ມາຮອດຕອນນີ້ ຄົງຈະບໍ່ມີໃຜແລ້ວ ໃນປະເທດລາວທີ່ບໍ່ຮູ້ຈັກເພງ ເອີ້ນອ້າຍໃສ່ໝໍ້ໜຶ່ງ ເຊິ່ງເປັນບົດເພງທີ່ນອກຈາກທີຊ່ວງທຳນອງ ທີ່ມ່ວນອອນຊອນ ປະກອບກັບດົນຕີທີ່ແສນອ່ອນຊ້ອຍ ໜ້າຈັບໃຈແລ້ວ ເນື້ອໃນຂອງເພງກໍັຍັງສ່ອງແສງເຖິງ ວິຖີຊີວິດ ແລະປະເພນີຂອງຄົນລາວ ທີ່ເຄີຍປະຕິບັດມາແຕ່ບູຮານນະການ.
ນອກຈາກນັ້ນແລ້ວ ຄວາມເປັນເອກະລັກພິເສດ ທີ່ໂດດເດັ່ນບໍ່ຄືໃຜຂອງກະໂຕນັກຮ້ອງ ບໍ່ວ່າຈະເປັນສຽງຮ້ອງ, ເຄື່ອງແຕ່ງກາຍ ແລະກິລິກຍາທ່າທີ ລ້ວນແລ້ວແຕ່ສົ່ງເສີມໃຫ້ຄົນຕິດໃຈ ເຊິ່ງເວົ້າໄດ້ວ່າ ເບິ່ງຮູບຈະເລີນຕາ, ຟັງວາຈາຈະເລີນໃຈ ແລະເຫັນນິດໄສແລ້ວຈະເລີນຄົນ.
ຫຼ້າສຸດສາວ ມຸກດາວັນ ສັນຕິພອນ ນັກຮ້ອງບ້ານນາຊື່ດັງຂອງລາວ ໄດ້ອອກມາສະແດງຄວາມຂອບອົກຂອບໃຈ ຕໍ່ຜູ້ຟັງທຸກທ່ານ ແຟນເພງທຸກຄົນ ທີ່ຊ່ວຍສະໜັບສະໜຸນດ້ວຍການຟັງ ການເຊີນໄປສະແດງຮັບໃຊ້ ກໍຄືການຊື້ແຜ່ນສຽງຂອງຕົນ ແລະລວມທັງການເຂົ້າຟັງເພງຢູ່ໃນເວັບໄຊ Youtube ຈົນເຮັດໃຫ້ເພງ ເອີ້ນອ້າຍໃສ່ໝໍ້ໜຶ້ງ ມີຈຳນວນຜູ້ເຂົ້າຊົມສູງເກີນ 3,000,000 ເພຈວິວແລ້ວ ເຊິ່ງເມື່ອທຽບໃສ່ຈຳນວນພົນລະເມືອງລາວແລ້ວ ນັບວ່າເປັນປະຫວັດສາດທຳອິດຂອງວົງການເພງລາວ ໂດຍສະເພາະແມ່ນເພງ ທີ່ມີຍອດຜູ້ຊົມສູງທີ່ສຸດ ໃນໄລຍະນີ້.
