ການໃຊ້ໄຟສຸກເສີນໃນເວລາຂັບລົດ ກໍລະນີໃຊ້ໄຟສຸກເສີນໄດ້ ແລະ ບໍ່ຄວນໃຊ້

0
1399

ໄຟສຸກເສີນ ຫຼື Emergency Light ມີຄວາມໝາຍໃຊ້ສະເພາະກໍລະນີລົດເປ່ເພ ຫຼື ມີເຫດສຸກເສີນເທົ່ານັ້ນ, ການໃຊ້ໄຟສຸກເສີນທີ່ຖືກຕ້ອງເປັນສິ່ງສຳຄັນຫຼາຍທີ່ຄົນຂັບລົດໃຫຍ່ຕ້ອງຮູ້, ເຊິ່ງສັງເກດເຫັນວ່າຍັງມີຫຼາຍຄົນໃຊ້ສັນຍານໄຟສຸນເສີນໃນເວລາຂັບລົດແບບຜິດໆ.

ໃນເດືອນແຫ່ງການຂັບຂີ່ປອດໄພ ກັບ ລາວໂພສ ພວກເຮົາຈິ່ງມີຂໍ້ມູນການໃຊ້ “ໄຟສຸກເສີນ” ທີ່ຖືກຕ້ອງມາແນະນຳຕໍ່ກັບທຸກທ່ານດັ່ງນີ້:

ກໍລະນີທີ່ບໍ່ຄວນເປີດສັນຍານໄຟສຸກເສີນ

  1. ໃນກໍລະນີທີ່ຕ້ອງຂ້າມທາງສີ່ແຍກທີ່ບໍ່ມີໄຟຈາລະຈອນ ແມ່ນບໍ່ຄວນເປີດໄຟສຸກເສີນ ເພື່ອເປັນການຂໍທາງ ເນື່ອງຈາກຜູ້ຂັບຮ່ວມທາງຈະເກີດຄວາມສັບສົນ ຜູ້ຂັບຂີ່ລົດທາງເບື້ອງຊ້າຍອາດຄິດວ່າທ່ານຈະລ້ຽວຊ້າຍ ແລະ ຜູ້ຂັບຂີ່ລົດທາງເບື້ອງຂວາກໍ່ອາດຄິດວ່າທ່ານຈະລ້ຽວຂວາ, ສຳລັບຄົນທີ່ຕ້ອງການໄປຊື່ແມ່ນບໍ່ຈຳເປັນຕ້ອງເປີດໄຟສຸກເສີນພຽງແຕ່ທ່ານຄ່ອຍຂັບຂີ່ຊື່ໄປຕາມປົກກະຕິ ເຂົາກໍ່ເຂົ້າໃຈແລ້ວວ່າທ່ານຕ້ອງການໄປທາງໜ້າ.
  2. ໃນກໍລະນີຝົນຕົກໜັກ ເຮັດໃຫ້ວິໄສທັດໃນການເບິ່ງເຫັນຂຸ່ນມົວ ບໍ່ຄວນເປີດໄຟສຸກເສີນ ແລະ ເປີດຄ້າງໄວ້ເປັນເວລາດົນ ເພາະເວລາທີ່ທ່ານຕ້ອງການປ່ຽນເລນຄົນທີ່ຂັບລົດມານຳຫຼັງອາດບໍ່ສັງເກດເຫັນວ່າທ່ານໃຊ້ໄຟລ້ຽວຮ່ວມ ແລະ ເຮັດໃຫ້ເກີດອຸບັດຕິເຫດໃນເວລາປ່ຽນເລນທາງ ຫຼື ລ້ຽວໄດ້.
  3. ທ່ານບໍ່ຄວນເປີດໄຟສຸກເສີນໃນກໍລະນີຈອດຊື້ເຄື່ອງນຳທາງ, ຈອດແຊ່ໄວ້ດົນໆຂ້າງທາງ ຫຼື ເປິດໄຟສຸກເສີນໃນເຂດເສັ້ນຫ້າມຈອດ.
  4. ການໃຊ້ໄຟສຸກເສີນແບບຕາມໃຈ ອາດເຮັດໃຫ້ລົດຄັນອື່ນທີ່ຂັບນຳຫຼັງລົດທ່ານມາເຂົ້າໃຈຜິດວ່າລົດຂອງທ່ານມີບັນຫາຕ້ອງການຄວາມຊ່ວຍເຫຼືອ ຈົນບາງຄັ້ງເຮັດໃຫ້ເກີດການຈະລາຈອນຕິດຂັດຕາມມາ.

ກໍລະນີທີ່ ເປີດສັນຍານໄຟສຸກເສີນໄດ້

  1. ເມື່ອລົດຂອງທ່ານເປ່ເພ ຫຼື ເກີດອຸບັດຕິເຫດ ທ່ານຄວນເປີດໄຟສຸກເສີນເພື່ອໃຫ້ຜູ້ອື່ນໄດ້ຮູ້ວ່າຕົນກຳລັງຕົກຢູ່ໃນພາວະສຸກເສີນ ເພື່ອໃຫ້ຄົນອື່ນລະວັງ ແລະ ຂັບລົດຫຼີກໄປທາງອື່ນ ເພື່ອປ້ອງກັນບໍ່ໃຫ້ເກີດອຸບັດຕິເຫດ.
  2. ເມື່ອພົບເຫັນເຫດການສຸກເສີນຢູ່ດ້ານໜ້າ ກໍລະນີດ້ານໜ້າເກີດມີອຸບັດຕິເຫດ ຫຼື ມີສິ່ງກີດຂວາງ ການເປີດໄຟສຸກເສີນໃນກໍລະນີນີ້ຈະເປັນການເຕືອນລົດຄັນທີ່ຂັບມານຳຫຼັງໃຫ້ຫຼຸດຜ່ອນຄວາມໄວລົງ.
  3. ໃນກໍລະນີຢຽບເບກກະທັນຫັນ ກໍ່ສາມາດເປີດໄຟສຸກເສີນໄດ້ ແຕ່ຕ້ອງເປັນເຫດສຸດວິໃສເທົ່ານັ້ນ.
  4. ກໍລະນີຕ້ອງການຄວາມຊ່ວຍເຫຼືອດ່ວນ ຫາກມີຜູ້ປ່ວຍກະທັນຫັນຢູ່ໃນລົດ ຄວນເປີດໄຟສຸກເສີນໄວ້ ແລະ ຈອດລົດແຄມທາງ. ຈາກນັ້ນກໍ່ຕິດຕໍ່ຂໍຄວາມຊ່ວຍເຫຼືອຈາກກູ້ໄພເພື່ອຮັບຄຳແນະນຳໃນການປະຖົມພະຍາບານເບື້ອງຕົ້ນທີ່ຖືກຕ້ອງຕາມກໍລະນີທີ່ເກີດຂຶ້ນ.

 

 

 

 

 

 

ຮຽບຮຽງບົດ: ບຸດສະດີ ສາຍນໍ້າມັດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.