ປະຊາຊົນທີ່ອາໄສຢູ່ລຽບເສັ້ນທາງ ດົງໂດກ-ໜອງບຶກ ໄດ້ຮັບຜົນກະທົບຢ່າງໜັກ ຕໍ່ສະພາບຂີ້ໃຫງ່ຈາກເສັ້ນທາງທີ່ກຳລັງກໍ່ສ້າງ ແລະເດັກນ້ອຍຈຳນວນຫຼາຍ ກໍເປັນພະຍາດທາງເດິນຫາຍໃຈ (ຫວັດ, ໄອ ແລະປອດອັກເສບ) ແລ້ວ.
ຕາມການລາຍງານຂອງນັກຂ່າວ ລາວໂພສ ກ່າວວ່າ ປັດຈຸບັນນີ້ປະຊາຊົນບ້ານໜອງພະຍາ, ນາສ້ຽວ, ຊຳເກດ, ດົງກະເລົາ ແລະໜອງບຶກ ກໍຄືຜູ້ທີ່ມີຄວາມຈຳເປັນຕ້ອງໃຊ້ເສັ້ນທາງ ດົງໂດກ-ໜອງບຶກ ແມ່ນໄດ້ຮັບຜົນກະທົບຢ່າງໜັກຕໍ່ສະພາບເສັ້ນທາງທີ່ກຳລັງມີການກໍ່ສ້າງ ຈຶ່ງເຮັດໃຫ້ມີຂີ້ຝຸ່ນໃຫງ່ຫຼາຍ. ປະຊາຊົນຈຳນວນໜຶ່ງທີ່ຢູ່ລຽບແຄມທາງກໍໄດ້ພະຍາຍາມສີດນໍ້າໃສ່ທາງໃນບໍລິເວນໜ້າເຮືອນຂອງຕົນເອງຢູ່ທຸກມື້ ແຕ່ກໍບໍ່ໄຫວ ເນື່ອງຈາກບໍ່ສາມາດຫົດໃຫ້ທົ່ວເຖິງໄດ້ ເວລາລົດແລ່ນກາຍເຮັດໃຫ້ຂີ້ຝຸ່ນໃຫງ່ປິວເຂົ້າເຮືອນ ແລະປິວໄປໄກຫຼາຍຮ້ອຍແມັດ.
ນອກຈາກສະພາບຂີ້ຝຸ່ນໃຫງ່ແລ້ວ ເສັ້ນທາງດັ່ງກ່າວຫຼາຍບ່ອນແມ່ນຍັງບໍ່ໄດ້ມີການປັບໜ້າທາງ ຈຶ່ງຍັງປະເສັ້ນທາງທີ່ເປ່ເພເປັນຂຸມໄວ້ຢູ່ ເຮັດໃຫ້ການສັນຈອນພົບຄວາມຫຍຸ້ງຍາກ ແລະເຮັດໃຫ້ລົດເພຢູ່ເລື້ອຍໆ ດັ່ງປະຊາຊົນທ່ານໜຶ່ງກ່າວວ່າ: ເສັ້ນທາງທີ່ເປ່ເພບາງບ່ອນຍັງບໍ່ໄດ້ຮັບການສ້ອມແປງ ມັນເຮັດໃຫ້ການສັນຈອນຫຍຸ້ງຍາກໄດ້ຄ່ອຍໄປ-ຄ່ອຍມາ ແຕ່ວ່າບາງເທື່ອມີເຫດຫຼືວຽກກໍຕ້ອງແລ່ນລົດອ່າວໄວ ຈຶ່ງເຮັດໃຫ້ລົດເປ່ເພໄວພໍສົມຄວນ ຕ້ອງໄດ້ເອົາລົດເຂົ້າອູ່ກວດເຊັກຊ່ວງລ່າງແລະປ່ຽນອາໄຫຼ່ຢູ່ເລື້ອຍໆ. ສ່ວນເລື່ອງສຸຂະພາບກໍເຫັນວ່າມີເດັກນ້ອຍພາກັນເປັນພະຍາດທາງລະບົບຫາຍໃຈຫຼາຍ, ເລື່ອງການຄ້າການຂາຍກໍງຽບເຫງົາ ໂດຍສະເພາະແມ່ນຮ້ານອາຫານ ໄດ້ປິດໄປຫຼາຍຮ້ານ. ສົມມຸດວ່າຫາກມີເຄື່ອງກວດສະພາບອາກາດໄດ້ ຂ້ອຍຄິດວ່າມັນເກີນມາຕະຖານຄວາມປອດໄພຫຼາຍເທົ່າຢ່າງແນ່ນອນ.
ເສັ້ນທາງດັ່ງກ່າວ ມີຄວາມຍາວ 9.7 ກິໂລແມັດ ເປັນຈຸດເຊື່ອມຕໍ່ລະຫວ່າງທາງເລກທີ 13 ໃຕ້ ກັບທາງເລກທີ 13 ເໜືອ ແລະເປັນທີ່ຕັ້ງຂອງໂຮງໝໍແມ່ແລະເດັກເກີດໃໝ່ສູນກາງ ໂດຍແມ່ນບໍລິສັດຕັງຈະເລີນເປັນຜູ້ຂະຫຍາຍແລະສ້າງໃໝ່ໃຫ້ໃຫຍ່ກວ່າເກົ່າ ແລະຄາດວ່າຈະເທຄອນກີດໃຫ້ແລ້ວໃນເດືອນກັນຍາ 2018. ແຕ່ປະຊາຊົນຫຼາຍຄົນກ່າວວ່າ ບາງໄລຍະທາງຜູ້ຮັບເໝົາກໍ່ສ້າງກໍເຮັດວຽກໄວ, ແຕ່ມາໄລຍະນີ້ຮູ້ສຶກວ່າການເຮັດວຽກແມ່ນຊັກຊ້າຫຼາຍ ຖ້າເປັນຄືໄລຍະນີ້ແມ່ນບໍ່ສຳເລັດທັນຕາມເວລາທີ່ກຳນົດໄວ້ຢ່າງແນ່ນອນ.
ສິ່ງທີ່ປະຊາຊົນຮຽກຮ້ອງໃນປັດຈຸບັນຄື ຕ້ອງການໃຫ້ທາງຜູ້ຮັບເໝົາກໍ່ສ້າງຂູດປັບໜ້າທາງໃນຈຸດທີ່ເສັ້ນທາງເປັນຂຸມຫຼາຍໆ, ຫົດນໍ້າເປັນປະຈຳຢ່າງໜ້ອຍ ມື້ລະ 4 ຮອບ ແລະເຮັດໃຫ້ສຳເລັດໂດຍໄວ.
