ໄຊສົມບູນຈະສຸມໃສ່ພັດທະນາ 5 ທ່າແຮງເພື່ອຊຸກຍູ້ເສດຖະກິດ

0
1177

ແຂວງ​ໄຊ​ສົມບູນຈະສຸມ​ໃສ່ໃນການ​ພັດທະນາ 5 ທ່າ​ແຮງທີ່​ມີ​ຢູ່ພາຍ​ໃນ​ແຂວງຄື ກະສິກຳ ການທ່ອງທ່ຽວ ການພັດທະນາ​ພະລັງງານ​ນ້ຳ ພະລັງງານ​ບໍ່​ແຮ່ ​ແລະ ​ການ​ບໍລິການ​ທາງ​ຜ່ານ ​​ເພື່ອເປັນການຊຸກຍູ້​ເສດຖະກິດ​ໃຫ້​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ ​ແລະ ​ມີຄວາມສະຖຽນລະພາບ​ໃນ​ຕໍ່ໜ້າ.

ທ່ານ ຄຳ​ລຽງ ອຸທະ​ໄກສອນ​​ ເຈົ້າ​ແຂວງ​ໄຊ​ສົມບູນກ່າວໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ I ປີ 2019 ເມື່ອທ້າຍອາທິດຜ່ານມານີ້ທີ່ນະຄອນຫຼວງວຽງຈັນວ່າ  ການ​ພັດທະນາ​ເສດ​ຖະກິດ-ສັງຄົມ​ຂອງ​ແຂວງໃນ​ໄລຍະ 6 ​ເດືອນ​ຕົ້ນປີ ​ໂດຍ​ລວມ​ແມ່ນສາມາດ​ບັນລຸ​ໄດ້​ຕາມ​ແຜນການ​ທີ່​ລັດຖະບານ​ກຳນົດ​ໃຫ້ ​ແຕ່​ເນື່ອງ​ຈາກ​ວ່າແຂວງ​ໄຊ​ສົມບູນ​ຍັງ​ເປັນ​ແຂວງ​ທີ່​ມີຫຼາຍດ້ານ​ຫຍຸ້ງຍາກ ແລະ ​ເປັນ​ແຂວງ​ທີ່​​ຕັ້ງ​ໃໝ່ ດັ່ງນັ້ນ ການ​ພັດທະນາ​ທຸກ​ຢ່າງ​ພວມ​ເລີ່​ມຂຶ້ນຈຶ່ງ​ເຮັດ​ໃຫ້​ມີຫຼາຍບັນຫາ​ຫຍຸ້ງຍາກ ຕົ້ນຕໍ​ແມ່ນການຈັດ​​ເກັບ​ລາຍ​ຮັບ​ເຂົ້າງົບປະມານ​ ​ເພາະ​ໄຊ​ສົມບູນຍັງບໍ່ທັນ​ມີ​ຖານ​ລາຍ​ຮັບ ​ແລະ ​ໝັ້ນຄົງ​ຫຼາຍແຫ່ງຄືກັບແຂວງອື່ນໆ ​ເພື່ອ​ເຮັດ​ໃຫ້​ເສດຖະກິດ​ຂອງ​ແຂວງ​ສືບ​ຕໍ່​ຂະຫຍາຍຕົວ​ໂດຍ​ສະ​ເພາະ​ໃນ 6 ​ເດືອນ​ທ້າຍ​ປີ 2019 ​ແລະ ໃນ​ຕໍ່ໜ້າ ​ແຂວງ​ໄຊ​ສົມບູນ ​ຈະສຸມ​ໃສ່​ພັດທະນາ​ຂົງ​ເຂດ​ກະສິກຳຖື​ເປັນ​ທ່າ​ແຮງ​ໃຫຍ່ ​ແລະ ​ສຳຄັນທີ່​ກວມ​ທັງ​ການ​ປູກ-ການ​ລ້ຽງ ​ໂດຍ​ປັດຈຸ​ບັນ ​ແຂວງ​ໄດ້​ມີ​ການ​ໂຄສະນາ​ເພື່ອ​ດຶງ​ດູດ​ເອົາ​ນັກ​ລົງທຶນ​ທັງ​ພາຍ​ໃນ ​ແລະ ​ຕ່າງປະ​ເທດໃຫ້​ເຂົ້າມາ​ລົງທຶນໃນການ​ພັດທະນາ​ດ້ານ​ກະສິກຳ ​ເພາະວ່າ​ແຂວງ​ມີ​ພື້ນ​ທີ່​ຊຶ່ງ​ເໝາະ​ສົມ​ແກ່​ການ​ລົງທຶນ​ດ້ານ​ນີ້ ຂະນະດຽວກັນກໍຈະ​ສຸມ​ໃສ່​​ໃນການ​ພັດທະນາ​ໃຫ້ເປັນ​ແຂວງ​ທ່ອງ​ທ່ຽວເນື່ອງຈາກວ່າ ເປັນເຂດທີ່​ມີອາກາດ​ໜາວ​ເຢັນສົດ​ຊື່ນ ປອດ​​ໂປ່ງ ແລະ ມີແຫຼ່ງທຳ​ມະ​ຊາດ​ທີ່ສວຍ​ງາມ.

