ຂປລ : ໃນວັນທີ 17 ມັງກອນນີ້, ຄະນະຜູ້ແທນສົມບູນກອງປະຊຸມໃຫຍ່ທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວ ປະກອບດ້ວຍ ຄະນະບໍລິຫານງານສູນກາງພັກສະໃໝທີ IX, ຄະນະຜູ້ແທນຈາກກຳລັງປະກອບອາວຸດ, ຈາກອົງການນິຕິບັນຍັດ, ຕຸລາການ, ກະຊວງ-ອົງການ, ຈາກອົງການສູນກາງພັກ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ, ຈາກກະຊວງໃນຂົງເຂດວັດທະນະທຳ-ສັງຄົມ ແລະ ການຕ່າງປະເທດ ແລະ ຈາກກະຊວງໃນຂົງເສດຖະກິດ ແລະ ຄະນະຜູ້ແທນຈາກບັນດາແຂວງໃນຂອບເຂດທົ່ວປະເທດ ເຊິ່ງນຳໂດຍ ສະຫາຍ ຈູມມາລີ ໄຊຍະສອນ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ຮ່ວມວາງພວງມາລາຢູ່ໜ້າອານຸສາວະລີນັກຮົບນິລະນາມ ແລະ ວາງກະຕ່າດອກໄມ້້ ທີ່ອານຸສອນສະຖານ ປະທານ ໄກສອນ ພົມວິຫານ.
ການວາງພວງມາລາ ແລະ ກະຕ່າດອກໄມ້ຄັ້ງນີ້ ແມ່ນໄດ້ຈັດຂຶ້ນກ່ອນກອງປະຊຸມໃຫຍ່ຄັ້ງທີ X ຂອງພັກ ທີ່ຈະໄຂຂຶ້ນຢ່າງເປັນທາງການ, ທັງນີ້ ເພື່ອເປັນການສະແດງຄວາມເຄົາລົບ ແລະ ຮູ້ບຸນຄຸນຕໍ່ວິລະບູລຸດ, ພະນັກງານນັກຮົບຜູ້ທີ່ເສຍສະຫລະຊີວິດເລືອດເນື້ອ ໃນພາລະກິດຕໍ່ສູ້ ປົດປ່ອຍຊາດຍາດເອົາເອກະລາດ ແລະ ຄວາມເປັນເອກະພາບມາໃຫ້ປະເທດຊາດ, ສ້າງເງື່ອນໄຂໃຫ້ປວງຊົນລາວທັງຊາດໄດ້ເສີມຂະຫຍາຍເຫື່ອແຮງ ສະຕິປັນຍາຂອງຕົນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງສີສີວິໄລຍິ່ງໆຂຶ້ນ
ແຫຼ່ງຂ່າວ: