ສຳນັກຂ່າວຕ່າງປະເທດໄດ້ລາຍງານວ່າ ຈາກກໍລະນີຄະດີສາວແອ ຖືກຈັບກຸມໃນຂໍ້ຫາລັກລອບຂົນເຮໂຣອີນເຂົ້າປະເທດອົດສະຕາລີ ເມື່ອວັນທີ 25 ມິຖຸນາ 2026 ທີ່ຜ່ານມາ.
ໃນວັນທີ 15 ກໍລະກົດ 2026, ເຈົ້າໜ້າທີ່ໄທສາມາດກັກຕົວກຸ່ມບຸກຄົນທີ່ມີຄວາມສຳຄັນໃນຄະດີໄດ້ ແລະ ຍັງສືບຕໍ່ປະສານການຂະຫຍາຍຜົນການສືບສວນກັບທາງການປະເທດອົດສະຕາລີ ຫາ ນາງ ເດຍ ເຊິ່ງເປັນຄົນໄທ ແລະ ເປັນຊື່ຂອງຜູ້ຖ້າຮັບພັດສະດຸປາຍທາງ ແລະ ກຸ່ມຄົນລາວ 3 ຄົນ ໄດ້ແກ່ ທ້າວ ສາຍັນ ບົວລະພາ, ນາງ ນັນ ບົວລະພາ ແລະ ທ້າວ ອຸ່ນ ເນົາວະລາດ ທີ່ມີໜ້າທີ່ສັ່ງການໃຫ້ລຳລຽງຢາເສບຕິດເຂົ້າສູ່ປະເທດໄທ. ໂດຍທັງ 3 ຄົນໄດ້ຫຼົບລີ້ພາຍໃນລາວ ທາງການໄທຈຶ່ງໄດ້ປະສານຄວາມຮ່ວມມືກັບເຈົ້າໜ້າທີ່ລາວ ໃຫ້ຊ່ວຍຕິດຕາມ, ກັກຕົວ ແລະ ສົ່ງມອບໃຫ້ທາງການໄທໄປດຳເນີນຄະດີ.
ຫຼ້າສຸດ, ທາງການລາວໄດ້ຢືນຢັນກັບທາງການໄທວ່າ ສາມາດກັກຕົວ ທ້າວ ສາຍັນ ແລະ ນາງ ນັນ ໄດ້ແລ້ວ, ສ່ວນທ້າວ ອຸ່ນ ຍັງຄົງສືບຕໍ່ເລັ່ງຕິດຕາມການກັກຕົວ.
ເຈົ້າໜ້າທີ່ໄທກ່າວວ່າ ສາເຫດທີ່ອາດຈະບໍ່ໄດ້ນຳຕົວຜູ້ຖືກຫາທັງ 2 ຄົນສົ່ງທາງການໄທໄປດຳເນີນຄະດີນັ້ນ ເນື່ອງຈາກຜູ້ຖືກຫາທັງ 2 ເປັນຜູ້ຕ້ອງຫາກໍລະນີສຳຄັນ ແລະ ຍັງມີຄະດີທີ່ກ່ຽວກັບຢາເສບຕິດທີ່ເກີດຂຶ້ນໃນປະເທດລາວອີກດ້ວຍ. ທາງການໄທ ແລະ ລາວ ຈຶ່ງມີຄວາມເຫັນຮ່ວມກັນວ່າ ຈະຕ້ອງສືບຕໍ່ຂະຫຍາຍຜົນຢູ່ປະເທດລາວ ເພື່ອສືບສວນ-ສອບສວນໄປໃຫ້ເຖິງຕົ້ນຕໍຂອງຂະບວນການທີ່ກ່ຽວຈ້ອງກັບກຸ່ມຄ້າຂາຍຢາເສບຕິດຂ້າມຊາດ.
ເຈົ້າໜ້າທີ່ໄດ້ລະບຸຕື່ມວ່າ ຈາກການສືບສວນຂໍ້ມູນຍ້ອນຫຼັງ 2-3 ປີ ພົບວ່າຜູ້ຖືກຫາທັງ 3 ຄົນຄື ທ້າວ ສາຍັນ, ນາງ ນັນ ແລະ ທ້າວ ອຸ່ນ ໄດ້ຮ່ວມກັນກັບຄູ່ຜົວເມຍ ທ້າວ ອຸທິດ ຄົນໄທ ແລະ ນາງ ທັດສະພອນ ຄົນລາວ ເຊິ່ງມີຄວາມກ່ຽວຂ້ອງກັບຢາເສບຕິດ ເຊັ່ນ ເຮໂຣອິນ ແລະ ຢາບ້າມາໂດຍຕະຫຼອດ. ໂດຍສະເພາະກໍລະນີຂອງ ທ້າວ ສາຍັນ ແລະ ທ້າວ ອຸ່ນ ທີ່ມີໜ້າທີ່ສັ່ງການໃຫ້ເຄືອຂ່າຍນຳເອົາຢາເສບຕິດຂ້າມຝັ່ງມາສົ່ງໃຫ້ເຄືອຂ່າຍໃນປະເທດໄທ.