ລາວສົ່ງນັກກີລາ 230 ຄົນເຂົ້າຮ່ວມຊີງໄຊໃນຊີເກມ 2019 ທີ່ຟີລິບປິນ

0
184

ງານມະຫະກຳກີລາຊີເກມຄັ້ງທີ 30 ປະຈຳປີ 2019 ຊຶ່ງຟີລິປິນຮັບໜ້າທີ່ເປັນເຈົ້າພາບ, ຈະມີການແຂ່ງຂັນ 56 ປະເພດກີລາ, ຊີງໄຊ 530 ຫຼຽນຄຳ, ໃນນັ້ນ ສປປ ລາວ ໄດ້ສົ່ງ 25 ປະເພດກີລາ, ລວມ 230 ຄົນເຂົ້າຮ່ວມ.

ເມື່ອວັນທີ 15 ພະຈິກຜ່ານມາໄດ້ມີພິທີຖະແຫຼງຂ່າວການກະກຽມເຂົ້າຮ່ວມການແຂ່ງຂັນມະຫະກຳກີລາຊີເກມຄັ້ງທີ 30 ທີ່ຈະຂຶ້ນທີ່ປະເທດຟີລິບປິນໃນລະຫວ່າງວັນທີ 30 ພະຈິກຫາ 11 ທັນວາ 2019, ໂດຍການເຂົ້າຮ່ວມຂອງ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ, ມີບັນດາປະທານ, ຮອງປະທານ, ເລຂາທິການຄະນະກຳມະການໂອແລັມປິກແຫ່ງ ຊາດລາວ, ສະຫະພັນກີລາແຫ່ງຊາດ, ຄະນະນຳ, ຄູຝຶກ, ນັກກີລາ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ ກ່າວວ່າ: ການກະກຽມເຂົ້າຮ່ວມແຂ່ງ ຂັນຊີເກມຄັ້ງທີ 30 ທີ່ປະເທດຟີລິບປິນ ມາຮອດປັດຈຸບັນຄະນະຮັບຜິດຊອບໄດ້ສົມທົບກັບຄະນະກຳມະການໂອແລັມປິກແຫ່ງຊາດລາວ ແລະ ສະຫະພັນກີລາແຫ່ງຊາດປຶກສາຫາລືຄົ້ນຄວ້າ ແລະ ຄັດເລືອກເອົາປະເພດກີລາທີ່ມີຄວາມຫວັງທີ່ຈະຄວ້າຫຼຽນ, ມີສະຖິ ຕິໃກ້ຄຽງກັບລະດັບຂອງຄູ່ແຂ່ງຂັນ ແລະ ໄດ້ເຫັນເປັນເອກະພາບກຳນົດເອົາ 25 ປະເພດກີລາເຂົ້າຮ່ວມການແຂ່ງຂັນ, ໃນນັ້ນ ໄດ້ສົ່ງນັກກີລາເຂົ້າຮ່ວມຈຳນວນ 230 ຄົນໂດຍນຳໃຊ້ງົບປະມານລັດ ແລະ ບັນດາສະຫະພັນກີລາແຫ່ງຊາດຮັບຜິດຊອບກຸ້ມຕົນເອງ ຈຳນວນ 140 ຄົນ, ມີຄະນະນຳ, ກຳມະການຕັດສິນ, ຄູຝຶກ ແລະ ນັກກີລາທີ່ຈະເດີນທາງໄປແຂ່ງຂັນທັງໝົດ 370 ຄົນ, ທັງນີ້ ກໍເພື່ອເປັນການປະຢັດລາຍຈ່າຍງົບປະມານໃນຈຳນວນ 25 ປະເພດກີລານີ້ໄດ້ແຍກອອກເປັນ 2 ໝວດກີລາດັ່ງນີ້:

