Roscosmos ອົງການອະວະກາດຂອງຣັດເຊຍວາງແຜນທີ່ຈະສ້າງໂຮງແຮມສຸດຫຼູເທິງສະຖານີອະວະກາດ ສຳລັບຄົນທີ່ມີເງິນເຫຼືອຖົງ ໂດຍມີຄ່າໃຊ້ຈ່າຍສະເລ່ຍ 40 ລ້ານໂດລາ ໃຫ້ຂຶ້ນໄປນອນຫຼິ້ນປະມານ 1-2 ອາທິດ ຫຼື ຖ້າຢາກລອງຍ່າງຫຼິ້ນໃນເດີ່ນອະວະກາດພ້ອມນັກບິນກໍ່ຕ້ອງຈ່າຍເພີ່ມອີກ 20 ລ້ານໂດລາ

ຢ່າງໃດກໍ່ຕາມ RKK Energia ຜູ້ຮັບເໝົາກໍ່ສ້າງໂຄງການໄດ້ກ່າວວ່າ ໂຄງການນັ້ນຖືກແບ່ງອອກເປັນ 2 ສ່ວນ ມີງົບປະມານຢູ່ທີ່ 279 – 446 ລ້ານໂດລາ ເຊິ່ງລັດຖະບານຣັດເຊຍຈະລົງທຶນໃຫ້ພຽງສ່ວນທຳອິດ ຄືສ່ວນຂອງຫ້ອງທົດລອງວິທະຍາສາດ ແລະ ສະຖານີຈ່າຍໄຟຟ້າ (ຕາມຮູບດ້ານລຸ່ມ) ເຊິ່ງຕອນນີ້ທາງບໍລິສັດກຳລັງດຳເນີນການສ້າງສ່ວນນັ້ນຢູ່

RKK Energia ກ່າວວ່າໃນການເປີດໃຫ້ບໍລິການນັ້ນໜ້າຈະເກີດຂຶ້ນໄດ້ຕໍ່ເມື່ອ Boeing ແລະ SpaceX ມີຄວາມພ້ອມທີ່ຈະໃຫ້ບໍລິການຍານອະວະກາດໃຫ້ເປັນຍານພະຫະນະໃນຮູບແບບທຸລະກິດ ໂດຍ ໂຄງການນີ້ຈະຄືນທຶນໃຫ້ໄດ້ພາຍໃນ 7 ປີ ຖ້າຫາກມີຜູ້ເຂົ້າໃຊ້ບໍລິການ 6 ຄົນຕໍ່ປີ (ແຕ່ລະຄົນຈະໄດ້ເຂົ້າພັກຢ່າງໜ້ອຍ 1 ອາທິດ)

ເປັນທີ່ໜ້າສັງເກດວ່າ ການກໍ່ສ້າງໂຮງແຮມທີ່ວ່ານີ້ຈະໃຊ້ເວລາດົນກວ່າ 5 ປີ ແລະ ສະຖານີອະວະກາດນານາຊາດນັ້ນມີກຳນົດຈະເລີກໃຊ້ງານໃນປີ 2028