ເມື່ອທ້າຍອາທິດຜ່ານມານີ້, ເຈົ້າໜ້າທີ່ກອງກວດກາປ່າໄມ້ພະແນກກະສິກໍາ-ປ່າໄມ້ນະຄອນຫລວງວຽງຈັນ ໄດ້ສົມທົບກັບພາກສ່ວນກ່ຽວຂ້ອງຕ່າງໆລົງກວດກາຮ້ານຂາຍສັດປີກໃນຮ້ານນາງ ວິນະສາ, ຮ້ານທ້າວ ແສງປະຊາ, ຮ້ານນາງ ນິລັນ ແລະ ຮ້ານນາງ ຂັນທະລີ ຢູ່ເສັ້ນທາງຄູວຽງເຂດບ້ານ ສີເມືອງ ເມືອງສີສັດຕະນາກ ນະຄອນຫລວງວຽງຈັນ ໄດ້ພົບເຫັນມີສັດປ່າຫ່ວງຫ້າມປະເພດນົກຄື: ນົກຫາງຍາວ, ນົກອ້ຽງ, ນົກຫອນ, ນົກແກ້ວສົບແດງ, ນົກອ້ຽງປາກເຫລືອງ, ນົກເຂົາ ແລະ ນົກຫອນຈຸກ ລວມມີທັງໝົດ 117 ໂຕທີ່ເຈົ້າຂອງຮ້ານບໍ່ມີເອກະສານຢັ້ງຢືນທີ່ມາຂອງນົກຈຳນວນດັ່ງກ່າວ, ພ້ອມທັງເຮັດບົດບັນທຶກກ່າວເຕືອນຕໍ່ເຈົ້າຂອງຮ້ານດັ່ງກ່າວ, ຖ້າກະທໍາຜິດອີກຈະຖືກດຳເນີນຄະດີຕາມລະບຽບກົດໝາຍ, ພ້ອມທັງໄດ້ຢຶດນົກທັງໝົດໄປມອບໃຫ້ສູນຊ່ວຍເຫລືອສັດປ່າລາວ (ສວນສັດບ້ານເກີນ) ເພື່ອເບິ່ງແຍ່ງໃຫ້ແຂງແຮງ ແລະ ປ່ອຍຄືນສູ່ທຳມະຊາດ.
ທ່ານຫົວໜ້າກອງປ່າໄມ້ ໃຫ້ຮູ້ຕື່ມວ່າ: ການສະກັດກັ້ນ ແລະ ຕ້ານການຄ້າຂາຍສັດປ່າຢູ່ນະຄອນຫລວງວຽງຈັນນີ້, ແມ່ນໄດ້ເຮັດເປັນປົກກະຕິ ໂດຍສະເພາະລົງກວດກາຕາມຕະຫລາດ ແລະ ຈຸດເປົ້າໝາຍຕ່າງໆອາທິດລະ 2 ຄັ້ງ ແລະ ລົງກວດຕາມການແຈ້ງຂອງພົນລະເມືອງທີ່ພົບເຫັນການລັກລອບຂາຍສັດປ່າແບບຊະຊາຍ ແລະ ສາມາດຢຶດສັດຫວງຫ້າມໄດ້ເປັນຈຳນວນຫລວງຫລາຍ, ພ້ອມທັງໄດ້ມີການສຶກສາອົບຮົມ ແລະ ດຳເນີນຄະດີຕໍ່ຜູ້ກະທໍາຜິດຕາມລະບຽບກົດໝາຍຕາມສະຖານໜັກ ແລະ ເບົາ. ຈາກສະພາບດັ່ງກ່າວຈຶ່ງເຫັນວ່າປາກົດການຄ້າຂາຍສັດປ່າຫວ່ງຫ້າມຢູ່ນະຄອນ ຫລວງວຽງຈັນມີທ່າອ່ຽງຫລຸດລົງເທື່ອລະກ້າວ.
ແຫລ່ງຂ່າວ : ໜັງສືພິມເສດຖະກິດ-ສັງຄົມ