ສັ່ງຊື້ເຄື່ອງອອນລາຍແລ້ວຖືກໂກງ! ເສຍທັງເງິນ ແລະ ບໍ່ໄດ້ເຄື່ອງຕ້ອງເຮັດແນວໃດ?

0
700

ໃນຍຸກ 4,0 ຄົນສ່ວນໃຫຍ່ຫັນມານິຍົມຊື້ເຄື່ອງ ຫຼື ໃຊ້ບໍລິການຜ່ານອອນລາຍຫຼາຍຂຶ້ນ ເນື່ອງຈາກສະດວກສະບາຍພຽງປາຍນິ້ວສຳ ຜັດ ແລະ ການຊໍາລະກໍວ່ອງໄວໂດຍການຊຳລະຜ່ານໂມບາຍແບັງຄິງ, ແຕ່ຫຼາຍຄົນກໍຮູ້ດີວ່າໃນໂລກອອນລາຍປຽບດັ່ງດາບສອງຄົມ ມີທັງປະໂຫຍດ ແລະ ໂທດ. ນອກຈາກໃຫ້ຄວາມສະດວກສະບາຍແລ້ວມັນຍັງເປັນທາງໃຫ້ມິດຈາຊີບສາມາດໃຊ້ຫຼອກລວງຜູ້ອື່ນໄດ້ງ່າຍໆອີກດ້ວຍ, ຫຼາຍໆຄັ້ງທີ່ຄົນສ່ວນໃຫຍ່ຊຶ່ງສັ່ງເຄື່ອງທາງອອນລາຍມັກຖືກໂກງ ໂດຍສະເພາະແມ່ນໃຫ້ໂອນເງິນຄ່າເຄື່ອງໄປກ່ອນແຕ່ບໍ່ໄດ້ເຄື່ອງ ຫຼື ເຄື່ອງທີ່ໄດ້ຮັບບໍ່ຖືກຕ້ອງຕາມທີ່ສັ່ງຊື້.

ຫາກທ່ານຕົກເປັນຜູ້ເສຍຫາຍໃນກໍລະນີນີ້ສິ່ງທີ່ທ່ານຄວນເຮັດຄື: ລວບລວມຫຼັກຖານໃຫ້ໄດ້ຫຼາຍທີ່ສຸດແລ້ວນຳໄປແຈ້ງຄວາມດຳ ເນີນຄະດີ ແລະ ຕິດຕາມຄະດີຢ່າງຕໍ່ເນື່ອງ.

ທັງນີ້ ຈາກການສອບຖາມຂໍ້ມູນໄປທາງເຟສບຸ໊ກເພຈ ກົດໝາຍລາວ Law of Laos ໃຫ້ຮູ້ວ່າ: ມູນຄ່າສິນຄ້າ ຫຼື ການບໍລິການຖ້າຕໍ່າກວ່າ 500.000 ກີບແມ່ນບໍ່ສາມາດຟ້ອງທາງອາຍາໃນຖານສໍ້ໂກງໄດ້ ແຕ່ສາມາດຮ້ອງຟ້ອງທາງແພ່ງໄດ້, ຮ້ອງຟ້ອງເອົາເງິນຈໍານວນບໍ່ເກີນ 500.000 ກີບ, ຖ້າເກີນ 500.000 ກີບສາມາດຮ້ອງຟ້ອງດຳເນີນຄະດີໃນທາງອາຍາໄດ້ (ຕິດຄຸກ) ໃນສະ ຖານສໍ້ໂກງຊັບ. ການແຈ້ງຄວາມດຳເນີນຄະດີຖ້າມູນຄ່າເສຍຫາຍ 10.000.000 ກີບລົງມາແມ່ນສາມາດແຈ້ງຄວາມຕໍ່ເຈົ້າໜ້າທີ່ຕຳຫຼວດກຸ່ມ, ຖ້າມູນຄ່າບໍ່ເກີນ 300.000.000 ກີບແມ່ນສາມາດແຈ້ງຄວາມກັບເຈົ້າໜ້າທີ່ຕຳຫຼວດເມືອງ.

ໂອກາດທີ່ຈະໄດ້ເງິນຄືນ ຫຼື ບໍ່ນັ້ນມັນກໍຍັງມີຄວາມສ່ຽງ ເນື່ອງຈາກວ່າປົກກະຕິແລ້ວເມື່ອກຸ່ມຄົນບໍ່ດີດັ່ງກ່າວໄດ້ເງິນກໍມັກຈະຖອນເງິນອອກຈາກບັນຊີທັນທີ ແລະ ຄວາມຜິດຖານສໍ້ໂກງແບບນີ້ ດັ່ງນັ້ນ, ຈຶ່ງຂໍເຕືອນສະຕິທຸກຄົນທີ່ມັກຊື້ເຄື່ອງທາງອອນລາຍ ຫຼື ໃຊ້ບໍລິການຄວນກວດສອບໃຫ້ແນ່ໃຈກ່ອນວ່າຮ້ານຄ້າ ຫຼື ເພຈນັ້ນມີຕົວຕົນ ຫຼື ໜ້າເຊື່ອຖືໄດ້ສໍ່າໃດ ຫຼື ຖ້າຈະໃຫ້ປອດໄພກໍຄວນຊື້ໂດຍກົງກັບບໍລິສັດນັ້ນໆແມ່ນດີທີ່ສຸດ.

 

ບົດໂດຍ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.