ຂປລ. ຄະນະຜູ້ແທນກອງປະຊຸມໃຫຍ່ໄດ້ເດີນທາງເຖິງນະຄອນຫລວງວຽງຈັນເປັນທີ່ຮຽບຮ້ອຍແລ້ວ ໃນວັນທີ 16 ມັງກອນນີ້ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ທີ່ຈະໄຂຂຶ້ນເປັນທາງການໃນມໍ່ໆນີ້. ຂະນະທີ່ການຫ້າງຫາກະກຽມສິ່ງອໍານວຍຄວາມສະດວກຕ່າງໆ ເຊັ່ນ: ສະຖານທີ່ພັກເຊົາ,ອາຫານ, ໜ່ວຍງານບໍລິການແພດ, ການຮັກສາຄວາມປອດໄພ, ສະຖານທີ່ສູນຂໍ້ມູນຂ່າວສານສໍາລັບນັກຂ່າວ ແລະ ອື່ນໆແມ່ນສໍາເລັດ 100%. ໃນໂອກາດທີ່ຄະນະຜູ້ແທນເດີນ ທາງມາເຖິງນະຄອນຫລວງວຽງຈັນ, ກໍໄດ້ຖືກຮັບຕ້ອນຢ່າງອົບອຸ່ນຈາກການນໍາຂັ້ນສູງ, ພ້ອມສະແດງຄວາມຂອບໃຈ ແລະ ຊົມເຊີຍ ຕໍ່ຄະນະນໍາທີ່ເອົາໃຈໃສ່ ແລະ ເອື້ອອໍານວຍຄວາມສະດວກຕ່າງໆ.
ສະຫາຍ ເພັດສາຄອນ ຫລວງອະໄພ ເລຂາພັກ, ເຈົ້າແຂວງອຸດົມໄຊ ກ່າວວ່າ: ຕົນເອງມີຄວາມດີໃຈ ແລະ ພາກພູມໃຈຫລາຍທີ່ໄດ້ຮັບກຽດ ເຂົ້າຮ່ວມກອງປະຊຸມໃຫຍ່ຄັ້ງທີ X ຂອງພັກ ຄັ້ງນີ້ ເຊິ່ງບໍ່ພຽງແຕ່ເປັນການ ປະກອບສ່ວນ ດ້ານກໍາລັງວັງຊາເຮືອແຮງເທົ່ານັ້ນ ແຕ່ຫາກຈະເປັນການອຸທິດສະຕິປັນຍາ, ອຸດົມການຢ່າງສຸດກົນສຸດປາຍ ແລະ ຄວາມສາມາດບົ່ມຊ້ອນທີ່ມີຢູ່ເຂົ້າ ໃນພາລະກິດປົກຮັກສາ ແລະ ສ້າງສາປະເທດຊາດໃຫ້ມີຄວາມສີວິໄລ ແລະ ປະຊາຊົນບັນດາເຜົ່າ ໄດ້ຮັບຄວາມຜາສຸກຖ້ວນໜ້າ.
ພ້ອມນີ້ ສະຫາຍ ບຸນຕົ້ນ ຈັນທະພອນ ຮອງເລຂາພັກແຂວງຊຽງຂວາງ ກໍໄດ້ກ່າວວ່າ: ຫລາຍຊຸມປີຜ່ານມານັ້ນ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແກ້ໄຂຄວາມ ທຸກຍາກພາຍໃນແຂວງ ມີຖ່ວງທ່າພົ້ນເດັ່ນ ເຮັດໃຫ້ອັດຕາຄວາມທຸກຍາກ ທີ່ຕັ້ງເປົ້າໄວ້ໃຫ້ເຫລືອພຽງ 10% ແຕ່ການຈັດຕັ້ງປະຕິບັດຈິງນັ້ນພວກເຮົາເຮັດເກີນແຜນການ ແລະ ປັດຈຸບັນນີ້ມີພຽງແຕ່ 3% ເທົ່ານັ້ນ. ນີ້ໝາຍຄວາມວ່າ ກໍຍ້ອນພວກເຮົາຫັນເອົາມະຕິກອງປະຊຸມໃຫຍ່ຄັ້ງທີ IX ຂອງພັກ ຜ່ານມາເຂົ້າ ໃນຊີວິດຕົວຈິງເຮັດໃຫ້ປະຊາຊົນ ບັນດາເຜົ່າບໍ່ວ່າຈະຢູ່ເທສະບານ ກໍຄືເຂດຫ່າງໄກສອກຫລີກໄດ້ຖືເອົາການ ຜະລິດກະສິນກໍາເປັນສິນຄ້າ ໄປຄວບຄູ່ກັບທິດພັດທະນາເຊັ່ນ: ການຂະຫຍາຍໂຮງຮຽນ, ໂຮງໝໍ, ບໍລິການນໍ້າສະອາດ ແລະ ພື້ນຖານ ໂຄງລ່າງເຂົ້າເຖິງປະຊາຊົນ ແລະ ເຂດບ້ານຕ່າງໆ ມີຜົນສໍາເລັດຢ່າງຫລວງຫລາຍ. ສະນັ້ນ ພວກເຮົາໃນນາມຕາງໜ້າໃຫ້ປະຊາຊົນ, ພະນັກງານລັດຖະກອນ ແລະ ນັກຮຽນຮູ້ປັນຍາຊົນເຂົ້າຮ່ວມກອງປະຊຸມໃຫຍ່ຄັ້ງ X ຂອງພັກຄັ້ງນີ້ ກໍໄດ້ກະກຽມ ຄວາມພ້ອມທຸກໆດ້ານ, ໂດຍອີງໃສ່ຜົນການຈັດຕັ້ງປະຕິບັດມະຕິກອງປະຊຸມໃຫຍ່ IX ຂອງພັກ ຜ່ານມານັ້ນເພື່ອສືບຕໍ່ຜັນຂະຫຍາຍໃຫ້ເກີດດອກອອກຜົນ ແລະມີຜົນສໍາເລັດໃຫຍ່ຫລວງກວ່າເກົ່າ
ແຫຼ່ງຂ່າວ: