ຖ້າທ່ານຜູ້ອ່ານມີໂອກາດເດິນທາງໄປ ຫຼັກ20 ເມືອງຄຳເກີດ ແຂວງບໍລິຄຳໄຊ ໂດຍທາງລົດ ທ່ານຈະໄດ້ພົບເຫັນຮູບພາບທຳມະຊາດ ສອງຂ້າງທາງທີ່ສວຍສົດງົດງາມຢ່າງຫຼວງຫຼາຍ ໜຶ່ງໃນນັ້ນແມ່ນ ປ່າສະຫງວນ ຫິນໜາມໜໍ່ ພູຜາຜ່ານຕາມເສັ້ນທາງເລກ 8ອາ ໃນໄລຍະທີ່ຜ່ານເມືອງຄູນຄຳ ແຂວງຄຳມ່ວນ.
ລັດຖະບານລາວໄດ້ດຳເນີນການສະເໜີ ປ່າສະຫງວນແຫ່ງຊາດຫິນໜາມໜໍ່ ແຂວງຄຳມ່ວນ ກັບ UNESCO ເພື່ອຂໍຂື້ນທະບຽນເປັນມໍລະດົກໂລກໃນເນື້ອທີ 82,000 ເຮັກຕາ ຖ້າຫາກໄດ້ຮັບການພິຈາລະນາກໍ່ຈະເປັນມໍລະດົກໂລກທາງທຳມະຊາດແຫ່ງທຳອິດຂອງລາວ ເຊິ່ງເຂດດັ່ງກ່າວນັ້ນແມ່ນໄດ້ປະກາດໃຫ້ເປັນປ່າສະຫງວນແຫ່ງຊາດມາຕັ້ງແຕ່ປີ 1993.
ປັດຈຸບັນລັດຖະບານໄດ້ມີການຄຸມຄອງທີ່ດີ ເພື່ອກຽມຄວາມພ້ອມໃນການປະກາດໃຫ້ເປັນ ມໍລະດົກໂລກທາງທຳມະຊາດແຫ່ງທຳອິດຂອງປະເທດ ໂດຍໄດ້ຮັບການສະໜັບສະໜູນຈາກ ລັດຖະບານປະເທດເຢຍລະມັນຫຼາຍກວ່າ 6.3 ລ້ານເອີໂຣ ໃນໂຄງການອະນຸລັກແບບປະສົມປະສານ ແລະ ການບໍລິຫານຈັດການຊັບພະຍາກອນທຳມະຊາດ ແບບຍືນຍົງໃນເຂດປ່າສະຫງວນແຫ່ງຊາດຫິນໜາມໜໍ່ ທີ່ດຳເນີນການໂດຍ GIZ.
ປະເທດລາວນັບວ່າ ເປັນປະເທດທີ່ອຸດົມສົມບູນ ແລະສວຍງາມໄປດ້ວຍທຳມະຊາດ ນີ້ຄືຄວາມເອກອ້າງທະນົງໃຈຂອງຄົນລາວ ໃນຂະນະດຽວກັນຮູບພາບທຳມະຊາດ ຈຳນວນຫຼວງຫຼາຍກໍກຳລັງຈະຖືກບຸກເບີກທຳລາຍ ບໍ່ວ່າຈະດ້ວຍການພັດທະນາພື້ນຖານໂຄງລ່າງ, ການຖາກຖາງເພື່ອການກະສິກຳ ແລະລວມທັງການຕັດໄມ້ເປັນສິນຄ້າ ແລະຖ້າຫາກບໍ່ສາມາດສະກັດກັ້ນ ການຕັດໄມ້ທຳລາຍປ່າໄດ້ແລ້ວ ແຫຼ່ງທ່ອງທ່ຽວທຳມະຊາດກໍຄົງຍັງເຫຼືອແຕ່ ເປັນພູຫິນປູນດັ່ງຫິນໜາມໜໍ່່ ເທິງພູຜາມ່ານ ແຂວງຄຳມ່ວນແຫ່ງນີ້.