດຕົວຈິງ ພ້ອມນີ້ ກໍໄດ້ມອບເງິນສົດໃຫ້ປະຊາຊົນຜູ້ທີ່ປະສົບໄພພິບັດທາງທຳມະຊາດແຂວງຊຽງຂວາງ 100.000.000 ກີບ ແລະ ເຄື່ອງອຸປະໂພກ-ບໍລິໂພກ ເຄື່ອງໃຊ້ຄົວເຮືອນ ລວມມູນຄ່າ 220.000.000 ກີບ.

 

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.