ຕົ້ນປີ 2020 ຄ່າກະແສໄຟຟ້າລາຄາຈະຫຼຸດ 50% ສຳລັບຄອບຄົວທີ່ມີລາຍຮັບຕໍ່າ

0
436

ມາຮອດປັດຈຸບັນລັດຖະບານແຫ່ງ ສປປ ລາວ ກໍຄືກະຊວງພະລັງງານ ແລະ ບໍ່ແຮ່ ຍັງບໍ່ທັນສາມາດປັບປຸງລາຄາກະແສໄຟຟ້າໃຫ້ຢູ່ໃນລະດັບດຽວກັນໄດ້ຄື 700 ກີບຕໍ່ກິໂລວັດໂມງ ແລະ ນະໂຍບາຍຫຼຸດຄ່າກະແສໄຟຟ້າ 50% ສຳລັບຄອບຄົວທີ່ມີລາຍຮັບຕໍ່າ, ເນື່ອງຈາກມີຫຼາຍຢ່າງທີ່ຈະຕ້ອງໄດ້ມີການປັບປຸງຄືນໃໝ່ໃຫ້ມີຄວາມເໝາະສົມ ແລະ ສອດຄ່ອງກັບສະພາບຕົວຈິງ ຊຶ່ງຖ້າຫາກສຳ ເລັດຄາດວ່າຈະປະກາດໃຊ້ໃນໄວໆນີ້.

ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ສໍາພາດຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມ ລັດຖະບານເປີດກວ້າງຄັ້ງທີ II ຊຶ່ງຈັດຂຶ້ນຢູ່ນະຄອນຫຼວງວຽງຈັນໃນວັນທີ 19-20 ທັນວາຜ່ານມາວ່າ: ລັດຖະບານໄດ້ສຶກສາລາ ຄາຄ່າກະແສໄຟຟ້າໃໝ່ນັບແຕ່ປີ 2017 ເປັນຕົ້ນມາ, ໂດຍໄດ້ຮັບການສະໜັບສະໜູນຈາກທະນາຄານໂລກເພື່ອຄົ້ນຄວ້າວ່າລາຄາໃດມີຄວາມເໝາະສົມຕໍ່ຊີວິດການເປັນຢູ່ຂອງປະຊາຊົນໃນປັດຈຸບັນ ໂດຍສົມທຽບທາງດ້ານການເງິນທີ່ກູ້ຢືມມາພັດທະນາ, ແນ່ ນອນຖ້າກໍານົດຄ່າກະແສໄຟຟ້າຕາມການສຶກສາຂອງທະນາຄານໂລກຈະມີຜົນກະທົບຕໍ່ປະຊາຊົນຢ່າງຫຼວງຫຼາຍເນື່ອງຈາກມີລາຍຮັບຕ່ຳ.

ດັ່ງນັ້ນ, ກະຊວງພະລັງງານ ແລະ ບໍ່ແຮ່ ດ້ເປັນເຈົ້າການໃນການສຶກສາຄ່າໄຟຟ້າຕື່ມ ໂດຍແຕ່ງຕັ້ງຄະນະລະດັບຊາດທີ່ມີຫຼາຍຂະ ແໜງການກ່ຽວຂ້ອງເຂົ້າຮ່ວມເພື່ອຮັບຜິດຊອບວຽກງານນີ້. ຊຶ່ງຜ່ານມາແຜນປັບປຸງລາຄາຄ່າກະແສໄຟຟ້າໃນລາຄາດຽວ 700 ກີບຕໍ່ກິໂລວັດໂມງໄດ້ເອົາເຂົ້າຄົ້ນຄວ້າໃນກອງປະຊຸມນາຍົກ-ຮອງນາຍົກ ແລະ ກອງປະຊຸມລັດຖະບານເປີດກວ້າງຄັ້ງທີ I ມາແລ້ວໃນເດືອນມິຖຸນາ 2019 ຜ່ານມາ.

