ກອງປະຊຸມສຸດຍອດ ອາຊຽນ ຄັ້ງທີ 28-29 ທີ່ ສປປ ລາວ ເປັນເຈົ້າພາບ ຊຶ່ງຈະຈັດຂຶ້ນໃນຕົ້ນເດືອນກັນຍານີ້, ມາຮອດປັດຈຸບັນ ອະນຸກຳມະການແຕ່ລະພາກສ່ວນຕ່າງໆ ພວມຂຸ້ນຂ້ຽວກະກຽມຄວາມພ້ອມຂອງຕົນເພື່ອຕ້ອນຮັບກອງປະຊຸມສຳຄັນດັ່ງກ່າວຢ່າງຫ້າວຫັນ
ທ່ານ ດຣ ສະໜອງ ທອງຊະນະ ຜູ້ອຳນວຍການໂຮງໝໍມິດຕະພາບ ຄະນະອະນຸກຳມະການສາທາລະນະສຸກ ເພື່ອຮັບ ໃຊ້ກອງປະຊຸມສຸດຍອດອາຊຽນ ໄດ້ໃຫ້ສຳພາດກ່ຽວກັບ ຄວາມກຽມພ້ອມຂອງໂຮງໝໍວ່າ: ໃນການກະກຽມໃຫ້ແກ່ ກອງປະຊຸມສຸດຍອດອາຊຽນ ຄັ້ງທີ 28-29 ທີ່ ສປປ ລາວ ເປັນເຈົ້າພາບນີ້ ໂດຍສະເພາະ ໂຮງໝໍມິດຕະພາບ, ຄະນະ ພັກ, ຄະນະອຳນວຍການ ຕະຫຼອດຮອດພະນັກງານ-ລັດຖະກອນທຸກຄົນ ຕ່າງກໍມີຄວາມຈູບຈ້າວຫ້າວຫັນກຽມພ້ອມໃນການປະຕິບັດໜ້າທີ່, ເພື່ອຮັບປະກັນໃຫ້ກັບວຽກງານຢ່າງຕັ້ງໜ້າ. ພວກຂ້າພະເຈົ້າ ໄດ້ມີການແຕ່ງຕັ້ງຄະນະກຳມະການຮັບຜິດຊອບຂັ້ນໂຮງໝໍ ໂດຍແຕ່ງຕັ້ງບຸກຄະລາກອນ ເວນຍາມຕ້ອນຮັບທຸກກໍລະນີ ສຸກເສີນຕະຫຼອດ 24 ຊົ່ວໂມງ, ກະກຽມຮັບປະກັນອຸປະກອນ ເຄື່ອງມືການແພດເປັນຕົ້ນ ເຄື່ອງຈັກບົ່ງມະຕິ, ເຄື່ອງລັງສີ, ເຄື່ອງສະແກນເນີ, ເຄື່ອງ MRI, ເຄື່ອງມືຜ່າຕັດ ແລະ ເຄື່ອງມືຮັບໃຊ້ຕ່າງໆ ໃຫ້ມີຄວາມກຽມພ້ອມ. ທາງດ້ານສະຖານຮອງ ຮັບຄົນເຈັບໄລຍະກອງປະຊຸມ ແມ່ນໄດ້ມີການຈັດຕຽມຫ້ອງ, ຫ້ອງສຸກເສີນ (ຫ້ອງນອນສຸກເສີນ 2 ຫ້ອງ), ຫ້ອງນອນຄົນ ເຈັບມີປະມານ 5-10 ຕຽງ ແລະ ຫ້ອງໄອຊີຢູ (ICU), ພ້ອມນີ້ ກໍໄດ້ຈັດຕັ້ງຄະນະກຳມະການປະສານງານລະຫວ່າງໂຮງໝໍ, ກະຊວງສາທາລະນະສຸກ ແລະສະຖານທີ່ກອງປະຊຸມ, ຈຸດຕ່າງໆຂອງຜູ້ແທນໄດ້ມີການຝຶກອົບຮົມໃຫ້ ພະນັກງານແພດໝໍ ໃນຂະແໜງງການຕ່າງໆ ເພື່ອເຮັດໃຫ້ການບໍລິການຮັບໃຊ້ກອງປະຊຸມສຸດຍອດອາຊຽນຄັ້ງນີ້ ໄດ້ຮັບຜົນດີ
ມາຮອດປັດຈຸບັນນີ້ຖືໄດ້ ວ່າໂຮງໝໍມິດຕະພາບ ແມ່ນໜຶ່ງໃນໂຮງໝໍທີ່ມີຄວາມກຽມພ້ອມເຊິ່ງທ່ານ ສະໜອງ ທອງຊະນະ ໄດ້ສະແດງຄວາມຮູ້ສຶກວ່າ: ຂ້າພະເຈົ້າມີຄວາມພາກພູມໃຈ ແລະມີກຽດທີ່ໄດ້ ຖືກແຕ່ງຕັ້ງໃນຄະນະກຳມະ ການດ້ານສາທາລະນະສຸກ ຮັບໃຊ້ກອງປະຊຸມສຸດຍອດ ອາຊຽນຄັ້ງທີ 28-29 ນີ້ ຕົນເອງພ້ອມດ້ວຍແພດໝໍທຸກຄົນ ຈະພ້ອມກັນໃນການປະຕິບັດໜ້າທີ່ ທີ່ຖືກມອບໝາຍໃຫ້ສຳເລັດຜົນຕາມລະດັບຄາດໝາຍ
ທີ່ມາ: ຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!
ifram FBPictpost ຮູບພາບລາວໂພສຕ໌