ນາຍົກລັດຖະມົນຕີພົບປະໂອ້ລົມການນຳຫຼັກແຫຼ່ງແຂວງວຽງຈັນ

0
330

ເມື່ອວັນທີ 9 ສິງຫາທີ່ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະໄດ້ໄປຢ້ຽມຢາມ ແລະ ໃຫ້ກຽດພົບປະໂອ້ລົມຕໍ່ການນຳ ພະນັກງານຫຼັກແຫຼ່ງ ແລະ ພະນັກງານອາວຸໂສ-ບຳນານແຂວງວຽງຈັນຢູ່ທີ່ຫ້ອງວ່າການປົກຄອງແຂວງ ໂດຍມີ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ພ້ອມດ້ວຍຄະນະນຳ ແລະ ພະນັກງານຫຼັກແຫຼ່ງແຂວງວຽງຈັນໃຫ້ການຕ້ອນຮັບ.

ກ່ອນການພົບປະໂອ້ລົມ ທ່ານນາຍົກລັດຖະມົນຕີພ້ອມດ້ວຍຄະນະໄດ້ຮັບຟັງການລາຍງານຫຍໍ້ກ່ຽວກັບສະພາບການພັດທະນາເສດ ຖະກິດ-ສັງຄົມຂອງແຂວງໄລຍະ 6 ເດືອນຕົ້ນປີ 2019 ຈາກທ່ານເຈົ້າແຂວງໆວຽງຈັນຊຶ່ງໄດ້ຕີລາຄາວ່າ ທົ່ວແຂວງຍັງສືບຕໍ່ມີຄວາມສະຫງົບ ສັງຄົມມີຄວາມເປັນລະບຽບຮຽບຮ້ອຍ ຊຶ່ງເປັນພື້ນຖານໃຫ້ແກ່ເສດຖະກິດ-ສັງຄົມ ໄດ້ຮັບການພັດທະນາ ແລະ ຂະ ຫຍາຍຕົວເປັນກ້າວໆ ຊິວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນຢ່າງຕໍ່ເນື່ອງ ສຳລັບ 6 ເດືອນຕົ້ນປີ 2019 ເສດຖະກິດຂະຫຍາຍໃນລະດັບ 6,7% ສາມາດເກັບລາຍຮັບເຂົ້າງົບປະມານໄດ້ທັງໝົດ 111,39 ຕື້ກີບ ເທົ່າກັບ 54,44% ຂອງແຜນການປີ ເມື່ອທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 8,77% ການຜະລິດເຂົ້ານາປີສາມາດຕົກກ້າ ແລະ ປັກດໍາສໍາເລັດ 11.288 ເຮັກຕາ ເທົ່າກັບ 78% ຂອງແຜນການປີ ສາຍເຫດທີ່ບໍ່ໄດ້ຕາມແຜນການຍ້ອນສະພາບຝົນບໍ່ຕົກຕາມລະດູການ ເມືອງທີ່ຖືກຜົນກະທົບໜັກກວ່າໝູ່ແມ່ນເມືອງຊະນະຄາມ ເຮັດໃຫ້ບໍ່ມີນໍ້າພຽງພໍແກ່ການຜະລິດເຂົ້າ ເນື້ອທີ່ປັກດໍາເສຍຫາຍ 3.600 ເຮັກຕາ ແລະ ປັກດໍາຄືນໃໝ່ແລ້ວ 200 ເຮັກຕາ ການປູກພືດເປັນສິນຄ້າໄດ້ດໍາເນີນໄປຢ່າງເປັນຂະ ບວນ ການລ້ຽງສັດເປັນສິນຄ້າສາມາດຕອບສະໜອງສະບຽງອາຫານ ແລະ ເປັນສິນຄ້າໃຫ້ແກ່ສັງຄົມໄດ້ດີສົມຄວນ ການປະຕິບັດຄາດໝາຍທາງດ້ານສັງຄົມມີຄວາມຄືບໜ້າ ມີບາງດ້ານປະຕິບັດໄດ້ລື່ນແຜນການ ໄດ້ເອົາໃຈໃສ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ປັດຈຸບັນທົ່ວແຂວງມີບ້ານທຸກຍາກ 9 ບ້ານ ກວມເອົາ 2,15% ຂອງຈໍານວນບ້ານໃນທົ່ວແຂວງ.

ຫລັງຈາກນັ້ນ ທ່ານ ນາຍົກລັດຖະມົນຕີໄດ້ສະເໜີໃຫ້ບັນດາທ່ານລັດຖະມົນຕີກະຊວງກ່ຽວຂ້ອງມີຄຳເຫັນ ແລະ ຊີ້ແຈງຕໍ່ບາງບັນ ຫາທີ່ພົ້ນເດັ່ນ ແລະ ທາງແຂວງມີຄວາມສົນໃຈ ເປັນຕົ້ນການສົ່ງເສີມການຜະລິດເປັນສິນຄ້າທີ່ທ້ອງຖິ່ນມີທ່າແຮງ ບັນຫາການແຜ່ລະບາດຂອງພະຍາດອະຫິວາໝູອາຟຣິກາ ແລະ ສັດຕູພືດ ການປ້ອງກັນ ແລະ ແກ້ໄຂການລະບາດຂອງພະຍາດໄຂ້ເລືອດອອກ ການຊົດເຊີຍຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ແລະ ທາງດ່ວນ ວຽງຈັນ-ວັງວຽງ ໃຫ້ແກ່ປະຊາຊົນ ແລະ ບັນຫາອື່ນໆ.

