ເມື່ອວັນທີ 9 ກຸມພາທີ່ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ຕ້ອງອອກຄຳສັ່ງເຖິງບັນດາໜ່ວຍງານຕ່າງໆຂອງລັດກ່ຽວກັບການປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່ ໃນນັ້ນເນັ້ນເລື່ອງການບັນຈຸລັດຖະກອນໃໝ່ ເພື່ອແກ້ໄຂປັນຫາພະນັກງານເຫຼືອບໍ່ພໍ ແລະ ຮັບປະກັນການສອບເສັງຄັດເລືອກເອົາລັດຖະກອນ ເພື່ອໃຫ້ໄດ້ຜູ້ເກັ່ງ, ຜູ້ດີ ແລະ ຜູ້ມີຄວາມສາມາດແທ້ມາຮັບໃຊ້ວຽກງານຂອງລັດ.
ໃນຄຳສັ່ງດັ່ງກ່າວ ໄດ້ກຳນົດໃຫ້ບັນດາໜ່ວຍງານຕ່າງໆຂອງລັດຕັ້ງແຕ່ສູນກາງຈົນເຖິງທ້ອງຖິ່ນ ກວດກາຄືນການກຳນົດຕຳແໜ່ງງານ ແລ້ວປັບປຸງແກ້ໄຂຈຸດທີ່ຍັງບໍ່ທັນຖືກຕ້ອງໃຫ້ຂາດຕົວ ເນື່ອງຈາກວ່າການກຳນົດຕຳແໜ່ງງານໃນເມື່ອກ່ອນມີລັກສະນະຂອງການເພີ່ມຈຳນວນລັດຖະກອນໃນທຸກໆປີ.
ພ້ອມກັນນັ້ນ ໃນການກຳນົດຕຳແໜ່ງງານ ໜ່ວຍງານລັດຕ່າງໆຕ້ອງມີການວິເຄາະ ແລະ ດັດສົມວຽກໃຫ້ຖືກຕ້ອງ ໂດຍອີງໃສ່ພື້ນຖານຄົນຜູ້ໜຶ່ງຮັບຜິດຊອບຫຼາຍວຽກ ເພື່ອຫຼຸດຜ່ອນການຂໍລັດຖະກອນເພີ່ມຂຶ້ນເລື້ອຍໆ. ສ່ວນເລື່ອງທີ່ໜ່ວຍງານໃດຫາກມີຈຳນວນລັດຖະກອນຫຼາຍເກີນໜ້າວຽກ ກໍ່ໃຫ້ສັບຊ້ອນໄປຍັງໜ່ວຍງານທີ່ຈຳນວນພະນັກງານບໍ່ພໍ ແລະ ຕ້ອງຝຶກອົບຮົມພວກເຂົາໃຫ້ມີຄວາມໜັກແໜ້ນທາງດ້ານວິຊາສະເພາະ ແລະ ມາດຖານອື່ນໆທີ່ຈຳເປັນ.
ທັງນີ້ ທ່ານ ທອງລຸນ ສີສຸລິດ ຍັງໄດ້ເນັ້ນໃນຄຳສັ່ງດັ່ງກ່າວອີກວ່າ ກະຊວງພາຍໃນຕ້ອງເປັນເຈົ້າການໃນການຕິດຕາມ ແລະ ແນະນຳທຸກໜ່ວຍງານຂອງລັດກ່ຽວກັບປັນຫາດັ່ງກ່າວ ແລະ ສັ່ງໂຈະທຸກໆການສ້າງຕັ້ງກົງຈັກລັດຂຶ້ນມາໃໝ່ ເພື່ອເປັນການປະຕິບັດນະໂຍບາຍປະຢັດງົບປະມານຂອງລັດ.
ແຫລ່ງຂ່າວ: ມ່ວນສະນຸກ