ຈຳປາສັກຄາດຄະເນໃນປີນີ້ຈະມີນັກທ່ອງທ່ຽວເພີ່ມຂຶ້ນຫຼາຍກວ່າ 1.000 ຄົນ

0
88

ແຂວງຈຳປາສັກໄດ້ປະສົບຜົນສຳເລັດໃນການດຶງດູດນັກທ່ອງທ່ຽວໃຫ້ຫຼາຍຂຶ້ນໂດຍຜ່ານການບໍລິການທີ່ດີຂຶ້ນ ແລະ ຈຳນວນນັກທ່ອງທ່ຽວໃນປີນີ້ຄາດວ່າຈະມີຫຼາຍກວ່າ 1 ລ້ານຄົນ.

ທ່ານ ນາງ ມາລາ ຈັນທະລາມ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງກ່າວຕໍ່ໜັງສືພິມວຽງຈັນທາມເມື່ອບໍ່ດົນມານີ້ວ່າ: ແຂວງໄດ້ປັບປຸງມາດຕະຖານໂຮງແຮມ, ຮ້ານອາຫານ ແລະ ສະຖານທີ່ທ່ອງທ່ຽວທີ່ໄດ້ຮັບຄວາມນິຍົມສູງຈຸດປະສົງແມ່ນເພື່ອດຶງດູດນັກທ່ອງທ່ຽວໃຫ້ມີຈຳນວນເພີ່ມຂຶ້ນ, ພາຍຫຼັງທີ່ມີໂຕເລກຫຼຸດລົງໃນໄລຍະນໍ້າຖ້ວມເມື່ອທ້າຍເດືອນສິງ ຫາ ແລະ ຕົ້ນເດືອນກັນຍາທີ່ຜ່ານມາ.

ສະຖານທີ່ທ່ອງທ່ຽວທີ່ມີຊື່ສຽງໃນຈຳປາສັກປະກອບມີ: ສວນກາເຟປາກຊ່ອງ, ນໍ້າຕົກຕາດຄອນພະເພັງ, ວັດພູຈຳປາສັກ ແລະ ນໍ້າຕົກຕາດເຢືອງ.

ນໍ້າຕົກຕາດເຢືອງມີສິ່ງອຳນວຍຄວາມສະດວກຫຼາຍຢ່າງສຳລັບນັກທ່ອງທ່ຽວລວມທັງຮ້ານຂາຍຂອງທີ່ລະນຶກ ແລະ ຮ້ານອາຫານທີ່ມີທັງອາຫານລາວ, ໄທ ແລະ ອາຫານຝຣັ່ງ.

ບັນດາຮ້ານອາຫານສາມາດບັນຈຸຄົນໄດ້ປະມານ 250 ຄົນ ແລະ ອາຫານສ່ວນໃຫຍ່ແມ່ນໃຊ້ພືດຜັກປອດສານພິດ ຊຶ່ງຮັບຊື້ຈາກຊາວກະສິກອນທ້ອງຖິ່ນ, ສຳລັບລາຄາອາຫານແມ່ນເລີ່ມຕົ້ນຕັ້ງແຕ່ຈານ 15.000 ເຖິງ 95.000 ກີບ.

ສະຖານທີ່ທ່ອງທ່ຽວອື່ນໆພາຍໃນແຂວງຈຳປາສັກປະກອບມີ: ນໍ້າຕົກຕາດຄອນພະເພັງ ແລະ ຕາດຟານ ເປັນສິ່ງທີ່ໜ້າຕື່ນຕາຕື່ນໃຈ ແລະ ມີກິດຈະກຳຕ່າງໆເຊັ່ນ: ການຍ່າງປ່າ ແລະ ການຕັ້ງແຄັມ, ນັກທ່ອງທ່ຽວຍັງສາມາດພັກຜ່ອນຊົມຄວາມຂຽວສົດງົດງາມຂອງທຳມະຊາດ ແລະ ຊີວະນາໆພັນຫຼາກຫຼາຍຊະນິດ.

ທັງນີ້, ຕະຫຼອດປີແຂວງຈຳປາສັກເປັນເຈົ້າພາບຈັດງານເທສະການອາຫານລາວ, ງານວາງສະແດງສິນຄ້າໜຶ່ງເມືອງໜຶ່ງຜະລິດຕະ ພັນ (ODOP), ງານວາງສະແດງຜະລິດຕະພັນຜ້າໄໝ ແລະ ຝ້າຍລາວ, ຈັດງານປະກວດນາງງາມ, ການແຂ່ງຂັນກີລາ ແລະ ງານແຂ່ງຂັນຊ່ວງເຮືອປະຈຳປີ.

ນັກທ່ອງທ່ຽວຍັງສາມາດເພີດເພີນກັບວັດທະນະທຳທີ່ເປັນເອກະລັກສະເພາະ ລວມເຖິງຜະລິດຕະພັນປອດສານພິດຈາກພູພຽງບໍລະເວນ, ລວມທັງດື່ມກາເຟທີ່ປູກຢູ່ພູເຂົາໄຟທີ່ມີຊື່ສຽງ ແລະ ອື່ນໆທີ່ລໍຖ້າໃຫ້ບັນດາທ່ານມາສຳຜັດ.

ຮຽບຮຽງຂ່າວ: ພຸດສະດີ ລາວລີ
ແຫຼ່ງຂໍ້ມູນ: www.vientianetimes.org.la

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.