ສະຖານທີ່ອະນຸຮັກຊ້າງລາວ ອ່າງນ້ຳຕຽນ ເມືອງ ແລະ ແຂວງໄຊຍະບູລີ ນັບເປັນສະຖານທີ່ທ່ອງທ່ຽວ ທີ່ມີລັກສະນະເພື່ອການອະນຸຮັກຊ້າງ ແລະ ດູແລການດຳລົງຊີວິດຂອງຊ້າງ ໂດຍຜູກພັນວິຖີຊີວິດຄົນກັບຊ້າງ ແລະ ຍັງເປັນການອະນຸຮັກສິ່ງແວດລ້ອມຕື່ມອີກ.
ຕາມການລາຍງານຂອງຄະນະຮັບຜິດຊອບສູນອະນຸຮັກຊ້າງລາວ ອ່າງນ້ຳຕຽນ ເມືອງ ແລະ ແຂວງໄຊຍະບູລີ ຕໍ່ຜູ້ສື່ຂ່າວທ້ອງຖິ່ນໃນວັນທີ 19 ເມສາ 2016 ຜ່ານມາໃຫ້ຮູ້ວ່າ ສະຖານທີ່ອະນຸຮັກຊ້າງລາວ ເປັນໂຄງການມີເປົ້າໝາຍໃນການອະນຸຮັກຊ້າງ ແລະ ທຳມະຊາດ ສິ່ງແວດລ້ອມຈິ່ງກາຍເປັນແຫຼ່ງທ່ອງທ່ຽວທີ່ສໍາຄັນຂອງແຂວງໄຊຍະບູລີ ເພື່ອຕອບສະໜອງຕາມແນວທາງນະໂຍບາຍຂອງພັກ-ລັດ ໃນການພັດທະນາອຸດສາຫະກຳການທ່ອງທ່ຽວໃຫ້ກາຍເປັນເສົາຄ້ຳອັນສຳຄັນຂອງເສດຖະກິດແຂວງໄຊຍະບູລີ ແຫຼ່ງທ່ອງທ່ຽວອານຸຮັກຊ້າງ ແມ່ນໄດ້ພັດທະນາມາແຕ່ປີ 2011 ຫ່າງຈາກເທສະບານເມືອງໄຊຍະບູລີ ໄປທາງທິດຕາເວັນຕົກ 4 ກິໂລເເມັດ ມີເນື້ອທີ່ທັງໝົດ 105 ເຮັກຕາ ໃນນີ້ກິດຈະກຳທີ່ໜ້າສົນໃຈແມ່ນຂີ່ເຮືອຊົມທຳມະຊາດ ສະຖານທີ່ລ້ຽງຊ້າງນ້ອຍ ສະຖານທີ່ປະສົມພັນຊ້າງ ຫໍພິພິທະພັນຊ້າງ ການຮັກສາ ອະນຸຮັກຊ້າງ ແລະ ການເກືອຊ້າງ ເຊິ່ງມີທີ່ພັກ ແລະ ຮ້ານອາຫານໄວ້ບໍລິການຄົບຊຸດ.
