ອີງຕາມບົດລາຍງານແຜນພັດທະນາເສດຖະກິດ-ສັງຄົມ ປະຈຳປີ 2018 ໄດ້ໃຫ້ຮູ້ວ່າ: ໃນປີ 2018 ລັດຖະບານຈະສູ້ຊົນເຮັດໃຫ້ລວມຍອດຜະລິດຕະພັນພາຍໃນ (GDP) ເພີ່ມຂຶ້ນໃນລະດັບ 7% ແລະ ສ້າງມູນຄ່າເພີ່ມຕາມລາຄາໃນປີໃຫ້ໄດ້ປະມານ 149.471 ຕື້ກີບ ລາຍໄດສະເລ່ຍຕໍ່ຫົວຄົນ 2.536 ໂດລາສະຫະລັດ ເຊິ່ງໃນນັ້ນ ຂະແໜງກະສິກຳ ເພີ່ມຂຶ້ນ 2,8% ກວມເອົາປະມານ 15,73% ຂະແໜງອຸດສາຫະກຳ ເພີ່ມຂຶ້ນ 9,1% ກວມເອົາປະມານ 30,79% ຂະແໜງການບໍລິການເພີ່ມຂຶ້ນ 6,4% ກວມເອົາປະມານ 414,83% ພາສີ-ອາກອນ ແລະ ການນຳເຂົ້າເພີ່ມຂຶ້ນ 9,0% ກວມເອົາປະມານ 11,80% ຂອງ GDP ເຊິ່ງຂະແໜງການຫຼັກທີ່ຈະຊຸກຍູ້ໃຫ້ເສດຖະກິດມີການຂະຫຍາຍຕົວ ໃນປີ 2018 ແມ່ນມາຈາກຂະແໜງອຸດສາຫະກຳ ແລະ ຂະແໜງການບໍລິການ ໂດຍຕົວຂັບເຄື່ອນຕົ້ນຕໍແມ່ນພາກການກໍ່ສ້າງ ຄາດວ່າຈະເພີ່ມຂຶ້ນໃນລະດັບ 20% ທຽບໃສ່ປີຜ່ານມາ ສາເຫດແມ່ນຍ້ອນບັນດາກິດຈະກຳໃຫຍ່ໆຂອງໂຄງການກໍ່ສ້າງທາງລົດໄຟ ລາວ-ຈີນ ເຊິ່ງໄດ້ເລີ່ມຈັດຕັ້ງປະຕິບັດມາແຕ່ປີ 2015 ນອກຈາກນັ້ນ ບັນດາການກໍ່ສ້າງເຂື່ອນໄຟຟ້າຕ່າງໆ ຍັງສືບຕໍ່ຈັດຕັ້ງປະຕິບັດ ເປັນຕົ້ນແມ່ນເຂື່ອນໄຟຟ້າໄຊຍະບູລີ ເຂື່ອນໄຟຟ້າດອນສະໂຮງ ເຂື່ອນໄຟຟ້ານ້ຳທາ 1 ເຂື່ອນໄຟຟ້ານ້ຳງຽບ 1 ເຂື່ອນໄຟຟ້າເຊປຽນ ເຊນ້ຳນ້ອຍ ເຂື່ອນໄຟຟ້ານ້ຳອູ 1 3 4 7 ແລະ ເຂື່ອນໄຟຟ້າຂະໜາດນ້ອຍຈຳນວນໜຶ່ງ ນອກນັ້ນ ກໍ່ຍັງມີເຂື່ອນໄຟຟ້າທີ່ຈະເລີ່ມຜະລິດໃນປີ 2018 ປະມານ 11 ເຂື່ອນ ຈະຜະລິດພະລັງງານໄຟຟ້າໄດ້ປະມານ 1.787,24 ກິໂລວັດໂມງ (ກໍລະນີຜະລິດເຕັມກຳລັງ).
ສຳລັບຂະແໜງການບໍລິການ ເປັນຂະແໜງການຫຼັກທີ່ຂັບເຄື່ອນ ແມ່ນການຄ້າຂາຍຍົກ-ຂາຍຍ່ອຍ ການສ້ອມແປງກິດຈະກຳທີ່ພັກອາໄສ ແລະ ຮ້ານອາຫານຈະເພີ່ມຂຶ້ນລະດັບ 8,5% ແລະ 5% ຕາມລຳດັບ ສາເຫດແມ່ນເນື່ອງມາຈາກປີ 2018 ເປັນປີການທ່ອງທ່ຽວລາວ ຄາດວ່າຈະມີນັກທ່ອງທ່ຽວເຂົ້າມາລາວເພີ່ມຂຶ້ນປະມານ 6% ນອກຈາກນັ້ນ ພາກລັດເປັນອີກຂະແໜງການໜຶ່ງທີ່ຈະຊຸກຍູ້ການເຕີບໂຕ ແລະ ຈະເພີ່ມຂຶ້ນ 5% ສາເຫດແມ່ນເນື່ອງມາຈາກການເພີ່ມດັດສະຊີເງິນເດືອນຈາກ 6.500 ກີບ ມາເປັນ 7.200 ກີບ ຈະເຮັດໃຫ້ພາກບໍລິຫານລັດເພີ່ມຂຶ້ນ.
ແຫລ່ງຂ່າວ: ໜັງສືພິມວຽງຈັນໃໝ່