ນັກກີລາເປຕັງລາວກົ້ມເກັບຖ້ວຍລາງວັນທ່າມກາງສາຍຕາຊາວໂລກ “ເລືອກປະຕິບັດ ຫຼື ມີເຫດຜົນອື່ນ”

0
2213

ທ່າມກາງຄວາມດີອົກດີໃຈຂອງປວງຊົນລາວຕໍ່ກັບຜົນງານທີ່ໂດດເດັ່ນຂອງນັກກີລາເປຕັງທີມຊາດລາວທີ່ສາມາດເອົາລາງວັນຮອງແຊັມໂລກມາໄດ້ເຖິງ 3 ລາຍການມາຈາກງານແຂ່ງຂັນກີລາເປຕັງຊິງແຊັມໂລກຄັ້ງທີ 17 ຊຶ່ງຈັດຂຶ້ນທີ່ປະເທດກຳປູເຈຍ ໃນລະ ຫວ່າງວັນທີ 18-24 ພະຈິກທີ່ຜ່ານມາ.

ປວງຊົນລາວດີໃຈໄດ້ບໍ່ພໍຂ້າມຄືນກໍໄດ້ຮັບຮູ້ເລື່ອງລາວທີ່ບໍ່ໜ້າຈະເກີດຂຶ້ນ ເມື່ອເຟສບຸ໊ກເພສ Lao su su ລາວ ສູ້ ສູ້ ໄດ້ນຳຄລິບວິດິໂອໃນພິທິມອບລາງວັນອອກມາເຜີຍແຜ່ເມື່ອວັນທີ 25 ພະຈິກ 2019 ຊຶ່ງໃນຄລິບດັ່ງກ່າວໄດ້ສະແດງໃຫ້ວ່າມີການມອບລາງ ວັນຕາມປົກກະຕິ, ແຕ່ສິ່ງທີ່ບໍ່ໜ້າຈະເກີດຂຶ້ນກັບການແຂ່ງຂັນລະດັບໂລກກໍຄື: ເມື່ອມາເຖິງການມອບລາງວັນໃຫ້ກັບນັກກີລາເປຕັງທີມຊາດລາວຄົນສຸດທ້າຍຄົນທີ່ມອບຖ້ວຍລາງວັນ (ປະທານສະຫະພັນກີລາເປຕັງໂລກ) ກໍໄດ້ວາງຖ້ວຍລາງວັນນັ້ນລົງພື້ນແທນຈະຍື່ນຖ້ວນລາງວັນໃຫ້ນັກກີລາຄືກັນກັບຄົນອື່ນໆແລ້ວທ່ານຜູ້ນັ້ນກໍຍ່າງກາຍໄປແບບບໍ່ແຄສາຍຕາຂອງໃຜທັງນັ້ນ, ເຫດການດັ່ງ ກ່າວຕ່າງກໍເກີດກະແສວິພາກວິຈານກ່ຽວກັບການປະພຶດ ແລະ ການສະແດງກິລິຍາແບບໄຮ້ຈັນຍາບັນຂອງຜູ້ກ່ຽວທີ່ມີຕຳແໜ່ງ ລະດັບສູງ.

ເມື່ອພາບປາກົດອອກມາແບບນັ້ນກໍເກີດສຽງວິພາກວິຈາກເຖິງຄວາມບໍ່ເໝາະສົມກັບພຶດຕິກຳດັ່ງກ່າວ, ມີຄົນເຂົ້າມາກົດ Like ກົດ Shared ແລະ ສະແດງຄວາມຄິດເຫັນໃນຄລິບນີ້ເປັນຈຳນວນຫຼາຍ ແຕ່ຄວາມຄິດເຫັນສ່ວນໃຫຍ່ແມ່ນເປັນການຕໍ່ວ່າກ່ຽວ ກັບພຶດຕິກຳວ່າເໝາະສົມ ຫຼື ບໍ່?, ເຮັດແບບນີ້ມັນເປັນການບໍ່ໃຫ້ກຽດນັກກີລາ ຫຼື ບໍ່?, ເຮັດແບບນີ້ເປັນການເລືອກປະຕິບັດສະ ເພາະບຸກຄົນໃດໜຶ່ງ ຫຼື ບໍ່? ແລະ ເຫດການແບບນີ້ຈະເກີດຂຶ້ນກັບນັກກີລາຄົນອື່ນໆອີກບໍ່?.

ສຳລັບເລື່ອງນີ້ບໍ່ຮູ້ວ່າຕໍ່ໄປຈະມີບົດສະຫຼຸບແນວໃດ? ແລະ ສະຫະພັນກີລາເປຕັງແຫ່ງຊາດລາວຈະອອກມາຖະແຫຼງຂ່າວກ່ຽວກັບເລື່ອງນີ້ ຫຼື ບໍ່? ລວມທັງປະທານສະຫະພັນເປຕັງໂລກຈະອອກມາເຄື່ອນໄຫວແນວໃດ? ຈະມີການຂໍໂທດກັບການກະທຳໃນຄັ້ງນີ້ ຫຼື ບໍ່? ແລະ ເຫດຜົນທີ່ແທ້ຈິງວ່າເປັນຫຍັງຕ້ອງປະຕິບັດກັບນັກກີລາຄົນນີ້? ເຮົາຕ້ອງຕິດຕາມກັນຕໍ່ໄປ.

ບົດໂດຍ: ພຸດສະດີ ລາວລີ
ແຫຼ່ງຂໍ້ມູນ:​ເພສ ລາວສູ້ສູ້

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.