ເມື່ອວັນທີ 29 ເມສາ 2016 (ວັນສຸກ) ທີ່ຜ່ານມາ ບູ່ຣາຕິໂນ້ ໃນນາມປະທານບໍລິສັດ ຄລາຍແມັກຊ໌ມັລຕິມີເດຍ ທີ່ເປັນບໍລິສັດສື່ໂຄສະນາຄົບວົງຈອນ ແລະ ຮັບຈັດງານທຸກປະເພດ ພ້ອມດ້ວຍທີມງານ ມາມອບເຄື່ອງໃຫ້ກັບໂຮງຮຽນບ້ານກອງລໍ ເມືອງຄູນຄຳ ແຂວງຄຳມ່ວນ.
ເຄື່ອງມອບລວມມີ ພັດລົມຕິດເພດານ 6 ຫນ່ວຍພ້ອມສາຍໄຟ ອຸປະກອນຕິດຕັ້ງຄົບຊຸດ, ສີທາ 10 ຖັງ, ອຸປະກອນການຮຽນ ແລະ ອຸປະກອນການຫລິ້ນກິລາສຳລັບນັກຮຽນ 100 ກວ່າຄົນ ລວມມູນຄ່າກວ່າ 9,000,000 ກີບ. ພ້ອມນີ້, ໄດ້ມີແຟນລາຍການວິທະຍຸ FM 95 MHz ສົມທົບ ສາຍໄຟ, ຊຸດຢາປະຖົມພະຍາບານ, ເຂົ້າຫນົມຫລາກຫລາຍປະເພດຈຳນວນຫນຶ່ງມາໃຫ້ນ້ອງນຸ່ງລູກຫລານນັກຮຽນດັ່ງກ່າວ.
ນອກຈາກຈະໄປມອບເຄື່ອງແລ້ວຍັງໄດ້ເຮັດກິດຈະກຳສົ່ງຄວາມສຸກໃຫ້ນ້ອງໂດຍ ມີການຮ້ອງເພງໃຫ້ນ້ອງໆຟັງ ພ້ອມທັງຊ່ວຍທາສີໂຮງຮຽນໃຫ້ສວຍງາມອີກດ້ວຍ
ສຳລັບໂຮງຮຽນບ້ານຄູນຄຳ ມີນັກຮຽນທັງຫມົດ 184 ຄົນ ມີອະນຸບານ, ປະຖົມ ແລະ ກຳລັງເລີ່ມມີຊັ້ນມັດທະຍົມຕົ້ນ, ຕັ້ງຢູ່ໃກ້ກັບຖໍ້າກອງລໍ ສະຖານທີ່ທ່ອງທ່ຽວຍອດນິຍົມຂອງແຂວງຄຳມ່ວນ.
