ທ່ອງທ່ຽວວັນນີ້ ເຮົາຈະພາທຸກຄົນໄປທ່ຽວທີ່ ເຮືອນຫີນ ສະຫວັນນະເຂດ ນອກຈາກຈະມີຄວາມງາມ ແລ້ວຍັງມີຮ່ອງຮອຍທາງປະຫວັດສາດທີ່ໜ້າຄົ້ນຫາ ດ້ວຍບັນຍາກາດ ແລະ ສະຖາປະນິຍະກຳອັນເກົ່າແກ່ ຫາກທ່ານໃດເຄີຍໄດ້ມາສະຖານທີ່ແຫ່ງນີ້ ທ່ານຈະຮູ້ສຶກເໝືອນຫລຸດເຂົ້າໄປໃນຍຸກສະໄໝກ່ອນ 

ບ້ານເຮືອນຫີນ ຕັ້ງຢູ່ ເມືອງໄຊພູທອງ ແຂວງ ສະຫວັນນະເຂດ ໃຊ້ໄລຍະຫ່າງຈາກຕົວເມືອງ ປະມານ 10 km

ເຮືອນຫີນ ແມ່ນຮ່ອງຮອຍທາງດ້ານປະຫວັດສາດ ເຊິ່ງສ້າງຂຶ້ນໃນ ອານາຈັກສີໂຄດຕະບູນ ເຊິ່ງເປັນ ອານາຈັກທີ່ໜ້າເກງຂາມ ຂອງອານາຈັກ ໃກ້ຄຽງ. ໃນປີ ຄສ 557 ນັ້ນ ມີຂຸນອັງຄະຣາດ ແລະ ອົມມະຣາດ ສອງອ້າຍນ້ອງນໍາພາສ້າງ ປະສາດຫີນຂຶ້ນ ເພື່ອເປັນທີ່ເຄົາລົບກາບໄຫວ້ ຂອງສາສະໜາພາມ, ແຮງງານໃນການກໍ່ສ້າງ ແມ່ນໄດ້ເກນເອົາເຜົ່າຊົນຕ່າງໆ ມາຈາກ ອານາຈັກໂຍນົກເງິນຍາງ ມາເປັນຂ້າທາດເຂົາເຈົ້າຫຸບຫອບ ຄອບຄົວມາພ້ອມ ແລ້ວອາໃສຢູ່ ຕາມຖໍ້າຫີນຕ່າງໆ ເພື່ອຊົ້ນແດດຊົ້ນຝົນ, ສ່ວນຂຸນອັງຄະຣາດ ຜູ້ນໍາພາສ້າງ ໄດ້ເຈາະ ອຸໂມງ ຢູ່ກະໂຕພື້ນຜາສາດຫີນ, ກ້ອນຫີນທີ່ນໍາມາສ້າງ ໄດ້ເອົາສິ່ວເຈາະມາ ຈາກຫລາຍບ່ອນ ເຊິ່ງບ່ອນທີ່ໃຫຍ່ທີ່ສຸດ ແມ່ນຢູ່ບ່ອນເບື້ອງ ຕາເວັ້ນຕົກ ຫ່າງຈາກ ປະສາດຫີນ ປະມານ 1 ກິໂລແມັດ, ເອີ້ນວ່າ “ວັງເຮືອ” ຍ້ອນວ່າຮ່ອງຮອຍ ທີ່ສິ່ວເຈາະເອົາຫີນນັ້ນ ໄປສ້າງເຮືອນຫີນ ເຊິ່ງໃນປະຈຸບັນນີ້ ຍັງມີຮ່ອຍຮອງເປັນລັກສະນະ ຮູບຄ້າຍຄືເຮືອ ບາງຈຸດຍັງມີເສດເຫຼືອ ຈາກກ້ອນຫີນ ທີ່ເຈາະອອກມາ ແລະ ຍັງບໍທັນໄດ້ເອົາໄປສ້າງຍັງຍາຍ ເປັນຈໍານວນຫຼາຍ, ເພິ່ນສ້າງຈົນຮອດປີ ຄສ 700 ກໍ່ໜົດ ສະໄໜລາສະວົງ, ຍ້ອນມີ ລາຊວົງອື່ນ ມາຢຶດຄອງແທນ ເລີຍເຮັດໃຫ້ການກໍ່ສ້າງຢຸດຕິລົງ ສະນັ້ນ ຜາສາດຫີນ ຈຶ່ງມີຮູບຊົງບໍ່ສໍາເລັດ ຈົນເຖິງປະຈຸບັນນີ້.

ນອກຈາກຈະໄດ້ມາທ່ຽວແລ້ວ ຍັງໄດ້ມາເດີນຕາມຮອຍປະຫວັດນຳອີກ ຖ້າທ່ານໃດຍັງບໍ່ທັງໄດ້ເຄີຍມາສຳພັດບັນຍາກາດທີ່ ເຮືອນຫີນ ແຫ່ງນີ້ ຕ້ອງຫາໂອກາດລອງມາຈັກຄັ້ງໜຶ່ງໃນຊີວິດ

ການເດີນທາງຍັງບໍ່ສິ້ນສຸດ ໂອກາດໜ້າເຮົາຈະໄປທ່ຽວສະຖານທີ່ໃດ ຕ້ອງຕິດຕາມ