1. ໝວດກີລາທີ່ເຄີຍມີມູນເຊື້ອຍາດໄດ້ຫຼຽນຄຳໃນໄລຍະຜ່ານມາຫຼາຍຄັ້ງ, ນຳໃຊ້ງົບປະມານຂອງລັດຮອບດ້ານມີ 18 ປະເພດກີລາ ຄື: ເປຕັງ, ບີລຽດ–ສະນຸກເກີ, ວູຊູ, ກະຕໍ້, ປັນຈັກສີລັດ, ລົດຖີບ, ຍິງທະນູ, ຢູໂດ, ມວຍສາກົນ, ມວຍລາວ, ມວຍປ້ຳ, ລອຍນ້ຳ, ແລ່ນ–ລານ, ເທຄວັນໂດ, ຄາຣາເຕໂດ, ຍົກນ້ຳໜັກ, ຄິກບ໋ອກຊິງ ແລະ ພິເສດກີລາຜ່ານສິ່ງກີດຂວາງເປັນກີລາຮູບແບບການທະຫານຊຶ່ງເຈົ້າພາບຮ້ອງຂໍຄວາມຮ່ວມມືໃຫ້ເຂົ້າຮ່ວມ.

2. ໝວດກີລາທີ່ບັນດາສະຫະພັນກີລາແຫ່ງຊາດຮັບຜິດຊອບກຸ້ມຕົນເອງທາງດ້ານງົບປະມານມີ 7 ປະເພດກີລາຄື: ກ໊ອຟ, ຣັກບີ້, ອີສະປອດ, ບານເຕະ (ຊາຍ), ເທັນນິສ, ຊ໊ອຟເທັນນິສ ແລະ ໝາກເສິກ (ສະຫະພັນກີລາແຫ່ງຊາດຮັບຜິດຊອບຄ່າໃຊ້ຈ່າຍໄລຍະກຽມ ແລະ ໄລຍະເຂົ້າຮ່ວມການແຂ່ງຂັນ, ລັດຖະບານຊ່ວຍຮັບຜິດຊອບເງິນແຮຖົງບຸກຄົນ, ຊຸດວອມ ແລະ ຊຸດສວນສະ ໜາມ).

ຂະນະທີ່ການເຂົ້າຮ່ວມແຂ່ງຂັນໃນຄັ້ງນີ້ ສປປ ລາວໄດ້ຕັ້ງເປົ້າຢ່າງໜ້ອຍໃຫ້ໄດ້ 2 ຫຼຽນຄຳ, ໂດຍຕັ້ງຄວາມຫວັງທີ່ກີລາທີ່ມີຜົນງານເດັ່ນທີ່ຜ່ານມາ.

ສຳລັບງານມະຫະກຳກີລາຊີເກມໄດ້ເລີ່ມຈັດຂຶ້ນຄັ້ງທຳອິດໃນປີ 1959, ມີ 6 ປະເທດເຂົ້າຮ່ວມ ໃນນັ້ນ ລວມທັງ ສປປ ລາວ ແລະ ມາຮອດປັດຈຸບັນມີ 11 ປະເທດໃນອາຊຽນເຂົ້າຮ່ວມ ຊຶ່ງມີການກຳນົດຈັດຂຶ້ນທຸກໆ 2 ປີ ໂດຍຜັດປ່ຽນກັນເປັນເຈົ້າພາບໝູນວຽນໄປຕາມຕົວອັກສອນພາສາອັງກິດ, ສ່ວນຜົນງານຂອງນັກກີລາລາວທີ່ເຂົ້າຮ່ວມງານກີລາຊີເກມຄັ້ງຫຼ້າສຸດຄືຄັ້ງທີ 29 ໃນປີ 2017 ຜ່ານມາ ສປປ ລາວ ສາມາດຍາດມາໄດ້ 2 ຫຼຽນຄຳ, 3 ຫຼຽນເງິນ ແລະ 21 ຫຼຽນທອງ ຈັດຢູ່ອັນດັບທີ 9 ຂອງ 11 ປະເທດທີ່ເຂົ້າ ຮ່ວມ.

ຮຽບຮຽງຂ່າວ: ພຸດສະດີ ລາວລີ
ແຫຼ່ງຂໍ້ມູນ: ເສດຖະກິດ-ການຄ້າ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.