ທ່ານເຄີຍເຫັນ ຫຼື ບໍ່? ເຮືອບິນຮົບລຸ້ນ “KF-X” ຂອງ ສ.ເກົາຫຼີ

0
771

ສ.ເກົາຫຼີ ໂຊຕົ້ນແບບເຮືອບິນຮົບ “KF-X” ຂະໜາດເທົ່າຂອງແທ້ທີ່ກຳລັງພັດທະນາຮ່ວມກັບອິນໂດເນເຊຍເປັນຄັ້ງທຳອິດ ພາຍ ຫຼັງທີ່ໂຄງການຜ່ານການທົດສອບຂັ້ນຕອນສຳຄັນດ້ານການອອກແບບ.

ສຳນັກຂ່າວຣອຍເຕີລາຍງານຈາກນະຄອນໂຊລ ສ.ເກົາຫຼີ ເມື່ອວັນທີ 15 ຕຸລາຜ່ານມາວ່າ KF-X ເຮືອບິນແຫ່ງອະນາຄົດຊຶ່ງກຳລັງຢູ່ໃນລະຫວ່າງການພັດທະນາໂດຍບໍລິສັດ ໂຄເຣຍ ແອໂຣສເປຊ ອິນດັສຕຣີສ ຫຼື KAI ເພື່ອໃຫ້ກາຍເປັນເຮືອບິນຮົບທາງເລືອກໃໝ່ທີ່ລາຄາຖືກກວ່າ ແລະ ລຶກລັບໜ້ອຍກວ່າ F-35 ຂອງອາເມຣິກາ ແລະ ກອງທັບ ສ.ເກົາຫຼີ ມີແຜນນຳ “KF-X” ເຂົ້າປະຈຳ ການທົດແທນເຮືອບິນຮົບຊຸດເກົ່າເກືອບທັງໝົດ ລວມທັງມີການຜະລິດເພື່ອສົ່ງອອກອີກດ້ວຍ.

ທັງນີ້ ແບບຈຳລອງ “KF-X” ຖືກນຳອອກມາສະແດງເມື່ອວັນທີ 14 ຕຸລາຜ່ານມາໃນງານເທສະການອະວະກາດ ແລະ ປ້ອງກັນປະເທດນາໆຊາດໂຊລ ຫຼື ເອເດັກຊ (ADEX)  ຊຶ່ງຈັດຂຶ້ນທີ່ເມືອງຊອງນຳ ແຂວງຄະຍອງກີ ທາງພາກຕາເວັນຕົກສຽງເໜືອ ຊຶ່ງກ່ອນໜ້ານີ້ ສ.ເກົາຫຼີ ໄດ້ສັ່ງຊື້ເຮືອບິນທັນສະໄໝລຸ້ນ F-35A ຈຳນວນ 40 ລຳຈາກອາເມຣິກາໂດຍມີກຳນົດສົ່ງຊຸດທຳອິດໃນປີນີ້ ຂະນະທີ່ການສັ່ງຊື້ F-35 ລວມທັງການພັດທະນາອາວຸດທັນສະໄໝອື່ນໆຂອງ ສ.ເກົາຫຼີ ຖືກປະນາມຈາກ ສປ ເກົາຫຼີ ປະເທດສັດຕູຮ່ວມສາຍເລືອດຊຶ່ງຍັງຢູ່ໃນສະຖານະຄູ່ເສິກສົງຄາມ.

ສ່ວນເຈົ້າໜ້າທີ່ບໍລິສັດ ເຄເອໄອ ເຜີຍວ່າ ບໍລິສັດມີແຜນເຮັດການທົດສອບພາກພື້ນດິນ ແລະ ທົດສອບການບິນ KF-X  ໃນປີ 2021 ແລະ 2022 ຕາມລຳດັບ ຂະນະທີ່ບັນນາທິການພູມີພາກອາຊີຂອງວາລະສານໃນວົງການອຸດສາຫະກຳການບິນໄດ້ກ່າວວ່າ ພາບໂດຍລວມຖືວ່າ ສ.ເກົາຫຼີ ມີຄວາມກ້າວໜ້າ ແຕ່ມີສັນຍານຄວາມທ້າທາຍຫຼາຍຢ່າງ ໃນໂຄງການພັດທະນາ KF-X  ຊຶ່ງລວມເຖິງຄວາມພະຍາຍາມຂອງອິນໂດເນເຊຍ ຫຸ້ນສ່ວນ ໂຄງການທີ່ຂໍເຈລະຈາໃໝ່ກ່ຽວກັບສັດສ່ວນຄ່າໃຊ້ຈ່າຍ ແລະ ການເຂົ້າສູ່ຕະ  ຫຼາດສົ່ງອອກ.

ສ.ເກົາຫຼີ ແລະ ອິນໂດເນເຊຍຕົກລົງກັນເມື່ອປີ 2013 ໃນການຮ່ວມກັນພັດທະນາ KF-X ມູນຄ່າໂຄງການ 7,5 ລ້ານລ້ານວອນ ໂດຍອິນໂດເນເຊຍຕົກລົງຈະອອກຄ່າໃຊ້ຈ່າຍ 20% ໃນປີຜ່ານມາ ຈາກຄວາມພະຍາຍາມຂໍເຈລະຈາໃໝ່ເພື່ອຫຼຸດແຮງກົດດັນຕໍ່ທຶນສຳຮອງລະຫວ່າງປະເທດ (ທຶນພາຍໃນປະເທດ) ແລະ ນັບແຕ່ນັ້ນເປັນຕົ້ນມາກໍໄດ້ສະເໜີປ່ຽນ ສ່ວນແບ່ງຄ່າໃຊ້ຈ່າຍເປັນການແລກປ່ຽນຊັບສິນ.

ໂຄງການ KF-X ຍັງຜະເຊີນອຸປະສັກສຳຄັນ ໂດຍ ສ.ເກົາຫຼີ ຕ້ອງພັດທະນາເຕັກໂນໂລຊີສຳຄັນຫຼາຍຢ່າງດ້ວຍຕົນເອງ ຫຼັງຈາກລັດ ຖະບານອາເມຣິກາປະຕິເສດທີ່ຈະອະນຸມັດໃຫ້ໃຊ້ລະບົບບາງຢ່າງເຊັ່ນ ເຣດ້າ ຊຶ່ງປັດຈຸບັນກຳລັງພັດທະນາໂດຍບໍລິສັດຮັນຮະວາ ຊິສເຕັມສ.

 

 

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.