ປະຊາຊົນ 33 ປະເທດລົງຄວາມເຫັນ “ບໍ່ເຊື່ອໝັ້ນ” ໂດນັລ ທຣັມ

0
7879

ຜົນສຳຫຼວດຂອງສູນວິໄຈ “ພິວ” ລະບຸເມື່ອບໍ່ດົນມານີ້ວ່າ: ປະຊາຊົນສ່ວນໃຫຍ່ໃນຫຼາຍປະເທດມີທັດສະນະຕໍ່ປະທານາທິບໍດີ ໂດນັລ ທຣັມ ໃນດ້ານລົບ, ໂດຍບໍ່ເຊື່ອໝັ້ນນະໂຍບາຍຕ່າງປະເທດຂອງ ທຣັມ ສູງເຖິງ 64%, ແຕ່ທັດສະນະທີ່ເບິ່ງອາເມຣິກາໃນພາບລວມຍັງຢູ່ໃນແງ່ດີ.

ສຳນັກຂ່າວເອເອຟພີລາຍງານວ່າ: ຜົນສຳຫຼວດຂອງພິວຊຶ່ງເຜີຍແຜ່ເມື່ອວັນທີ 12 ມັງກອນຜ່ານມາຊີ້ໃຫ້ເຫັນວ່າ: 64% ຂອງຜູ້ທີ່ຕ້ອງແບບສຳຫຼວດຈາກນອກອາເມຣິກາກ່າວວ່າ: ເຂົາເຈົ້າບໍ່ມີຄວາມເຊື່ອໝັ້ນວ່າ “ທຣັມ” ຈະດຳເນີນນະໂຍບາຍດ້ານຕ່າງປະ ເທດຢ່າງຖືກຕ້ອງ, ຂະນະທີ່ 29% ສະແດງຄວາມເຊື່ອໝັ້ນໃນຕົວຂອງ ທ່ານ ທຣັມ.

ການສຳຫຼວດຂອງສູນວິໄຈພິວໄດ້ສຳຫຼວດຄວາມຄິດເຫັນຂອງປະຊາຊົນໃນ 33 ປະເທດ, ໂດຍສອບຖາມປະຊາຊົນປະມານ 37.000 ຄົນລະຫວ່າງເດືອນພຶດສະພາຫາຕຸລາ 2019 ກ່ອນທີ່ຈະເກີດສະຖານະການເຄັ່ງຕຶງໃນຕາເວັນອອກກາງກໍລະນີຄວາມຂັດແຍ່ງລະຫວ່າງອາເມຣິກາ ແລະ ອີຣ່ານ.

ຂະນະທີ່ກຸ່ມຄົນທີ່ເບິ່ງຜູ້ນຳອາເມຣິກາໃນດ້ານລົບຫຼາຍທີ່ແມ່ນຢູ່ໃນເອີຣົບຕາເວັນຕົກຊຶ່ງພົບວ່າມີຊາວເຢຍລະມັນພຽງແຕ່ 13% ທີ່ເຊື່ອໝັ້ນໃນຕົວຂອງຜູ້ນຳອາເມຣິກາ, ສ່ວນສະວີເດນ 18%, ຝຣັ່ງ 20%, ແອັດສະປາຍ 21%, ເນເທີແລນ 25% ແລະ ເກຣັກກັບອັງກິດຢູ່ທີ່ 32%. ອີກດ້ານໜຶ່ງຊຶ່ງບາງປະເທດປະຊາຊົນສະແດງຄວາມສະໜັບສະໜູນຜູ້ນຳອາເມຣິກາ, ໃນນັ້ນ ຟີລິບປິນສູງເຖິງ 77%, ອິສຣາແອນ 71%, ເຄນຢາ 65%, ໄນຈີເຣຍ 58% ແລະ ອິນເດຍ 56%.

ຢ່າງໃດກໍຕາມ ໃນພາບລວມທັງໝົດກໍຍັງມີຄວາມບໍ່ເຫັນດີກັບນະໂຍບາຍຕ່າງປະເທດບາງກໍລະນີຂອງຜູ້ນຳອາເມຣິກາ, ຊຶ່ງນັກວິໄຈໃຊ້ຄ່າການວັດແທກຄວາມເປັນໄປໄດ້ເພື່ອສະຫຼຸບທັດສະນະຕໍ່ຜົນງານດ້ານຕ່າງປະເທດຂອງ ທ່ານ ທຣັມ, ໂດຍຄ່າສະເລ່ຍທົ່ວ ໂລກພົບວ່າມີຫຼາຍກວ່າ 68% ທີ່ຄັດຄ້ານນະໂຍບາຍຂຶ້ນພາສີ, 66% ຄັດຄ້ານການຖອນຕົວອອກຈາກຂໍ້ຕົກລົງໂລກຮ້ອນປາຣີ ແລະ 60% ບໍ່ເຫັນດີກັບການສ້າງກຳແພງຕາມເຂດຊາຍແດນອາເມຣິກາ-ເມັກຊິໂກ, ສ່ວນການເຈລະຈາໂດຍກົງກັບ ຄິມ ຈອງ ອຶນ ຜູ້ນຳສູງສຸດຂອງ ສປ ເກົາຫຼີ ມີ 41% ທີ່ເຫັນດີ ແລະ ບໍ່ເຫັນດີ 36%.

ພ້ອມນີ້ “ພິວ” ກໍໄດ້ສອບຖາມທັດສະນະຊາວໂກລຕໍ່ຜູ້ນຳປະເທດອື່ນໆຊຶ່ງປາກົດວ່າ: ທ່ານ ນາງ ອັງເກລາ ແມຣເຄິລ ນາຍົກລັດ ຖະມົນຕີຂອງເຢຍລະມັນໄດ້ຄະແນນຄວາມເຊື່ອໝັ້ນ ຈາກຊາວລູກຫຼາຍທີ່ສຸດຄື 46%, ຕາມມາດ້ວຍ ທ່ານ ເອມມານູເອລ ມາຄຣົງ ຂອງຝຣັ່ງ 41%, ສ່ວນປະທານາທິບໍດີ ວະລາດິເມຍ ປູຕິນ ຂອງຣັດເຊຍຢູ່ທີ່ 33% ແລະ ທ່ານ ສີ ຈິ້ນຜິງ ປະທານາທິບໍດີຂອງ ສປ ຈີນຢູ່ທີ່ 28%.

ສຳລັບທັດສະນະຄະດີທີ່ມີຕໍ່ອາເມຣິກາໃນພາບລວມຊຶ່ງຜົນສຳຫຼວດພົບວ່າ: ສ່ວນໃຫຍ່ຍັງເບິ່ງອາເມຣິກາໃນແງ່ດີ, ໂດຍໃນເອີຣົບເຊັ່ນ: ຊາວໂປແນນິຍົມຊົມຊອບອາເມຣິກາສູງສຸດທີ່ 79%, ຕາມມາດ້ວຍລິທົວເນຍ 70% ແລະ ຮັງກາຣີ 66% ສ່ວນຊາວເອີ ຣົບທີ່ນິຍົມອາເມຣິກາໜ້ອຍທີ່ສຸດຄື: ເຢຍລະມັນ 39%, ສະວີເດນ 45% ແລະ ເນເທີແລນ 46%.

 

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.