ລັດຖະມົນຕີກະຊວງພະລັງງານ ແລະ ບໍ່ແຮ່ໃຫ້ຮູ້ອີກວ່າ: ຫຼັງຈາກນຳເອົາແຜນປັບປຸງລາຄາຄ່າກະແສໄຟຟ້າໃນລາຄາດຽວ 700 ກີບຕໍ່ກິໂລວັດໂມງເຂົ້າຄົ້ນຄວ້າຢູ່ກອງປະຊຸມລັດຖະບານເປີດກວ້າງຄັ້ງທີ I ຂະແໜງພະລັງງານ ແລະ ບໍ່ແຮ່ໄດ້ນໍາເອົາແຜນປັບປຸງລາຄາຄ່າກະແສໄຟຟ້ານີ້ໄປເຜີຍແຜ່ໃຫ້ສັງຄົມຮັບຮູ້ເຂົ້າໃຈ, ພ້ອມທັງໄດ້ປັບປຸງຕາມຂໍ້ສະເໜີຕ່າງໆຄືນໃໝ່. ປັດຈຸບັນພວມຢູ່ໃນຂັ້ນຕອນສະຫຼຸບສັງລວມການປັບປຸງໃໝ່ເພື່ອສະເໜີຕໍ່ຄະນະລັດຖະບານຄົ້ນຄວ້າພິຈາລະນາການປັບປຸງຄ່າກະແສໄຟຟ້າໃໝ່ອີກເທື່ອໜຶ່ງ. ຊຶ່ງກະຊວງພະລັງງານ ແລະ ບໍ່ແຮ່ຕ້ອງການທົດລອງນໍາໃຊ້ການເກັບຄ່າກະແສໄຟຟ້າໃໝ່ໃນລາຄາດຽວແຕ່ຕ້ອງພິຈາ ລະນາໃຫ້ເປັນລາຄາທີ່ເໝາະສົມ ແລະ ຍຸຕິທໍາທີ່ສຸດສໍາລັບຜູ້ທີ່ໃຊ້ໄຟຟ້າຫຼາຍ ແລະ ໃຊ້ໄຟຟ້າໜ້ອຍ.

ຢ່າງໃດກໍຕາມ ຫຼັງຈາກການສັງລວມຂໍ້ຄິດເຫັນ ຫຼື ການປັບປຸງລາຄາຄ່າກະແສໄຟຟ້າໃໝ່ສໍາເລັດແລ້ວກໍຈະໄດ້ລາຍງານຄະນະລັດ ຖະບານພິຈາລະນາ ແລະ ອະນຸມັດຕາມຄວາມເໝາະສົມ ແລະ ຄາດວ່າຈະໄດ້ຮັບການຈັດຕັ້ງປະຕິບັດຢ່າງເປັນທາງການໃນຕົ້ນປີ 2020.

ປັດຈຸບັນ ການຊົມໃຊ້ໄຟຟ້າປະເພດທີ່ຢູ່ອາໄສຢູ່ລາວມີ 6 ຂັ້ນ ຊຶ່ງແຕ່ລະຂັ້ນມີລາຄາທີ່ແຕກຕ່າງກັນ, ເລີ່ມຈາກລາຄາຕ່ຳສຸດ 348 ກີບຕໍ່ກິໂລວັດໂມງຈົນຮອດ 999 ກີບຕໍ່ກິໂລວັດໂມງ. ທັງນີ້ ປັດຈຸບັນຍັງບໍ່ທັນຮູ້ວ່າການປັບປຸງລາຄາຄ່າກະແສໄຟຟ້າໃໝ່ຢູ່ລາວ ທີ່ຄາດວ່າຈະນຳໃຊ້ຢ່າງເປັນທາງການໃນຕົ້ນປີ 2020 ຈະກໍານົດອອກມາໃນຮູບແບບໃດ?.

ຮຽບຮຽງບົດ: ພຸດສະດີ
ແຫຼ່ງຂໍ້ມູນ: laoedaily.com.la

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.