ນັບວ່າເປັນກະແສຮືຮາທີ່ໜ້າສົນໃຈຫຼາຍຂອງວົງການສື່ມວນຊົນລາວຍຸກໃໝ່ເວລານີ້ ເນື່ອງຈາກ ທ່ານ ສົມສະຫວິນ ວົງສີສຸພັນ, ນັກຂ່າວໜັງສືພິມເສດຖະກິດ-ການຄ້າ ທີ່ຂຶ້ນກັບກະຊວງອຸດສາຫະກຳ ແລະ ການຄ້າ ໄດ້ເປັນຕົວແທນໃຫ້ແກ່ສື່ມວນຊົນລາວທົ່ວປະເທດ ໄດ້ຖຶກເຊີນຈາກມູນນິທິ ດິນດີນ້ຳໃສ ແຫ່ງ ປະເທດໄທ ເພື່ອເຂົ້າຮ່ວມຮັບລາງວັນ ”ເຫມມະຣາຊ໌” ບຸກຄົນຕົ້ນແບບແຫ່ງປີ 2017 ໃນສາຂາບຸກຄົນຜູ້ມີຈິດອາສາຕົ້ນແບບແຫ່ງປີ ທີ່ມະຫາວິທະຍາໄລ ທໍາມະສາດຣັງສິດ ນະຄອນຫຼວງບາງກອກ ຣາຊອາຈັກໄທ ເມື່ອວັນສຸກທີ 08 ທັນວາ 2017 ຜ່ານມາ.

ສະນັ້ນ, ເພື່ອເປັນການສະແດງຄວາມຍ້ອງຍໍຊົມເຊີຍຕໍ່ຜົນງານດີເດັ່ນຂອງນັກຂ່າວລາວທີ່ສາມາດຄວ້າລາງວັນດັ່ງກ່າວໃນປະເທດເພື່ອບ້ານ ພ້ອມທັງສ້າງສື່ສຽງໃຫ້ແກ່ປະເທດຊາດໂດຍຜ່ານເວທີດັ່ງກ່າວ, ພວກເຮົາຈຶ່ງໄດ້ນໍາມາສະເໜີເພື່ອໃຫ້ທ່ານຜູ້ອ່ານໄດ້ຮູ້ເຖິງຄວາມເປັນມາ ແລະ ການເຄື່ອນໄຫວຕ່າງໆຂອງນັກຂ່າວຄົນນີ້ໃນຊຸມປີຜ່ານມາ ຈົນໄດ້ຮັບການຍົກຍ້ອງເປັນບຸກຄົນຕົ້ນແບບແຫ່ງປີ 2017.

+ ເຫດຜົນທີ່ເຮັດໃຫ້ທ່ານໄດ້ຮັບລາງວັນ ”ເຫມມະຣາດ” ບຸກຄົນຕົ້ນແບບແຫ່ງປີ 2017 ຍ້ອນຫຍັງ?

ທ່ານ ສົມສະຫວິນ ວົງສີສຸພັນ ກ່າວວ່າ: ເຫດຜົນທີ່ເຮັດໃຫ້ຕົນເອງໄດ້ຮັບລາງວັນ ”ເຫມມະຣາດ” ບຸກຄົນຕົ້ນແບບແຫ່ງປີ 2017 ກໍ່ເນື່ອງຈາກວ່າໃນ 2-3 ປີຜ່ານມາ ຕົນເອງເຄີຍຊ່ວຍເຫຼືອບັນດາຜູ້ປະ ກອບການທົ່ວໄປຂອງໄທດ້ວຍການປະສານງານໃຫ້ກັບເຂົາເຈົ້າທີ່ມີຈຸດປະສົງເຂົ້າມາດຳເນີນທຸລະກິດໃນລາວ, ມາຫາຄູ່ຮ່ວມທຸລະກິດ ຫຼື ມາທ່ອງທ່ຽວ; ຊ່ວຍໂຄສະນາຂໍ້ມູນຂ່າວສານຜ່ານສື່ຕ່າງໆກ່ຽວກັບກິດຈະກຳ ຫຼື ງານທົ່ວໄປທີ່ຈັດຂຶ້ນຢູ່ປະເທດລາວ ແລະ ໄທ. ນອກນັ້ນ, ຍັງໄດ້ຊ່ວຍເຫຼືອປະຊາສຳພັນງານສຳຄັນຕ່າງໆຂອງພາກລັດ ແລະ ພາກທຸລະກິດທັງສອງປະເທດຜ່ານສື່ສິ່ງພິມ ເຊິ່ງຜ່ານການຊ່ວຍເຫຼືອໂດຍບໍ່ໄດ້ຫວັງຜົນຕອນແທນໃນໄລຍະຜ່ານມານັ້ນ ຈຶ່ງເຮັດໃຫ້ຕົນເອງກາຍເປັນທີ່ຮູ້ຈັກຢ່າງກວ້າງຂວາງຂອງຜູ້ປະກອບການຕ່າງໆ ລວມທັງພາກລັດ ແລະ ສື່ມວນຊົນຫຼາຍຂຶ້ນ.

+ ຜ່ານມາເຄີຍມີຄົນລາວໄດ້ຮັບລາງນີ້ບໍ, ຈັດຂຶ້ນຈັກຄັ້ງ ແລະ ມີຜູ້ໄດ້ຮັບໃນສາຂາໃດແດ່?

ມູນນິທິ ດິນດີນ້ຳໃສ ແຫ່ງ ປະເທດໄທ ໄດ້ຈັດພິທີມອບລາງວັນ ”ເຫມມະຣາດ” ຄັ້ງທຳອິດໃນປີ 2016 ເຊິ່ງໃນເວລານັ້ນເຄີຍມີນັກຂ່າວວາລະສານທ່ານໜຶ່ງທີ່ເປັນລຸ້ນອ້າຍໄດ້ຮັບລາງວັນດັ່ງກ່າວໃນສາຂາ ສາຂາຜູ້ອະນຸລັກສິລະປະວັດທະນະທຳ. ສຳລັບປີ 2017 ຖືເປັນຄັ້ງທີ2 ທີ່ສື່ມວນຊົນລາວໄດ້ເຂົ້າຮ່ວມຮັບລາງວັນ, ແຕ່ເປັນລາງວັນ ”ເຫມມະຣາດ” ບຸກຄົນຕົ້ນແບບແຫ່ງປີ 2017 ໃນສາຂາບຸກຄົນຜູ້ມີຈິດອາສາ ຕົ້ນແບບແຫ່ງປີ ເຊິ່ງທ່ານ ສົມສະຫວິນ ວົງສີສຸພັນ ເປັນພຽງຄົນດຽວໃນທົ່ວປະເທດຖຶກຄັດເລືອກຈາກຄະນະກຳມະການຈັດງານໃຫ້ເປັນຜູ້ທີ່ເໝາະສົມໄດ້ຮັບລາງວັນນີ້.

ສຳລັບລາງວັນ ບຸກຄົນຕົ້ນແບບແຫ່ງປີ 2017 ມີທັງໝົດ 7 ສາຂາໄດ້ແກ່: ສາຂາຜູ້ເຮັດໜ້າທີ່ເພື່ອຜົນປະໂຫຍດຕໍ່ສັງຄົມ ແລະ ປະເທດຊາດ; ສາຂາຜູ້ເຮັດໜ້າທີ່ເພື່ອຜົນປະໂຫຍດຂອງສາສະໜາ; ສາຂາບຸກຄົນຜູ້ມີຈິດອາສາ; ສາຂາຜູ້ອະນຸລັກສິລະປະວັດທະນະທຳ; ສາຂາຜູ້ຮັກສາສິ່ງແວດລ້ອມ; ສາຂາຜູ້ນຳດ້ານບໍລິຫານ ແລະ ພັດທະນາອົງກອນ; ສາຂາຜູ້ນຳດ້ານວິຊາການ ແລະ ພັດທະນາການສຶກສາ.

+ ທ່ານຮູ້ສຶກແນວໃດຕອນຂຶ້ນຮັບລາງວັນ ແລະ ລາງວັນນີ້ຈະມີປະໂຫຍດຫຍັງຕໍ່ຕົນເອງກໍຄືອົງກອນ?

