ປະຊາຊົນ 372 ຄອບຄົວເຂດລ້ອງນໍ້ານານຕ້ອງການຄວາມຊ່ວຍເຫຼືອ

0
239

ພາຍຫຼັງທີ່ນ້ຳນານໄດ້ບົກແຫ້ງລົງ ປະຊາຊົນຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມກະທັນຫັນຈຳນວນ 8 ບ້ານ 372 ຄອບຄົວ ຢູ່ເມືອງນານ ແຂວງຫຼວງພຣະບາງມຕ້ອງການຊ່ວຍເຫຼືອຢ່າງຮີບດ່ວນ ເປັນຕົ້ນແມ່ນເຄື່ອງນຸ່ງ ສະບຽງອາຫານ ແລະ ນ້ຳກິນ ຊຶ່ງໃນວັນທີ 30 ກໍລະກົດຜ່ານມາອົງການປົກຄອງແຂວງ ແລະ ເມືອງໄຊຍະບູລີກໍໄດ້ນຳເງິນສົດ ນ້ຳດື່ມ ແລະ ໝີ່ເຄິ່ງສຳເລັດຮູບ ລວມມູນຄ່າ 7,4 ລ້ານກີບ ໄປຊ່ວຍເຫຼືອບັນເທົາທຸກໃນເບື້ອງຕົ້ນ.

ປັດຈຸບັນ ອົງການປົກຄອງແຂວງຫຼວງພຣະບາງໄດ້ຕັ້ງຈຸດຮັບເຄື່ອງບໍລິຈາກຢູ່ຫ້ອງວ່າການປົກຄອງແຂວງ ພ້ອມນີ້ຫຼາຍພາກສ່ວນໃນສັງຄົມກໍໄດ້ຈັດຕັ້ງກຸ່ມລະດົມການບໍລິຈາກເພື່ອນຳເຄື່ອງໄປມອບບັນເທົາໄພໃຫ້ປະຊາຊົນໃນໄວໆນີ້ ໄພນໍ້າຖ້ວມກະທັນຫັນຄັ້ງນີ້ ໄດ້ເກີດຂຶ້ນໃນຕອນເຊົ້າຂອງວັນທີ 30 ກໍລະກົດ 2019 ເນື່ອງຈາກເກີດມີຝົນຕົກໜັກຕິດຕໍ່ກັນຫຼາຍຊົ່ວໂມງ ຊຶ່ງໄດ້ສົ່ງຜົນກະ ທົບແກ່ປະຊາຊົນໃນ 8 ບ້ານຂອງເມືອງດັ່ງກ່າວ ໃນນັ້ນ  ບ້ານນາຝາຍ  4 ຄອບຄົວ ບ້ານປ່າໄຜ່ 35 ຄອບຄົວ ບ້ານສີມຸງຄຸນ 35 ຄອບຄົວ ບ້ານສີບຸນເຮືອງ 130 ຄອບຄົວ ບ້ານນາເລົາ 120 ຄອບຄົວ ບ້ານໂພນຫີນ 10 ຄອບຄົວ ບ້ານນາເຄີນ 37 ຄອບຄົວ ແລະ ບ້ານທາດ 1 ຄອບຄົວ ເຫດການຄັ້ງນີ້ໄດ້ສ້າງຄວາມເສຍຫາຍຫຼາຍກ່ວາທຸກປີຜ່ານມາ ປະຊາຊົນບາງຄອບຄົວຖືກຜົນກະທົບໜັກໄດ້ພຽງເຄື່ອງນຸ່ງຄາຄີງ ທັງນີ້ ຍັງບໍ່ມີຜູ້ເສຍຊີວິດ ຫຼື ບາດເຈັບ ສ່ວນຂໍ້ມູນຄວາມເສຍຫາຍຍັງຢູ່ໃນຂັ້ນຕອນການເກັບກຳ ແລະ ບໍ່ທັນສາມາດປະເມີນໄດ້.

ຫລັງຈາກເກີດເຫດໄພນ້ຳຖ້ວມທາງອົງການປົກຄອງເມືືອງໄດ້ສົ່ງກຳລັງເຈົ້າໜ້າທີ່ທະຫານ ຕຳຫຼວດ ເຂົ້າຊ່ວຍເຫຼືອປະຊາຊົນທີ່ຕິດຄ້າງຢູ່ໃນເຮືອນ ແລະ ມ້ຽມັດສິ່ງຂອງທີ່ຈຳເປັນ ພ້ອມທັງຊ່ວຍປ້ອງກັນຜົນກະທົບໃຫ້ບາງຄອບຄົວ ແລະ ຈັດຕັ້ງການປ້ອງກັນເວນ ຍາມເຝົ້າລະວັງຢ່າງໃກ້ຊິດ ມາຮອດປັດຈຸບັນລະດັບນ້ຳໄດ້ລຸດລົງເຂົ້າສູ່ພາວະປົກກະຕິ ປະຊາຊົນໄດ້ຮັບການເບິ່ງແຍງຈາກອົງການປົກຄອງເມືອງ ສ່ວນປະຊາຊົນຜູ້ມີເງື່ອນໄຂ ໄດ້ເຂົ້າອະນາໄມເຮືອນຊານຂອງຕົນໂດຍສົມທົບກັບເຈົ້າໜ້າທີ່ຕໍາຫຼວດ ແລະ ທະຫານ ເຂົ້າຊ່ວຍນຳອີກ.

 

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.