ການນຳໃຊ້ເສັ້ນທາງໃນໄລຍະຈັດງານບຸນພະທາດຫຼວງ “ເສັ້ນທາງໃດຄວນໄປ-ທາງໃດຄວນຫຼີກເວັ້ນ”

0
863

ໃນງານບຸນນະມັດສະການພະທາດຫຼວງວຽງຈັນ ໃນປີ 2019, ພະແນກຕຳຫຼວດຈະລາຈອນນະຄອນຫຼວງວຽງຈັນ, ຈະວາງກໍາລັງຄຸມເຂັ້ມຮັກສາຄວາມເປັນລະບຽບຮຽບຮ້ອຍເພື່ອຮັບປະກັນຄວາມສະຫງົບ, ຄວາມປອດໄພຮອບດ້ານໃຫ້ແກ່ການນຳພັກ-ລັດ ແລະ ມວນຊົນນັກທ່ອງທ່ຽວພາຍໃນ ແລະ ຕ່າງປະເທດທີ່ມາທ່ຽວຫລີ້ນບຸນປະເພນີຂອງຊາດລາວເຮົາ, ທັງນີ້ ກໍເພື່ອໃຫ້ມີຄວາມເບີກບານມ່ວນຊື່ນ, ຄວາມສະຫງົບ, ປອດໄພທາງດ້ານຊີວິດ ແລະ ຊັບສິນ ທັງເຮັດໃຫ້ການສັນຈອນມີຄວາມສະດວກ ແລະ ຄ່ອງຕົວ.

ທ່ານ ເພັງສະຫວັນ ທຳມາບູນ ຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນກວ່າວ່າ: ເພື່ອເຮັດໃຫ້ງານບຸນນະມັດ ສະການພະທາດຫຼວງ ແລະ ງານວາງສະແດງສິນຄ້າທີ່ສູນການຄ້າລາວ-ໄອເຕັກປະຈຳປີ 2019 ມີບັນຍາການອັນເບີກບານມ່ວນ ຊື່ນ, ຮັບປະກັນຄວາມສະຫງົບ, ເປັນລະບຽບຮຽບຮ້ອຍ ແລະ ປອດໄພ ພະແນກຕຳຫຼວດຈະລາຈອນໄດ້ວາງແຜນຈັດກຳລັງປ້ອງ ກັນ ແລະ ອຳນວຍຄວາມສະດວກຢູ່ຕາມເສັ້ນທາງສາຍຕ່າງໆ ເປັນຕົ້ນຖະໜົນໄກສອນພົມວິຫານ, ຖະໜົນໂພນໄຊ, ຖະໜົນ 23 ສິງຫາ, ຖະໜົນໜອງບອນ, ຖະໜົນ T4, ຖະໜົນທາດຫຼວງ, ຖະໜົນກຳແພງເມືອງ ແລະ ຖະໜົນສາຍອື່ນໆ, ແນໃສ່ເຮັດໃຫ້ການສັນຈອນໄປ-ມາຂອງມວນຊົນມີຄວາມປອດໄພ ແລະ ສະດວກສະບາຍ.

ສຳລັບການນຳໃຊ້ເສັ້ນທາງໃນໄລຍະຈັດງານບຸນ, ລົດບັນທຸກທີ່ມາແຕ່ເສັ້ນທາງ 13 ເໜືອທີ່ມີຈຸດປະສົງຈະໄປເສັ້ນທາງ 13 ໃຕ້ມາ ຮອດ 3 ແຍກດົງໂດກໃຫ້ລ້ຽວຊ້າຍໄປຕາມເສັ້ນທາງໜອງບຶກ, ຮອດໄຟອຳນາດດົງໂດກໃຫ້ລ້ຽວຊ້າຍໄປຕາມຈຸດປະສົງ, ສະເພາະລົດບັນທຸກທີ່ມາແຕ່ເສັ້ນທາງ 13 ເໜືອທີ່ມີຈຸດປະສົງຈະໄປຂົວມິດຕະພາບໃຫ້ໃຊ້ເສັ້ນທາງໜອງບຶກຫາດົງໂດກອອກໃສ່ເສັ້ນທາງ 450 ປີໄປຫາຂົວມິດຕະພາບ, ລົດບັນທຸກທີ່ມາແຕ່ຂົວມິດຕະພາບມີຈຸດປະສົງໄປເສັ້ນທາງ 13 ໃຕ້ ໃຫ້ໃຊ້ເສັ້ນທາງ 450 ປີ ມາ ຮອດ 4 ແຍກໄຟອຳນາດດົງໂດກໃຫ້ລ້ຽວຂວາໄປທາງດອນໜູນ, ພາຫະນະທີ່ມາແຕ່ເສັ້ນທາງ 13 ໃຕ້, ເສັ້ນທາງເລກທີ 10 ຫຼືເສັ້ນທາງດອນໜູນ, ເສັ້ນທາງໄກສອນ ຖ້າບໍ່ມີຈຸດປະສົງມາທ່ຽວບຸນມາຮອດໄຟອຳນາດໜອງໜ່ຽງໃຫ້ລ້ຽວຊ້າຍໄປຕາມເສັ້ນທາງບ້ານໜອງໜ່ຽງອອກໃສ່ບ້ານວັງຊາຍໄປຕາມຈຸດປະສົງ ຫຼື ລ້ຽວຂວາອອກໃສ່ເສັ້ນທາງໂຮງໝໍ 150 ຕຽງ.

ສ່ວນລົດຂົນສົ່ງມວນຊົນ, ລົດຕຸກໆ, ຈຳໂບ້, ລົດໂດຍສານ ແມ່ນອະນຸຍາດໃຫ້ຈອດຊົ່ວຄາວເພື່ອສົ່ງຄົນໂດຍສານຕາມຈຸດທີ່ໄດ້ກຳນົດໄວ້ເຊັ່ນ: ເສັ້ນທາງຊ້າງເຜືອກ, ເຂດບ້ານຮ່ອງໄກແກ້ວ, ຕະຫຼາດທາດຫຼວງ, ສີສັງວອນ, ໂພນໄຊ, ປະຕູໄຊ, ໂພນສະອາດ ແລະ ຮ່ອມໂຮງຮຽນມັດທະຍົມໜອງສ້າງທໍ່ (ສະເພາະລົດໃຫຍ່).

ຂ່າວໂດຍ: ພຸດສະດີ ລາວລີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.