ກວດພົບພະຍາດອະຫິວາໝູອາຟຣິກາຢູ່ເມືອງທ່າປາງທອງ

0
728

​ແຂວງ​ສະຫວັນ​ນະ​ເຂດໄດ້ແຈ້ງ​ໃຫ້​ຮູ້​ວ່າ ປັດຈຸບັນໄດ້​ກວດ​ພົບພະຍາດອະຫິວາໝູອາຟຣິກາຢູ່ເຂດບ້ານແດນສະຕຶງ ແລະ ບ້ານພູນາງ ເມືອງທ່າປາງທອງ ​ພາຍຫຼັງ​ທີ່ຄະນະສະເພາະກິດພະແນກກະສິກໍາ ແລະ ປ່າໄມ້ແຂວງກໍຄືເມືອງທ່າປາງທອງໄດ້ຈັດໃຫ້ເປັນເຂດພື້ນທີ່ສີແດງ ແລະ ໄດ້ໃຊ້ມາດຕະການໃນການພົ່ນຢາຂ້າເຊື້ອຢູ່ບໍລິເວນບ້ານ ແລະ ຄອກສັດເພື່ອທໍາລາຍ​ເຊື້ອພະຍາດ ​ແລະ ໄດ້ທໍາລາຍໝູທີ່ສົງໃສ່ວ່າຕິດເຊື້ອຈໍານວນ 35 ໂຕ​ເພື່ອ​ນຳ​ເອົາ​ຕົວຢ່າງ​ໄປ​ວິ​ໄຈຕໍ່ໄປ.

ທ່ານ ຄໍາລຸຍ ຍາດຕິວົງ ຫົວໜ້າພະແນກກະສິກໍາ ແລະ ປ່າໄມ້ແຂວງສະຫວັນ​ນະ​ເຂດໄດ້​ໃຫ້​ສຳພາດ​ຕໍ່​ສື່​ມວນ​ຊົນ​​ໃນ​ວັນ​ທີ 9 ກໍລະກົດຜ່ານມາວ່າ ຜ່ານ​ການ​ວິ​ໄຈ​ພົບ​ວ່າໝູ​ຈຳນວນ​ດັ່ງກ່າວແມ່ນຕິດ​ເຊື້ອພະຍາດອະຫິວາໝູອາຟຣິກາແທ້ ຈາກນັ້ນກໍໄດ້ປະກາດເປັນເຂດເຝົ້າລະວັງທີ່ເປັນເຂດສີເຫຼືອງ ໃນນັ້ນ ລວມມີ 6 ບ້ານຄື ບ້ານອາຫໍ ນາເລົາ ແກ້ງພູມະລີ ນາປ່າຊາດ ເຊກື ແລະ ບ້ານໄຊສົມບູນ ພ້ອມທັງຈັດຕັ້ງການກວດກັກກັນໃນ 3 ຈຸດຄື ຈຸດບ້ານແກ້ງແກບ ນາຊະໂນ ແລະ ຈຸດບ້ານຫ້ວຍໄລ່ ແລະ ​ໄດ້​ແຕ່ງຕັ້ງຄະ ນະສະເພາະກິດເພື່ອຮັບມືກັບການລະບາດຢ່າງທັນທີທັນໃດ ຈາກນັ້ນກໍໄດ້ລົງສົມທົບກັບເມືອງເພື່ອວາງແຜນສະກັດກັ້ນ ແລະ ຄວບຄຸມການລະບາດ ໂດຍຕິດພັນກັບການສຶກສາອົບຮົມແນວຄິດການເມືອງໃຫ້ປະຊາຊົນໃນເຂດພື້ນທີ່ທີ່​ມີການລະບາດ ແລະ ບ້ານໃກ້ຄຽງໄດ້ຮັບຮູ້ກ່ຽວກັບໄພອັນຕະລາຍຮ້າຍແຮງຂອງພະຍາດດັ່ງກ່າວ.

ສຳລັບ​ມາດ​ຕະການ​ຕອບໂຕ້ແມ່ນ​ໄດ້​ດຳ​ເນີນ​ຢ່າງ​ເຂັ້ມ​ງວດ ​ໂດຍ​ສະ​ເພາະແມ່ນຕັ້ງຈຸດພົ່ນຢາຂ້າເຊື້ອໃສ່ພາຫະນະທຸກປະເພດທີ່ແລ່ນຜ່ານເຂົ້າອອກເຖິງ 6 ຈຸດ ຫ້າມບໍ່ໃຫ້ປະຊາຊົນນໍາເອົາໝູທີ່ລ້ຽງຢູ່ໄຮ່ນາຮົ້ວສວນຍ້າຍເຂົ້າມາລ້ຽງຢູ່ໃນບ້ານເດັດຂາດ ບໍ່ໃຫ້ຜູ້ປະກອບການ ຫົວໜ່ວຍທຸລະກິດ ນໍາເຂົ້າ-ສົ່ງອອກ ແລະ ເຄື່ອນຍ້າຍໝູຢ່າງເດັດຂາດ.

 

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.