ປັດຈຸບັນ ​ແຂວງ​ໄຊ​ສົມບູນມີ​ແຫຼ່ງທ່ອງ​ທ່ຽວ​ທັງ​ໝົດ 74 ​ແຫ່ງທີ່​ຈະ​ສາມາດ​ພັດທະນາ​ໃຫ້​ເປັນ​ແຫຼ່ງທ່ອງ​ທ່ຽວ​ໄດ້ ນອກຈາກ​ນັ້ນ ຍັງ​ມີ​ແຫຼ່ງທ່ອງ​ທ່ຽວ​ທີ່​ເປັນ​ປະຫວັດສາດ​ຄື ​ເຂດ​ພູໝ​ອກ ແລະ ລ້ອງ​ແຈ້ງ ​ຊຶ່ງເປັນສະຖານ​ທີ່ລື​ຊື່​ດ້ານ​ການ​ປົດ​ປ່ອຍປະ​ເທດ​ຊາດ ​ແຕ່​ວ່າ​ມາ​ຮອດ​ປັດຈຸ​ບັນ​ສະຖານ​ທີ່​ເຫຼົ່ານັ້ນຍັງ​ບໍ່​ທັນ​ໄດ້​ຮັບ​ການ​ພັດທະນາ​ເທື່ອ ພ້ອມດຽວກັນນັ້ນກໍ​ຈະສຸມໃສ່ການພັດທະນາເຂື່ອນ​ພະລັງງານ​ໄຟຟ້າ ​ເພາະວ່າມີ​ທ່າ​ແຮງ​ທີ່​ສາມາດ​ສ້າງ​ເປັນ​ເຂື່ອນ​ໄຟຟ້າ​ພະລັງງານ​ນ້ຳ​ໄດ້ຫຼາຍ​ແຫ່ງ ຊຶ່ງ​ເກັບກຳ​ໄດ້​ມາ​ຮອດ​ດຽວ​ນີ້​ມີ​ແລ້ວ 26 ​ແຫ່ງ ສ້າງ​ສຳ​ເລັດ ​ແລະ​ ຜະລິດ​ໄຟຟ້າ​ແລ້ວ 6 ​ແຫ່ງ ກຽມ​ຈະ​ຜະລິດ​ໃນ​ເດືອນ​ສິງຫາ​ນີ້ 2 ​ແຫ່ງຄື ​ເຂື່ອນ​ໄຟຟ້າ​ນ້ຳ​ງຽບ 1 ​ແລະ ​ເຂື່ອນ​ໄຟຟ້າ​ນ້ຳ​ຝາຍ​ໃຫຍ່ ນອກຈາກ​ນັ້ນ ຍັງ​ມີ​ອີກຫຼາຍ​ແຫ່ງທີ່​ພວມ​ສືບ​ຕໍ່​ດຳ​ເນີນ​ການ​ກໍ່ສ້າງ ​ແລະ ​ສຶກສາສຳ​ຫຼວດຄວາມ​ເປັນ​ໄປ​ໄດ້.

