ສຳນັກຂ່າວສານປະເທດລາວລາຍງານວ່າ ໃນປີ 2018 ລັດຖະບານລຸກຊຳບວກ ຈະໃຫ້ທຶນຊ່ວຍເຫຼືອ ຜ່ານອົງການສະຫະປະຊາຊາດເພື່ອການພັດທະນາ (UNDP) ມູນຄ່າ 350,000 ໂດລາສະຫະລັດ, ເພື່ອສະໜັບສະໜູນວຽກງານໄພພິບັດ ແລະ ເກັບກູ້ລະເບີດບໍ່ທັນແຕກທີ່ຍັງຕົກຄ້າງໃນ ສປປ ລາວ. ທ່ານ ນາງ ກາຣິນາ ອິມໂມເນັນ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ ກ່າວເນື່ອງໃນໂອກາດພົບປະທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໃນວັນທີ 24 ມັງກອນ 2018 ທີ່ກະຊວງແຮງງານ ແລະ ສະຫວັດດີການສັງຄົມ.
ໃນການພົບປະຄັ້ງນີ້, ຍັງໄດ້ທົບທວນຄືນກ່ຽວກັບການຈັດຕັ້ງປະຕິບັດວຽກງານ ແລະ ການຮ່ວມມືກັນ ລະຫວ່າງ UNDP ແລະ ກະຊວງດັ່ງກ່າວ ໃນໄລຍະໜຶ່ງປີຜ່ານມາ ແລະ ແຜນການໃນຕໍ່ໜ້າ, ໂດຍສະເພາະແມ່ນໂຄງການຟື້ນຟູໄພພິບັດ ແລະ ລະເບີດບໍ່ທັນແຕກທີ່ຍັງຕົກຄ້າງ ໃນສປປ ລາວ, ເຊິ່ງໃນໂອ ກາດນີ້ ທ່ານ ນາງ ກາຣິນາ ອີໂມເນັນ ກໍໄດ້ແຈ້ງເຖິງຄຳໝັ້ນສັນຍາ ຂອງລັດຖະບານລຸກຊຳບວກ ທີ່ຈະໃຫ້ການຊ່ວຍເຫຼືອ ສປປ ລາວ.
ໃນປີ 2017 ທົ່ວປະເທດ ມີຜູ້ໄດ້ຮັບບາດເຈັບຈາກລະເບີດບໍ່ທັນແຕກຈຳນວນ 27 ຄົນ ແລະ ເສຍຊີວິດ 4 ຄົນ, ຊ່ວຍເຫຼືອຜູ້ຖືກເຄາະຮ້າຍຈາກລະເບີດບໍ່ທັນແຕກຈຳນວນ 281 ຄົນ ເທົ່າກັບ 93% ຂອງແຜນການປີ 300 ຄົນ.
ແຫລ່ງຂ່າວ: ຂ່າວສານປະເທດລາວ