ພະນັກງານໂຮງງານເກືອກາລີ ບ້ານດົງບອງ ເມືອງນາຊາຍທອງ ນະຄອນຫຼວງວຽງຈັນປະມານ 100 ກວ່າຄົນ ໄດ້ໂຮມໂຕກັນຮຽກຮ້ອງຄ່າໂຮງງານຈາກນາຍຈ້າງ ທີ່ເປັນຄົນຈີນ ພາຍຫຼັງທີ່ທາງໂຮງງານບໍ່ຈ່າຍຄ່າແຮງງານແກ່ເຂົາເຈົ້າມາໄດ້ 2 ເດືອນແລ້ວ.
ພະນັກງານຊາຍຜູ້ໜຶ່ງໄດ້ໃຫ້ສຳພາດແກ່ນັກຂ່າວພວກເຮົາວ່າ ທາງເຈົ້າຂອງໂຮງງານເກືອກາລີ ຊິໂນໄຮໂດຣ ບ້ານດົງບອງ, ເມືອງນາຊາຍທອງ, ນະຄອນຫຼວງວຽງຈັນ ບໍ່ຈ່າຍຄ່າແຮງງານແຕ່ຄົນງານມາແລ້ວ 2 ເດືອນ ໃນຂະນະດຽວກັນນັ້ນສຳລັບພະນັກງານທີ່ເປັນຄົນຈີນແມ່ນ ໄດ້ເງິນເດືອນເປັນປົກກະຕິ. ດັ່ງນັ້ນ, ມື້ວານນີ້ ວັນທີ 18 ມີນາ 2015 ຜູ້ອອກແຮງງານໂຮງງານເກືອດັ່ງກ່າວ ຈຶ່ງໄດ້ໂຮມໂຕກັນຮຽກຮ້ອງຄ່າແຮງງານ ໂດຍການບໍ່ຍອມເຮັດວຽກ ແລະເມື່ອບໍ່ເຮັດວຽກທາງໂຮງງານກໍໝາຍຂາດແລະຈະໄລ່ອອກ. ໂອກາດດັ່ງກ່າວພະນັກງານອອກແຮງງານ ຍັງເວົ້າວ່າຈະເອົາຊັບສິນໃນໂຮງງານອອກໄປຂາຍ ຖ້າຫາກບໍ່ໄດ້ຮັບຄ່າແຮງງານ ຫຼືເງິນເດືອນ. ແນວໃດກໍຕາມ ຫຼ້າສຸດມື້ນີ້ ວັນທີ 19 ມີນາ 2015 ທາງເຈົ້າຂອງໂຮງງານໄດ້ຈ່າຍຄ່າແຮງງານໃຫ້ພະນັກງານຢ່າງຄົບຖ້ວນ.
ພະນັກງານຜູ້ດັ່ງກ່າວຍັງກ່າວຕື່ມວ່າ ພະນັກງານສ່ວນຫຼາຍແມ່ນໄດ້ລາອອກຈາກໂຮງງານດັ່ງກ່າວ ພາຍຫຼັງໄດ້ຮັບຄ່າແຮງງານຄົບ ແລະໄດ້ຂ່າວວ່າທາງໂຮງງານຈະມີການເລີກຈ້າງພະນັກງານຕື່ມອີກ ພາຍຫຼັງທີ່ປະລິຍານແຮ່ທາດເກືອກາລີຫຼຸດລົງ. ແລະພະນັກງານຜູ້ນີ້ໄດ້ຢ້ຳວ່າ ນີ້ບໍ່ແມ່ນການປະທ້ວງ ພຽງແຕ່ເປັນການມາຮຽກຮ້ອງຄ່າແຮງງານ ພ້ອມກັນຊື່ໆ ເພາະຕ່າງຄົນຕ່າງຢາກໄດ້ຄ່າແຮງງານ ກໍເລີຍພາກັນມາສອບຖາມນຳເຈົ້າຂອງໂຮງງານ.