ນັກເຄື່ອນໄຫວຂອງໄທຮຽກຮ້ອງໃຫ້ລັດຖະບານໂຈະການຊື້ໄຟຟ້າຈາກ ສປປ ລາວ

0
11225

ເຂື່ອນໄຊຍະບູລີເລີ່ມມີການແລ່ນທົດລອງໃນວັນທີ 15 ກໍລະກົດທີ່ຜ່ານມາ ໂດຍອົງການບໍລິຫານໄຟຟ້າຂອງໄທ (EGAT) ໄດ້ເຫັນ ດີຊື້ໄຟຟ້າຈາກເຂື່ອນດັ່ງກ່າວ 95% ມາຮອດວັນທີ 26 ກໍລະກົດ 2019 ບັນດານັກເຄື່ອນໄຫວທີ່ມາຈາກແຕ່ລະແຂວງຂອງໄທທີ່ແມ່ນໍ້າຂອງໄຫຼຜ່ານໄດ້ຍື່ນຂໍ້ສະເໜີຫາໄອຍະການສານເພື່ອຮຽກຮ້ອງໃຫ້ອອກຄຳສັ່ງສະກັດກັ້ນແຜນຂອງອົງການ (EGAT) ຂໍ້ສະ ເໜີດັ່ງກ່າວມີຂຶ້ນພາຍຫຼັງທີ່ບັນດາແຂວງພາກທາງເໜືອຂອງໄທປະສົບກັບໄພແຫ້ງແລ້ງຢ່າງໜັກໃນອາທິດຜ່ານມາ ທັງນີ້ ຄະນະກຳມະການແມ່ນໍ້າຂອງໄດ້ໃຫ້ຮູ້ວ່າ ລະດັບນໍ້າໃນເດືອນມິຖຸນາ ແລະ ເດືອນກໍລະກົດໄດ້ຫຼຸດລົງໃນລະດັບຕໍ່າທີ່ສຸດ.

ບັນດານັກເຄື່ອນໄຫວສັງເກດວ່າ ລະດັບນໍ້າໃນຂົງເຂດກຳລັງຕົກຢູ່ໃນພາວະອັນຕະລາຍ ພວກເຂົາເວົ້າວ່າລະດັບນໍ້າທີ່ຫຼຸດລົງສາເຫດຕົ້ນຕໍແມ່ນເປັນຍ້ອນການກັກເກັບນໍ້າຂອງເຂື່ອນໄຊຍະບູລີ ຂະນະທີ່ບໍລິສັດ CH. Karnchang ຂອງໄທຊຶ່ງເປັນຜູ້ສ້າງເຂື່ອນໄຟ ຟ້າໄຊຍະບູລີຍັງບໍ່ທັນອອກມາມີຄຳເຫັນກ່ຽວກັບເລື່ອງນີ້ ເຂື່ອນດັ່ງກ່າວມີກຳລັງການຜະລິດ 1.220 ເມກາວັດ ແລະ ຈະເລີ່ມເປີດນຳໃຊ້ຢ່າງເປັນທາງການໃນເດືອນຕຸລາທີ່ຈະມາເຖິງນີ້ ຂະນະທີ່ນັກອະນຸຮັກ WWF ໃຫ້ຮູ້ວ່າ ການເຄື່ອນຍ້າຍຂອງປາ ແລະ ການຕອບສະໜອງທາງດ້ານອາຫານຈະໄດ້ຮັບຜົນກະທົບຈາກການຕັນເຂື່ອນ ດັ່ງນັ້ນ ເຂົາເຈົ້າຈຶ່ງໄດ້ຮຽກຮ້ອງໃຫ້ຢຸດຕິໂຄງການໄວ້ກ່ອນ ຈົນກວ່າຈະມີການຄົ້ນຄ້ວາກ່ຽວກັບຜົນກະທົບຄັກແນ່ແລ້ວຈຶ່ງໃຫ້ມີການເຄື່ອນໄຫວ.

​ເຂື່ອນໄຊຍະບູລີແມ່ນໄທເປັນຜູ້ສ້າງຢູ່ໃນລຳແມ່ນໍ້າຂອງຫ່າງຈາກຕົວເມືອງໄຊຍະບູລີພຽງ 30 ກີ​ໂລ​ແມັດໄປທິດຕາເວັນອອກ ຕາມແຜນຄາດຄະເນວ່າຈະສຳເລັດໃນເດືອນຕຸລາທີ່ຈະມາເຖິງນີ້ ເຂື່ອນແຫ່ງນີ້ຕ່າງກໍຖືກວິພາກວິຈານ ແລະ ໂຕ້ຖຽງກັນໄປມາຕັ້ງແຕ່ມື້ຊິເລີ່ມຕົ້ນກໍສ້າງ (ປີ 2012) ຊຶ່ງບັນດານັກເຄື່ອນໄຫວທາງດ້ານສິ່ງແວດລ້ອມໄດ້ກ່າວເຕືອນກ່ຽວກັບຜົນກະທົບຕໍ່ການດຳລົງຊີ ວິດຂອງປາ ລວມທັງລະບົບນິເວດ ແລະ ລະດັບຂອງແມ່ນ້ຳຂອງ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: laophattananews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.