ຫລັງຈາກທີ່ປະທານາທິບໍດີປູຕິນສົ່ງຂໍ້ຕົກລົງໃຫ້ຣັດເຊຍໃຊ້ຖານທັບອາກາດ Hmeymim ແລະຖານທັບເຮືອ Tartus ໃນຊີເຣຍ ໃຫ້ລັດຖະສະພາຂອງຣັດເຊຍພິຈາລະນາ ທັງສະພາລຸ່ມ ຄືສະພາດູມ່າ ແລະສະພາສູງຄືສະພາ ສະຫະພັນ ຕ່າງກໍ່ໃຫ້ສັດຕະຍາບັນຂໍ້ຕົກລົງດັ່ງກ່າວ ໂດຍຂໍ້ຕົກລົງນີ້ອະນຸຍາດໃຫ້ຣັດເຊຍໃຊ້ຖານທັບທັງສອງແຫ່ງໄດ້ເປັນເວລາ 49 ປີ ໂດຍບໍ່ ມີຄ່າໃຊ້ຈ່າຍ ລວມເຖິງໄດ້ຮັບການຄຸ້ມຄອງຈາກກົດໝາຍຊີເຣຍດ້ວຍ ເທົ່າກັບວ່າທະຫານຣັດເຊຍແລະຄອບຄົວທີ່ຢູ່ໃນຖານທັບມີສິດທິພິເສດຄ້າຍຄືນັກການທູດ ນອກຈາກນີ້ເມື່ອຄົບ 49 ປີ ແລ້ວຖ້າບໍ່ມີຄູ່ສັນຍາແຈ້ງຂໍຍົກເລີກລ່ວງໜ້າໄວ້ຢ່າງໜ້ອຍ 1 ປີ ສັນຍາກໍ່ຈະຕໍ່ອາຍຸອີກ 25 ປີ

ທາງດ້ານກະຊວງປ້ອງກັນປະເທດຣັດເຊຍກໍ່ບໍ່ໄດ້ຊັກຊ້າ ເລີ່ມຈັດຕັ້ງຫນ່ວຍທະຫານຖາວອນ ທີ່ຈະໄປປະຈຳຖານທັບທີ່ຊີເຣຍ ເບື້ອງຕົ້ນລະບົບປ້ອງກັນໄພທາງອາກາດ S-400 (ແລະ Pantsir-S1) ຈະປະຈຳຢູ່ທີ່ຖານທັບອາກາດ Hmeymim ສ່ວນຖານທັບເຮືອ Tartus ມີລະບົບປ້ອງກັນໄພທາງອາກາດ S-300 ແລະລະບົບປ້ອງກັນໄພ Bastion

ຕອນນີ້ເທົ່າກັບຣັດເຊຍໄດ້ຖານທັບເກົ່າສະໄຫມໂຊວຽດ ໃນຊີເຣຍກັບມາໃຊ້ງານເປັນເວລາ 74 ປີ ໄດ້ລົງຫລັກປັກຖານໃນຕາເວັນອອກກາງ ແລະທະເລເມດິເຕລະນຽນເບື້ອງຕາເວັນ ອອກ ຫລັງຈາກນີ້ຣັດເຊຍຄົງຫາທາງຂະຫຍາຍອິດທິພົນໄປທາງທະເລເມດິເຕລະນຽນ ເບື້ອງຕາເວັນຕົກໂດຍຜ່ານອີຢິບ ລິເບຍ ແລະແອລຈີເຣຍ ກັບທະເລແດງຜ່ານທາງຊູດານຕໍ່ໄປ.