ອີງຕາມຂໍ້ມູນຂ່າວຈາກ ສຳນັກຂ່າວສານປະເທດລາວໃຫ້ຮູ້ວ່າ ມາຮອດວັນທີ 26 ມັງກອນ 2016 ນີ້ ສັດລ້ຽງຂອງປະຊາຊົນທາງພາກເໜືອໄດ້ລົ້ມຕາຍຈຳນວນຫຼາຍແລ້ວ ຍ້ອນທົນຕໍ່ສະພາບອາກາດໜາວຈັດຫິມະຕົກບໍ່ໄດ້. ໂດຍລາຍງານບອກວ່າ ກຸ່ມບ້ານໜອງຄ້າງ ແລະບ້ານສະເລີຍ ເມືອງຊຳເໜືອມີຄວາຍຕາຍແລ້ວ 6 ໂຕ ແລະງົວຕາຍ 11 ໂຕແລ້ວ ແລະມື້ວານນີ້ມີລາຍງານງົວຢູ່ບ້ານນາວີດ ເມືອງວຽງໄຊຕາຍ 2 ໂຕ ລວມທັງໝົດ ມີຄວາຍຕາຍຢ່າງໜ້ອຍ 6 ໂຕ ງົວຕາຍຢ່າງໜ້ອຍ 13 ໂຕ ໃນແຂວງຫົວພັນ. ໃນຂະນະທີ່ມີລາຍງານວ່າ ຢູ່ແຂວງຜົ້ງສາລີມີງົວ-ຄວາຍຕາຍແລ້ວ 3 ໂຕ ແລະສັດປີກອີກຫຼາຍກວ່າ 100 ໂຕ ແລະເຊື່ອວ່າຕົວຈິງແທ້ຍັງຈະມີສັດລ້ຽງຂອງປະຊາຊົນຕາຍຕື່ມອີກຈຳນວນຫຼວງຫຼາຍ.
ທ່ານ ດຣ ບຸນຂວາງ ຄໍາບຸນເຮືອງ ຫົວໜ້າກົມລ້ຽງສັດ ແລະ ການປະມົງໄດ້ລາຍງານວ່າ: ພາຍຫລັງພວກເຮົາໄດ້ຂໍ້ມູນເບື້ອງຕົ້ນຈາກແຕ່ລະແຂວງຢູ່ທາງພາກເໜືອພົບວ່າສັດສ່ວນໃຫຍ່ທີ່ລົ້ມຕາຍນັ້ນແມ່ນເປັນຜົນມາຈາກປະຊາຊົນລ້ຽງຕາມທໍາມະຊາດໂດຍປ່ອຍປະລະເລີຍໄປຕາມທົ່ງ ແລະ ປ່າດົງ ເມື່ອອາກາດໜາວເກີດຂຶ້ນສຸກເສີນເຮັດໃຫ້ປະຊາຊົນໄປຊອກຫາສັດລ້ຽງຂອງຕົນບໍ່ທັນ ປັດຈຸບັນນີ້ພວກເຮົາໄດ້ມີແຈ້ງການ ແລະ ໄດ້ແນະນໍາໃຫ້ປະຊາຊົນຕ້ອງປະຕິບັດຕາມແຕ່ລະຂັ້ນຕອນເບື້ອງຕົ້ນດັ່ງນີ້: ໃຫ້ປະຊາຊົນມັດງົວ-ຄວາຍໄວ້ໃນຄອກທີ່ເຮັດຝາບັງລົມໜາວ, ກ່ຽວຫຍ້າມາເກືອ ແລະດັງໄຟເພື່ອໃຫ້ຄວາມອົບອຸ່ນ; ສ່ວນຜູ້ລ້ຽງປາກໍຄວນນໍາເອົາກະຊັງລ້ຽງປາລົງໃຕ້ນໍ້າໃຫ້ເລິກໆເທົ່າຈະເປັນໄປໄດ້ເພື່ອຫລີກລຽງນໍ້າເຢັນເກີນໄປ ແລະ ສັດປີກກໍຄວນຂັງໄວ້ໃນຄອກພ້ອມເອົາສິ່ງຫຸ້ມຫໍ່ເພື່ອຮັກສາຄວາມອົບອຸ່ນຕະຫລອດໃນໄລຍະອາກາດໜາວ.
ຂອບໃຈຮູບຖ່າຍຈາກເພື່ອນໆ ທາງເຟສບຸກ