ດ່ານພາສີສາກົນຂົວມິດຕະພາບ III ຄາດຈະເກັບລາຍຮັບໝົດປີລື່ນແຜນ 11 ຕື້ກີບ

0
60

ດ່ານ​ພາ​ສີ​ສາກົນຂົວ​ມິດ​ຕະ​ພາບ III ເມືອງທ່າແຂກ ແຂວງຄຳມ່ວນ ໄດ້​ສຸມ​ໃສ່​ໃນ​ການ​ປະ​ຕິ​ບັດ​ໜ້າ​ທີ່​ວຽກງານວິຊາສະເພາະໃນ​ການ​ຈັດເກັບ​ລາຍ​ຮັບເຂົ້າງົບປະມານແຫ່ງລັດ ໂດຍສະເພາະໃນ 9 ເດືອນ​ປີ 2019 ສາມາດປະຕິບັດໄດ້ 200 ຕື້ກວ່າກີບ ເທົ່າ ກັບ 113,53% ທຽບໃສ່ແຜນການປີເທົ່າກັບ 79,47% ແລະ ຄາດຄະເນໝົດປີ 2019 ປະຕິບັດລາຍຮັບເຂົ້າງົບປະມານໄດ້ 104,40% ຄິດເປັນເງິນລື່ນແຜນການປະມານ 11 ຕື້ກວ່າກີບ ທ່ານ ສົມຫວັງ ສົມຈິນດາ ຫົວໜ້າດ່ານ​ພາ​ສີ​ຂົວ​ມິດ​ຕະ​ພາບ III ໄດ້ໃຫ້ຮູ້ວ່າ ປີ 2019 ໄດ້ຮັບໂຕເລກແຜນການ 252,70 ຕື້ກີບ ທຽບໃສ່​ແຜນ ​ປີ 2018 (271,71 ຕື້ກວ່າ​ກີບ) ເພີ່ມຂຶ້ນ 5,73% ກວມ​ອັດ​ຕາ​ສ່ວນ 21% ຂອງ​ລາຍ​ຮັບກອງ​ຄຸ້ມ​ຄອງ​ພາ​ສີ VI ແລະ ສະ​ເພາະ​ຢູ່​ແຂວງ​ຄຳ​ມ່ວນກວມ​ລາຍ​ຮັບ​ປະມານ 63,54%.

ຕະ​ຫຼອດ​ໄລ​ຍະ 9 ເດືອນທີ່​ຜ່ານ​ມາດ່ານ​ພາ​ສີ​ສາກົນຂົວ​ມິດ​ຕະ​ພາບ III ໄດ້​ສຸມ​ໃສ່​ໃນ​ການ​ປະ​ຕິ​ບັດ​ໜ້າ​ທີ່​ວຽກ​ງານ​ຕາມ​ກົດ​ໝາຍ​ທີ່​ໄດ້​ກຳ​ນົດ​ໄວ້ ​ເຜີຍ​ແຜ່​ບັນ​ດາ​ນິ​ຕິ​ກຳ​ຕ່າ​ງໆ​ເຂົ້າ​ໃນ​ວຽກ​ງານ​ຕົວ​ຈິງ​​ ເຮັດ​ໃຫ້​ການ​ຄຸ້​ມ​ຄອງ​​ພັກ​-ພະ​ນັກ​ງານ​ມີ​ຄວາມ​ສະ​ຫງົບ​ທາງ​ດ້ານ​ການ​ເມືອງ-​ແນວ​ຄິດ ​ມີ​ຄວາມອຸ່ນອ່ຽນທຸນທ່ຽງເຊື່ອໝັ້ນຕໍ່ການຊີ້ນຳໆພາຂອງພັກ ລະດັບຄວາມຮັບຮູ້ຂອງພະນັກງານສາມະຊິກພັກໄດ້ຮັບການປັບປຸງດີຂຶ້ນເທື່ອ​ລະ​ກ້າວ ແລະ ປະຕິບັດວຽກງານວິຊາສະເພາະດ້ວຍຄວາມບໍລິສຸດໂປ່ງໃສ ທັງເຮັດສຳເລັດໜ້າທີ່ຕາມມອບໝາຍ ການເກັບລາຍຮັບໃນ​ 9 ເດືອນ​ປີ 2019 ຜ່ານມາສ່ວນ​ໃຫຍ່​ໄດ້​ຈາກນໍ້າມັນ​ເຊື້ອ​ໄຟ ກວມ​ລາຍ​ຮັບ​ຢູ່ 16,61% ນໍາ​ເຂົ້າ​-ສົ່ງ​ອອກ ກວມ​ລາຍ​ຮັບ​ 54,25%.

ທ່ານ ສົມຫວັງ ສົມຈິນດາ ເນັ້ນຕື່ມວ່າ ການປະຕິບັດລາຍຮັບອີກ 3 ເດືອນທ້າຍປີ 2019 ຊຶ່ງຄາດ​ຄະ​ເນຈະສາມາດບັນລຸ​ລື່ນ​ແຜນ​ການປີ 11 ຕື້ກີບນັ້ນ ຄະນະດ່ານຕ້ອງໄດ້​ສຸມ​ໃສ່​ໃນ​ການ​ປະ​ຕິ​ບັດ​ໜ້າ​ທີ່​ວຽກງານວິຊາສະເພາະໃຫ້ວ່ອງໄວ ສືບຕໍ່ການຊີ້ນຳໆພາທາງດ້ານການເມືອງ-ແນວຄິດໃຫ້ພະນັກງານພາຍໃນດ່ານ ຄຸ້ມຄອງການກວດກາ ກວດ​ການຕິດຕາມການປະຕິບັດວຽກງານວິ ຊາສະເພາະ ເປັນຕົ້ນການສະຫຼຸບລາຍງານຕ້ອງຊັດເຈນ ທັນເວລາ ພ້ອມດຽວກັນນີ້ ກໍໄດ້ວາງມາດຕະການເພື່ອຮັບປະກັນໃນການຈັດຕັ້ງປະຕິບັດແຜນງົບປະມານໃຫ້ໄດ້ຮັບຜົນສຳເລັດ ເປັນຕົ້ນແມ່ນການປະຕິບັດຄໍາສັ່ງເລກທີ 15/ນຍ ໃຫ້ມີຄວາມຮັດກຸມ ຫຼີກລ້ຽງຊ່ອງຫ່ວາງການຮົ່ວໄຫຼ ຫຼື ບໍ່ສອດຄ່ອງກັບລະບຽບກົດໝາຍ ເອົາ​ໃຈ​ໃສ່ຄຸ້ມຄອງສິນຄ້າຜ່ານແດນສາກົນໃຫ້ໄປຕາມລະບົບ ແລະ ມາດຕະຖານການຂົນສົ່ງສາກົນ.

 

 

 

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.