ການພົບປະໂອ້ລົມຄັ້ງນີ້ ທ່ານນາຍົກລັດຖະມົນຕີໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດທີ່ແຂວງວຽງຈັນ ສາມາດປະຕິບັດໄດ້ໃນໄລຍະຜ່ານມາ ພ້ອມທັງຍົກໃຫ້ເຫັນທ່າແຮງໃນການພັດທະນາຂອງແຂວງວຽງຈັນທີ່ມີຫຼາຍດ້ານ (ທີ່ຕັ້ງພູມສັນຖານ ເສັ້ນທາງດ່ວນ ທາງລົດໄຟ ຊັບພະຍາກອນທຳມະຊາດ ແລະ ທຳມະຊາດທີ່ສວຍງາມ) ແລະ ບັນຫາພົ້ນເດັ່ນ ຂໍ້ຄົງຄ້າງບາງດ້ານທີ່ຍັງຕ້ອງໄດ້ພ້ອມກັນເອົາໃຈໃສ່ປັບປຸງແກ້ໄຂໃນຕໍ່ໜ້າໃຫ້ຕົກໄປເປັນລຳດັບ ສິ່ງສຳຄັນແມ່ນທ່ານນາຍົກລັດຖະມົນຕີໄດ້ເນັ້ນໜັກໃຫ້ຄະນະນໍາທຸກຂັ້ນພາຍໃນແຂວງຕ້ອງເອົາໃຈໃສ່ສຸມທຸກສະຕິປັນຍາ ແລະ ຄວາມສາມາດເຂົ້າໃນການພັດທະນາເສດຖະ ກິດ-ສັງຄົມຂອງແຂວງ ຕ້ອງວາງແຜນການພັດທະນາໃຫ້ແທດເໝາະກັບຕົວຈິງ ແລະ ທ່າແຮງຂອງຕົນ ຕ້ອງເປັນແຜນທີ່ສາ ມາດຈັດຕັ້ງປະຕິບັດໄດ້ ແລະ ສອດຄ່ອງກັບແຜນງົບປະມານ ຄົ້ນຄວ້າສ້າງເງື່ອນໄຂ ແລະ ຊຸກຍູ້ໃຫ້ປະຊາຊົນມີສ່ວນຮ່ວມໃນການພັດທະນາ ເອົາໃຈໃສ່ປົກປັກຮັກສາສິ່ງແວດລ້ອມ ຊັບພະຍາກອນທຳມະຊາດ ໃຫ້ຄົງຄວາມອຸດົມສົມບູນ ນຳໃຊ້ຢ່າງສົມເຫດສົມ ຜົນ ຍືນຍົງ ແລະ ມີປະໂຫຍດສູງສຸດ ເອົາໃຈໃສ່ປະຕິບັດແຜນຈັດເກັບລາຍຮັບໃຫ້ດີ ແລະ ຄຸ້ມຄອງລາຍຈ່າຍງົບປະມານຢ່າງເຄັ່ງຄັດບົນຈິດໃຈປະຢັດມັດທະຍັດ ມີຄວາມໂປ່ງໃສ ແລະ ກວດສອບໄດ້ ການພິຈາລະນາໂຄງການລົງທຶນຂອງລັດຕ້ອງສອດຄ່ອງກັບຄວາມຮຽກຮ້ອງຕ້ອງການຕົວຈິງຂອງການພັດທະນາ ລົງທຶນແລ້ວໃຫ້ສາມາດປະກອບສ່ວນເຂົ້າໃນການຊຸກຍູ້ເສດຖະກິດ-ສັງຄົມຢ່າງແທ້ຈິງ ເປັນຕົ້ນການພັດທະນາຊົນນະບົດ ການສຶກສາກໍຄືການພັດທະນາຊັບພະຍາກອນມະນຸຸດ ສາທາລະນະສຸກ ໂດຍສະເພາະການປິ່ນປົວສຸຂະພາບ ແລະ ໂພຊະນາການ ລວມທັງການກໍ່ສ້າງຮາກຖານການເມືອງໃຫ້ມີຄວາມໜັກແໜ້ນ ແລະ ເຂັ້ມແຂງ ພ້ອມນີ້ ໃຫ້ມີການຄຸ້ມຄອງຕິດຕາມກວດກາການຈັດຕັ້ງປະຕິບັດຢ່າງເປັນປະຈຳ ໃຫ້ເອົາໃຈໃສ່ຄຸ້ມຄອງໂຄງການລົງທຶນສຳປະທານໃຫ້ດີ ໂດຍມີການເລືອກເຟັ້ນນັກລົງທຶນທີ່ມີຄວາມສາມາດທາງດ້ານທຶນຮອນ ເຕັກນິກ ປະສົບການ ແລະ ປະຫວັດການພັດທະນາທີ່ດີ ລວມທັງການສ້າງສັນຍາຕ່າງໆຕ້ອງໃຫ້ມີຄວາມຮັດກຸມ ບໍ່ໃຫ້ມີຊ່ອງຫວ່າງ ໃນຂະນະດຽວກັນກໍໃຫ້ເຂັ້ມງວດໃນການຕິດຕາມກວດກາໂຄງການທີ່ໄດ້ອະນຸມັດໄປແລ້ວເພື່ອຮັບປະກັນບໍ່ໃຫ້ມີລັກສະນະຈັບຈ່ອງ ຖ່ວງດຶງການພັດທະນາ ເພີ່ມທະວີການດຶງດູດ ແລະ ຊຸກຍູ້ສົ່ງເສີມການລົງທຶນຂອງເອກະຊົນທັງພາຍໃນຕ່າງປະເທດ ແລະ ພາຍໃນໃຫ້ຫຼາຍຂຶ້ນຕາມນະໂຍບາຍ 3 ເປີດ (ເປີດປະຕູ ເປີດສິ່ງກີດຂວາງ ແລະ ເປີດໃຈ) ດ້ວຍການອຳນວຍຄວາມສະດວກ ແລະ ແກ້ໄຂສິ່ງອຸດຕັນຂໍ້ຫຍຸ້ງຍາກຕ່າງໆດ້ວຍຄວາມເປັນເຈົ້າການສູງ ເອົາໃຈໃສ່ຄົ້ນຄວ້າ ແລະ ສົ່ງເສີມການຜະລິດເປັນສິນຄ້າ ການຜະລິດກະສິກຳສະອາດໃຫ້ຫຼາຍຂຶ້ນເພື່ອສະໜອງໃຫ້ແກ່ຄວາມຕ້ອງການຂອງຕະຫຼາດ ຊຶ່ງມີທ່າແຮງເພີ່ມຂຶ້ນຈາກເສັ້ນທາງລົດໄຟ ແລະ ທາງດ່ວນພາຍຫຼັງທີ່ສ້າງສຳເລັດແລ້ວ ຄຸ້ມ ຄອງການປູກພືດບໍ່ໃຫ້ໃສ່ສານເຄມີ ຢາຂ້າຫຍ້າ ເພື່ອຮັບປະກັນບໍ່ໃຫ້ມີສານເຄມີຕົກຄ້າງ ແລະ ໄຫຼລົງສູ່ແມ່ນ້ຳ ເອົາໃຈໃສ່ຕິດຕາມ ເຝົ້າລະວັງການລະບາດຂອງພະຍາດອະຫິວາໝູອາຟຣິກາ ແລະ ສັດຕູພືດ ເອົາໃຈໃສ່ການຕິດຕາມເຝົ້າລະວັງ ແລະ ແກ້ໄຂການລະ ບາດຂອງໄຂ້ຍຸງລາຍ ເອົາໃຈໃສ່ທຳລາຍແຫຼ່ງໜອນນ້ຳ ຊຶ່ງການປ້ອງກັນແຕ່ຫົວທີແມ່ນພາລະກິດຂອງໝົດທຸກຄົນ ໃຫ້ສືບຕໍ່ເອົາ ໃຈໃສ່ສະກັດກັ້ນ ແລະ ຕ້ານປາກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນຢາເສບຕິດ ການຄ້າຂາຍເຖື່ອນ ແລະ ອື່ນໆ ລວມທັງການສວຍໃຊ້ສື່ອອນລາຍຂອງກຸ່ມຄົນບໍ່ດີເພື່ອທັບຖົມໂຈມຕີແບ່ງແຍກຄວາມສາມັກຄີພາຍໃນພັກ ລັດ ແລະ ປະເທດຊາດຂອງພວກເຮົາ.

ພ້ອມນີ້ ໄດ້ຊີ້ນຳໃຫ້ແຂວງເອົາໃຈໃສ່ປະຕິບັດລະບອບແບບແຜນວິທີເຮັດວຽກແບບລວມສູນປະຊາທິປະໄຕ ສຽງສ່ວນໜ້ອຍຂຶ້ນກັບສຽງສ່ວນຫຼາຍ ຂັ້ນລຸ່ມປະຕິບັດຕາມຂັ້ນເທິງບົນພື້ນຖານການປຶກສາຫາລືເຊິ່ງກັນ ແລະ ກັນ ປັບປຸງຄວາມເຂັ້ມແຂງ ແລະ ຄວາມເປັນເອກະພາບພາຍໃນເພື່ອຮັບປະກັນໃຫ້ການພັດທະນາຂອງແຂວງວຽງຈັນ ບໍ່ຢຸດຈຶ້ງແຕ່ຕ້ອງພັດທະນາຂຶ້ນເລື້ອຍໆ.

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.