ສຳລັບ​ທ່າ​ແຮງດ້ານການ​ພັດທະນາ​ທາງ​ດ້ານ​ພະລັງງານ​ບໍ່​ແຮ່ຊຶ່ງ​ຖື​ວ່າ​​ເປັນ​ອີກ​ໜຶ່ງ​ທ່າ​​ແຮງ​ທີ່​ນັກ​ລົງທຶນ​ທັງ​ພາຍ​ໃນ ​ແລະ​ ຕ່າງປະ​ເທດ​ໃຫ້​ຄວາມ​ສົນ​ໃຈ​ເຂົ້າມາ​ລົງທຶນ​ດ້ານ​ນີ້ ປັດຈຸ​ບັນໄດ້​ມີຫຼາຍບໍ່​ທີ່ໄດ້​ມີ​ການ​ດຳ​ເນີນ​ການ​ພັດທະນາ​​ແລ້ວ ​ເປັນຕົ້ນແມ່ນບໍ່​ຄຳ​ພູ​ເບ້ຍ ​ແລະ ​ບໍ່​ອື່ນໆ​ທີ່​ຕັ້ງ​ຢູ່​ພາຍ​ໃນ​ແຂວງ​ໄຊ​ສົມບູນ ນອກຈາກນັ້ນ ​ແຂວງໄຊສົມບູນກໍຈະ​ສຸມ​ໃສ່​ພັດທະນາໂດຍຫັນ​ຈາກ​ແຂວງ​ທາງ​ຕັນ ໃຫ້​ກາຍ​​​ເປັນ​ແຂວງ​ທາງ​ຜ່ານ ​ເນື່ອງ​ຈາກ​ວ່າ​ເປັນ​​ແຂວງ​ຕັ້ງ​ຢູ່​ໃຈກາງ ມາ​ຮອດ​ປັດຈຸ​ບັນການ​ທະລຸ​ເສັ້ນທາງ​ພື້ນຖານ​ໂຄງ​ລ່າງຍັງ​ບໍ່​ທັນ​ມີ​ຫຼາຍ​ ​ແລະ ​ໃນອະນາຄົດແມ່ນ​ຈະ​ສຸມ​ໃສ່​ພັດທະນາ​ພື້ນຖານ​ໂຄງ​ລ່າງ​ເພື່ອ​ເຮັດ​ໃຫ້​​ໄຊ​ສົມບູນ​ເປັນ​ແຂວງ​ບໍລິການ​ທາງ​ຜ່ານ ຫາກ​ວ່າ​ມີ​ການ​ທະລຸ​​ເສັ້ນທາງ​ຈາກ​ໄຊ​ສົມບູນ​ໄປ​ສູ່ແຂວງ​ຊຽງ​ຂວາງກໍຈະ​ເຮັດ​ໃຫ້​ບັນດາ​ແຂວງ​ພາກ​ເໜືອຜ່ານ​ໃສ່​ໄຊ​ສົມບູນ​ເຂົ້າສູ່​ນະຄອນຫຼວງວຽງ​ຈັນ.

ພ້ອມ​ນັ້ນຍັງ​ມີ​ແຜນ​ຈະ​ເປີດ​ ຫຼື ທະລຸເສັ້ນທາງອອກ​ຈາກ​ແຂວງໄປ​ໃສ່​ຕະຫຼາດວັງວຽງເພື່ອ​ກຽມ​ຮອງ​ຮັບ​ໂຄງການເສັ້ນ​ທາງ​ລົດ​ໄຟ​ລາວ-​ຈີນ ທີ່​ຈະ​ເປີດ​ໃຫ້​ບໍລິການ​ໃນ​ປີ 2021 ນີ້ ຊຶ່ງ​ນັບ​ວ່າ​ເປັນ​ທາງ​ໜຶ່ງ​ທີ່​ຈະ​​ເປັນ​ການ​ສົ່ງ​ເສີມ​ການ​ຜະລິດ​ເປັນ​ສິນຄ້າ​ຂອງ​ປະຊາ ຊົນ ຜະລິດ​ເພື່ອ​ສົ່ງອອກ​ໄປ ສປ ຈີນ ​ໂດຍ​ຜ່ານ​ທາງ​ລົດ​ໄຟ​ ລາວ-ຈີນ ອີກ​ດ້ານ​ໜຶ່ງແມ່ນ​ເປັນ​ການ​ດຶງ​ດູດ​ນັກ​ທ່ອງ​ທ່ຽວຈາກ​ວັງ​ວຽງ​ເຂົ້າສູ່​ແຂວງ​ໄຊ​ສົມບູນ ​ແລະ ​​ເຮັດ​ໃຫ້ບັນດາ​ແຂວງ​ພາກ​ເໜືອ​​ຜ່ານໄຊສົມບູນ​ເຂົ້າສູ່​ວຽງ​ຈັນ ຫຼື ອອກ​ສູ່​ທິດ​ຕາ​ເວັນ​ອອກ ຊຶ່ງຈະເຮັດ​ໃຫ້ການ​ບໍລິການ​ທາງ​ຜ່ານ ​​ແລະ ​ປະຊາຊົນ​ຜະລິດ​ສິນຄ້າ​ອອກ​ມາ​ແລ້ວ​ໄດ້​ຂາຍຊຶ່ງຈະ​ເປັນ​ການ​ເພີ່ມ​ລາຍ​ໄດ້​ໃຫ້​​ພໍ່​ແມ່​ປະຊາຊົນ​ພາຍ​ໃນ​ແຂວງໄດ້ອີກໜຶ່ງຊ່ອງທາງ.

 

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.