ທ່ານ ຄຳ​ປະດິດ ເຂັມ​ມານິດ ຫົວໜ້າ​ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ໄດ້​ລາຍງານ​ແຜນ​ວຽກ​ຈຸດ​ສຸມ​ການ​ເປັນເຈົ້າພາບ​ທີ່​ດີ​ປີ​ທ່ອງ​ທ່ຽວ​ລາວ 2018 ຕໍ່​ກອງ​ປະຊຸມ​ສະໄໝ​ສາມັນ​ເທື່ອ​ທີ 4 ຂອງ​ສະພາ​ປະຊາຊົນ ນວ ຊຸດ​ທີ I ໃນ​ວັນ​ທີ 10 ມັງກອນ 2018 ວ່າ ສຳລັບ 9 ວຽກ​ຈຸດ​ສຸມ​ເພື່ອ​ສົ່ງເສີມ​ການທ່ອງທ່ຽວ​ໃຫ້​ມີ​ຂະ​ບວນຟົດຟື້ນ ແລະ ປະສົບ​ຜົນສຳເລັດ ຕາມ​ຄາດໝາຍ​ວາງ​ໄວ້​ໃນ​ການເປັນ​ເຈົ້າພາບ​ທີ່​ດີ ປະກອບ​ມີ​ຄື: ແຜນ​ວຽກ​ວິຊາ​ການ​ໃນ​ຂົງເຂດ​ບໍລິ​ການ​ດ້ານ​ວັດທະນະທຳ-ທ່ອງທ່ຽວ ແຜນ​ວຽກ​ສ້າງ​ສີສັນ​ໃໝ່​ໃນແຫຼ່ງ​ທ່ອງ​ທ່ຽວ​ວັດທະນະທຳ ແລະ ປູຊະນີຍະສະຖານ​ທີ່​ສຳຄັນ ແຜນ​ວຽກ​ສ້າງ​ສີສັນ​ໃໝ່​ໃນ​ແຫຼ່ງທ່ອງ​ທ່ຽວ​ດ້ານ​ປະຫວັດສາດ ແຜນ​ວຽກ​ຈັດ​ສັນ​ແຫຼ່ງ​ທ່ອງ​ທ່ຽວ ແຜນ​ວຽກ​ໂຄສະນາ​ກິດຈະກຳ​ບຸນປະເພນີ​ທາງ​ສາສະໜາ ແລະ ຕາມ​ຮີດ​ສິບ​ສອງ​ຄອງ​ສິບ​ສີ່ ແຜນວຽກ​ສ້າງ​ລາຍການ​ລາຕີ​ວຽງຈັນ ຈັດ​ງານ​ເທ​ສະການ​ອາຫານວຽງ​ຈັນ ແລະ ແຜນ​ວຽກ​ດຶງ​ດູດນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ໃຫ້​ເຂົ້າ​ມາ​ທ່ຽວ​ຊົມ ນະຄອນຫຼວງ​ວຽງ​ຈັນ ໃຫ້​ນັບ​ມື້ຫຼາຍ​ຂຶ້ນ ພ້ອມ​ກັນ​ນັ້ນ ໃນ​ວຽກງານ​ຈຸດ​ສຸມ ປີ 2018 ຍັງ​ໄດ້​ກຳນົດ​ຈັດ​ກິດຈະກຳ​ຕ່າງໆ ​ທີ່​ເປັນການ​ສົ່ງເສີມ​ການທ່ອງທ່ຽວ​ໃນແຕ່​ລະ​ເດືອນ ໂດຍ​ອຳນາດ​ການປົກຄອງ ນວ ເຫັນ​ດີ​ໃຫ້​ຈັດ​ກິດ​ຈະກຳ​ບຸນ​ລານ​ເຂົ້າ ບ້ານ​ວັດທະນະທຳ​ບ້ານ​ໃຫຍ່​ນາ​ຈະເລີນ ເມືອງສັງ​ທອງ ໃນ​ວັນ​ທີ 12 ມັງກອນ ແລະ ງານ​ເທ​ສະການ​ອາຫານລາວ​ທີ່​ບໍລິເວນ​ແຄມ​ຂອງ​ທ່າ​ວັດຈັນ ໃນ​ວັນ​ທີ 24-27 ມັງກອນ ເປີດ​ສຳ​ມະ​ນາ​ວິທະຍາສາດ​ໂຄງການ​ສົ່ງເສີມ​ການທ່ອງທ່ຽວ​ທຳມະ​ຊາດ ແລະ ເປີດ​ຂະ​ບວນ​ການແຂ່ງຂັນ​ທຸລະ​ກິດ​ບໍລິການ​ດ້ານວັດທະນະທຳ-ທ່ອງ​ທ່ຽວ​ຕາມ 6 ສະເໜີ​ໃນ​ເດືອນ​ກຸມພາ ຈັດ​ຂະບວນ​ການທ່ອງທ່ຽວ​ທາງນ້ຳ​ຕາມລຳ​ແມ່ນ້ຳ​ງື່ມ ແລະ ເທ​ສະການອາຫານ​ພື້ນ​ບ້ານ ຢູ່​ບ້ານ​ນາ​ຄັນທຸງ ຕິດ​ພັນ​ກັບ​ການທ່ອງທ່ຽວພະ​ບາດ​ແອວ​ຂັນ​ໃນ​ເດືອນ​ມີນາ ຈັດ​ກອງ​ປະຊຸມ​ວິຊາ​ການ​ທ່ອງທ່ຽວ 5 ນະຄອນ​ລຸ່ມ​ແມ່ນ້ຳ​ຂອງ ແລະ ງານ​ຊາວ​ໜຸ່ມ​ການ​ທູດ ດ້ານ​ການທ່ອງທ່ຽວ 5 ນະຄອນ ງານ​ຄັດ​ເລືອກ​ນາງ​ສາວ ນວ ປະຈຳປີ 2018 ເທ​ສະການ​ບຸນປີໃໝ່ລາວ ຈັດ​ຂະ​ບວນ​ຄາ​ລາ​ວານ​ລົດທ່ອງ​ທ່ຽວ​ລາວ​ຈາກ​ສະໜາມຫຼວງໄປ​ຫາ​ເມືອງ​ປາກ​ງື່ມ ​ຈັດລາຍການ​ທ່ຽວ​ຊົມ​ຕາເວັນຕົກດິນ​ທີ່​ບໍລິເວນ​ແຄມ​ຂອງ ແລະ ງານ​ວາງສະແດງ​ສິນຄ້າ​ໂອ​ດັອບປະຈຳ​ປີ ເດືອນ​ມິຖຸນາ 2018 ຈັດຂະ​ບວນ​ທ່ອງ​ທ່ຽວ​ຕາມ​ລຳ​ນ້ຳ​ງື່ມ ເດືອນ​ກໍລະກົດຈັດ​ແຂ່ງຂັນ​ແລ່ນ ມິ​ນິ​ມາລາ​ທອນ​ມິດຕະພາບ​ລາວ-ໄທ ເດືອນ​ສິງຫາ 2018 ງານແຂ່ງຂັນ​ປຸງ​ແຕ່ງອາຫານ​ເອກະລັກ​ວຽງ​ຈັນ ແລະ ງານ​ແຂ່ງຂັນລາວ​ຊຸບ​ເປີ​ໂມ​ເດວ ງານ​ວາງ​ສະແດງ​ຜະລິດ​ຕະ​ພັນ​ສິນຄ້າ​ພາຍ​ໃນງານ​ແຂ່ງຂັນ​ຮ້ອງເພງ​ປີ​ທ່ອງທ່ຽວ ນວ ເດືອນ​ກັນຍາ ພິທີ​ປ່ອຍນົກ​ສັນຕິພາບ ແລະ ຍ່າງ​ເພື່ອ​ສຸຂະ​ພາບ ເດືອນ​ຕຸລາ ເທ​ສະການບຸນ​ອອກ​ພັນ​ສາ​ປະ​ວໍລະນາ ແລະ ຊ່ວງ​ເຮືອ​ທ່າ​ວັດ​ຈັນ ເດືອນ​ພະຈິກ ກອງ​ປະຊຸມ​ສຸດ​ຍອດ​ເຈົ້າ​ໜ້າທີ່​ອາວຸໂສ​ດ້ານ​ການທ່ອງທ່ຽວ 5 ນະຄອນ​ລຸ່ມ​ແມ່ນ້ຳ​ຂອງ ກອງ​ປະຊຸມ​ສຸດ​ຍອດ​ເຈົ້າ​ຄອງ​ນະຄອນດ້ານ​ການທ່ອງທ່ຽວ 5 ນະຄອນລຸ່ມ​ແມ່ນ້ຳ​ຂອງ ງານ​ສະເຫຼີມ​ສະຫຼອງ​ປີ​ທ່ອງ​ທ່ຽວ ​ໃນ​ໂອກາດ​ບຸນນະມັດສະການ​ພະ​ທາດຫຼວງ ເດືອນ​ພະຈິກ ແລະ ເດືອນ​ທັນວາ 2018 ງານ​ເທ​ສະການ​ບຸນ​ກິນຈຽງ​ຊົນເຜົ່າ​ມົ້ງ ທີ່​ສວນ​ພຶກສາຈັດ​ຄາ​ລະ​ວານ​ລົດຖີບ​ແຕ່​ສວນເຈົ້າຟ້າ​ງຸ່ມ ໄປ​ຫາບ້ານ​ເພຍ​ລາດ ເມືອງ​ສັງ​ທອງ ແລະ ງານ​ສະເຫຼີມ​ສະຫຼອງ​ສົ່ງ​ທ້າຍ​ປີ​ເກົ່າ ແລະ ຕ້ອນຮັບ​ປີ​ໃໝ່ ພ້ອມ​ກັບ​ສະຫຼອງປີ​ທ່ອງ​ທ່ຽວ 2018 ທີ່​ສວນ​ເຈົ້າອະນຸວົງ​ແຄມ​ຂອງ.

ແຫລ່ງຂ່າວ:​ ໜັງສືພິມວຽງຈັນໃໝ່