ຂ້າພະເຈົ້າຮູ້ສຶກເປັນກຽດຢ່າງຍິ່ງທີ່ໄດ້ຮັບຂ່າວໂດຍຜ່ານໜັງສືແຈ້ງເຊີນຂອງມູນນິທິ ດິນດີນ້ຳໃສ ແຫ່ງ ປະເທດໄທ ສົ່ງບັດເຊີນມາທາງອີແມວເພື່ອໃຫ້ໄປຮ່ວມງານ, ນາທີລະທຶກໃຈທີ່ສຸດແມ່ນຕອນພິທີກອນປະກາດລາຍຊື່ໃຫ້ຂ້າພະເຈົ້າຂຶ້ນສູ່ເວທີເພື່ອຮັບລາງວັນ ເຊິ່ງຕອນນັ້ນຮູ້ສຶກຕື່ນເຕັ້ນຫຼາຍທີ່ໄດ້ສຳຜັດກັບລາງວັນອັນຊົງກຽດ, ເນື່ອງຈາກເປັນບຸກຄົນດຽວຈາກປະເທດລາວຖຶກຄັກເລືອກໃຫ້ໄດ້ຮັບລາງວັນນີ້. ສິ່ງດັ່ງກ່າວສະແດງໃຫ້ເຫັນເຖິງຜົນງານຂອງຕົນໃນຫຼາຍປີຜ່ານມາ ແລະ ເຫັນວ່າຄວາມດີທີ່ເຮົາປະຕິບັດມາກໍ່ຍັງມີຄົນອື່ນທີ່ເຫັນຄຸນຄ່າໃນຕົວຂອງເຮົາ ຈົນເຮັດໃຫ້ກາຍເປັນທີ່ຮູ້ຈັກຢ່າງກວ້າງຂວາງໃນວົງການສື່ທັງພາຍໃນ ແລະ ຕ່າງປະເທດ.

ລາງວັນດັ່ງກ່າວ ເຖິງວ່າຈະບໍ່ມີມູນຄ່າຫຼາຍທີ່ເປັນວັດຖຸ ຫຼື ເງິນຄຳ, ແຕ່ມັນມີຄຸນຄ່າສູງທີ່ສຸດທາງດ້ານຈິດໃຈ ແລະ ສື່ສຽງຂອງບຸກຄົນທີ່ໄດ້ຮັບ ເພາະມັນເປັນລາງວັນປະດັບກຽດຕິຍົດໃຫ້ກັບຕົນເອງ ແລະ ພີ່ນ້ອງໃນວົງຕະກຸນດຽວກັນ. ຖ້າຫາກຖາມເຖິງປະໂຫຍດຂອງລາງວັນທີ່ໄດ້ຮັບນີ້ ສິ່ງທຳອິດແມ່ນເຮົາຈະກາຍເປັນທີ່ຮູ້ຈັກຂອງມວນຊົນຫຼາຍຂຶ້ນ ແລະ ອົງກອນກໍ່ຄືໜັງສືພິມເສດຖະກິດ-ການຄ້າ ກໍມີສື່ສຽງຫຼາຍໃນວົງການສື່ລາວເຮົາເຊັ່ນກັນ. ທ່ານ ສົມສະຫວິນ ກ່າວ.

+ ຄວາມເປັນມາຂອງຜູ້ກ່ຽວໃນສາຍສື່ມວນຊົນນັບແຕ່ປີ 2011 ເຖິງປັດຈຸບັນ.

ທ່ານ ສົມສະຫວິນ ວົງສີສຸພັນ ເກີດເມື່ອວັນທີ 02 ມີນາ 1988 ທີ່ບ້ານລົບປາກດີ ເມືອງໂຂງ ແຂວງຈຳປາສັກ ເຊິ່ງປັດຈຸບັນອາໃສຢູ່ບ້ານດົງປ່າແຫຼບ ເມືອງຈັນທະບູລີ ນະຄອນຫຼວງວຽງຈັນ ຮຽນຈົບຂະແໜງໄອທີຊັ້ນສູງ ສົກປີ 2012-2013 ແລະ ຈົບປະລິນຍາຕີວິສະວະກຳຊັອຟແວຣ໌ ສົກປີ 2014-2015; ເຖິງວ່າການຮຽນຈະບໍ່ຖືກກັບວິຊາທີ່ຕົນຮຽນມາກໍ່ຕາມ, ແຕ່ໄລຍະຮຽນໜັງສືນັ້ນຜູ້ກ່ຽວໄດ້ເລີ່ມເຂົ້າສູ່ວົງການສື່ມວນຊົນນັບແຕ່ທ້າຍປີ 2011 ເປັນຕົ້ນມາ ໂດຍເປັນນັກຂ່າວສັງກັດຢູ່ໜັງສືພິມເສດຖະກິດ-ສັງຄົມ. ມາຮອດປີ 2013 ຜູ້ກ່ຽວໄດ້ຍ້າຍມາຢູ່ໜັງສືພິມເສດຖະກິດ-ການຄ້າຈົນເຖິງປັດຈຸບັນ.

ຜ່ານການປະຕິດໜ້າທີ່ສື່ມວນຊົນໃນສາຍສື່ສິ່ງພິມຕະຫຼອດ 6 ປີຜ່ານມາຂອງຜູ້ກ່ຽວມີໄດ້ມີຜົນງານພົ້ນເດ່ັນຫຼາຍປະການດັ່ງນີ້:

+ ປີ 2011-2013 ເປັນນັກຂ່າວສາຍສັງຄົມ, ຮັບຜິດຊອບຄໍລຳທ່ອງທ່ຽວ ສັງກັດໜັງສືພິມເສດຖະກິດ-ສັງຄົມ;

+ ທ້່າຍປີ 2013 ຜູ້ກ່ຽວໄດ້ຍ້າຍມາຢູ່ໜັງສືພິມເສດຖະກິດ-ການຄ້າ ແລະ ຖືກມອບໝາຍໃຫ້ຮັບຜິດຊອບຂ່າວການເງິນ-ການທະນາຄານ ແລະ ຕະຫຼາດຫຼັກຊັບ.

+ ປີ 2014 ໄດ້ຖືກສັບຊ້ອນໃຫ້ເປັນຫົວໜ້າໜ່ວຍງານຂ່າວເສດຖະກິດ-ການເງິນ.

+ ປີ 2015 ໄດ້ເລື່ອນຕຳແໜ່ງເປັນຜູ້ຊ່ວຍບັນນາທິການຝ່າຍຂ່າວທຸລະກິດ.

+ ປີ 2016 ຖືກຄັດເລືອກໃຫ້ເປັນຮອງບັນນາທິການຂ່າວຝ່າຍຂ່າວທຸລະກິດ ແລະ ຂ່າວອອນລາຍ.

+ ຕົ້ນປີ 2017 ຈົນເຖິງປັດຈຸບັນ ໄດ້ເລື່ອນຕຳແໜ່ງເປັນຫົວໜ້າພະແນກຂ່າວອອນລາຍ ແລະ ຕະຫຼາດ-ບໍລິການ.

• ຜົນງານແຕ່ປີ 2011 ເຖິງປັດຈຸບັນ.

+ ປີ 2011-2013 ໄດ້ຮັບການຍົກລະດັບວຽກງານສື່ມວນຊົນທັງພາຍໃນ ແລະ ຕ່າງປະເທດ.

+ ປີ 2014-2016 ໄດ້ເປັນນັກຂ່າວດີເດັ່ນ 3 ປີຊ້ອນ ຂອງໜັງສືພິມເສດຖະກິດ-ການຄ້າ.

+ ປີ 2016 ໄດ້ສໍາເລັດການຂຽນ ແລະ ຮຽບຮຽງປື້ມ “ເປີດປະຕູສູ່ຕະຫຼາດທຶນ” ຂອງຕະຫຼາດຫຼັກຊັບລາວ.

+ ປີ 2017 ໄດ້ຮັບລາງວັນລາງວັນ ”ເຫມມະຣາດ” ບຸກຄົນຕົ້ນແບບແຫ່ງປີ 2017 ຢູ່ທີ່ປະເທດໄທ.