ທົ່ວນະຄອນຫຼວງມີຜູ້ຕິດເຊື້ອໄຂ້ຍຸງລາຍ 2.000 ກວ່າກໍລະນີ

0
62

ປັດຈຸບັນ ສະພາບ​ການ​ແຜ່ລະບາດ​ຂອງ​ພະຍາດ​ໄຂ້​ຍຸງ​ລາຍ ຫຼື ໄຂ້​ເລືອດ​ອອກຢູ່ນະຄອນຫຼວງວຽງຈັນ​ນັບ​ແຕ່ຕົ້ນ​ເດືອນ​ມັງກອນຫາ ຕົ້ນ​ເດືອນກໍລະກົດ 2019 ມີຜູ້ຕິດເຊື້ອທັງໝົດ 2.018 ກໍລະນີ ເສຍຊີວິດແລ້ວ 6 ກໍລະນີ ທຽບໃສ່ປີ 2018 ຜ່ານມາແມ່ນເພີ່ມຂຶ້ນຫຼາຍກວ່າ 1.000 ກໍລະນີ ຂະນະທີ່ທົ່ວ​ປະ​ເທດມີ​ຜູ້​ຕິດ​ເຊື້ອ​ໄຂ້​ເລືອດ​ອອກ  10.000 ກວ່າກໍລະນີ ​ເສຍ​ຊີວິດແລ້ວ 25 ກໍລະນີ.

ທ່ານ ນາງ ໄຊພອນ ນັນທະພອນ ຫົວໜ້າພະແນກສາທາລະນະສຸກນະຄອນຫຼວງວຽງຈັນ ໄດ້ລາຍໃຫ້ຮູ້ໃນວັນທີ 4 ກໍລະກົດ 2019 ນີ້ວ່າ ເມືອງທີ່ມີການແຜ່ລະບາດຫຼາຍກວ່າໝູ່ຢູ່ນະຄອນຫຼວງວຽງຈັນແມ່ນເມືອງໄຊທານີ ມີຜູ້ຕິດເຊື້ອທັງໝົດ 674 ກໍລະນີ ເສຍຊີວິດ 2 ກໍລະນີ ເມືອງໄຊເສດຖາ 367 ກໍລະນີ (ບໍ່ມີກໍລະນີເສຍຊີວິດ) ເມືອງສີໂຄດຕະບອງ 211 ກໍລະນີ (ບໍ່ມີກໍລະນີເສຍຊີວິດ) ເມືອງຫາດຊາຍຟອງ 187 ກໍລະນີ (ບໍ່ມີກໍລະນີເສຍຊີວິດ) ເມືອງສີສັດຕະນາກ 185 ກໍລະນີ ເສຍຊີວິດ 2 ກໍລະນີ ເມືອງຈັນທະບູລີ 124 ກໍລະນີ (ບໍ່ມີກໍລະນີເສຍຊີວິດ) ເມືອງສັງທອງ 107 ກໍລະນີ ເສຍຊີວິດ 1 ກໍລະນີ ເມືອງນາຊາຍທອງ 88 ກໍລະນີ ເສຍຊີວິດ 1 ກໍລະນີ ແລະ ເມືອງປາກງື່ມ 75 ກໍລະນີ (ບໍ່ມີກໍລະນີເສຍຊີວິດ).

ທ່ານ ນາງ ໄຊພອນ ນັນທະພອນ ຍັງໄດ້ຮຽກຮ້ອງໃຫ້ທົ່ວ​ສັງຄົມກໍ​ຄື​ປະຊາຊົນ​ລາວ​ບັນດາ​ເຜົ່າໃນ​ຂອບ​ເຂດ​ທົ່ວ​ປະ​ເທດໃຫ້​ເອົາ​ໃຈ​ໃສ່​ປ້ອງ​ກັນ​ຕົວ​ເອງ ຫຼື ຫຼີກ​ລ້ຽງ​ບໍ່​ໃຫ້​ຖືກ​ຍຸງ​ກັດດ້ວຍການ​ນອນ​ໃນ​ມຸ້ງ ຖ້າຫາກ​ມີ​ອາການ​ເປັນ​ໄຂ້ກໍ​ໃຫ້​ຮີບ​ຮ້ອນ​ໄປ​ຫາ​ແພດ​ໝໍເພື່ອ​ປິ່ນປົວ​ໃຫ້​ທັນ​ການ ພ້ອມ​ກັນ​ນັ້ນ ກໍ​ໃຫ້​ເປັນ​ເຈົ້າ​ການຈັດ​ຕັ້ງ​ປະຕິບັດທຳລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍທີ່​ເປັນ​ພາຫະນະ​ນຳ​ເຊື້ອ ​ໂດຍການ​ອະນາ​ໄມ​ສິ່ງ​ແວດ​ລ້ອມ​ອ້ອມ​ເຮືອນ ບໍ່​ໃຫ້​ມີ​ນ້ຳຂັງ​ຢູ່​ຕາມ​ກະ​ໂປະ ກະ​ປ໋ອງ ຢາງ​ຕີ​ນລົດ ​ແລະ ອື່ນໆ ພ້ອມນັ້ນ ກໍໃຫ້​ເພີ່ມ​ທະວີຈັດ​ຕັ້ງ​ປະຕິບັດ​ຫຼັກການ 5 ປໍຂອງ​ກະຊວງ​ສາທາລະນະ​ສຸກ​ວາງ​ອອກຢ່າງ​ເຄັ່ງ​ຄັດກໍຄື  ປິດ (ປົກ​ປິດ​ພາ​ສະ​ນະ​ທີ່​ກັກ​ເກັບ​ນ້ຳ​ທັງ​ໃນ ​ແລະ ນອກ​ເຮື​ອນບໍ່​ໃຫ້​ຍຸງ​ລາຍ​ມາ​ໄຂ່​ໃສ່)  ປ່ຽນ (ປ່ຽນ​ນ້ຳ​ໃນ​ພາ​ສະ​ນະ​ທີ່​ກັກ​ເກັບ​ນ້ຳ​ເຊັ່ນ ​ເຕົ້າ​ດອກ​ໄມ້ ນ້ຳ​ຮອງ​ຕີ​ນຕູ້ ​ແລະ ອື່ນໆ) ປ່ອຍ (ປ່​ອຍປາ​ຫາງ​ຍົກ​ຍຸງ ເພື່ອ​ກິນ​ໜອນ​ນ້ຳ) ປັບປຸງ (ປັບປຸງ​ສິ່ງ​ແວດ​ລ້ອມ​ອ້ອມ​ເຮືອນໃຫ້​ສະອາດ​ເປັນ​ປະຈຳ​ທຸກ​ອາທິດ) ​ແລະ ປະຕິບັດ​ໃຫ້ເປັນນິໃສທຸກອາທິດ.

 

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.