ທີມງານວາລະສານມະຫາຊົນໄດ້ຮັບຄຳຮຽກຮ້ອງຈາກປະຊາຊົນ ທີ່ເປັນລູກຄ້າຂາປະຈຳຂອງ ບໍລິສັດລັດ ວິສາຫະກິດ ຫວຍພັດທະນາ ໃຫ້ໄປຂໍຂໍ້ມູນຈາກ ບໍລິສັດລັດ ວິສາຫະກິດ ຫວຍພັດທະນາ ມາຕອບຜ່ານວາລະສານໃຫ້ອ່ານແດ່ ເຊິ່ງຄຳຖາມມີຫຼາກຫຼາຍແຕ່ສະຫຼຸບເຂົ້າແລ້ວມີຢູ່ 3 ປະເດັນຫຼັກໄດ້ແກ່: 1. ເປັນຫຍັງຄືບໍ່ມີການຖ່າຍທອດສົດຜ່ານໂທລະພາບໃຫ້ເບິ່ງແດ່?. 2. ການອອກເລກບາງເທື່ອຊ້ຳ ໂຕເກົ່າ ແລະເລກທີ່ຄົນນິຍົມຊື້ພັດບໍ່ອອກແລ້ວ ມີການລັອກເລກຫຼືບໍ່?. 3. ໄດ້ຍິນວ່າໄດ້ມີຄົນຕ່າງປະເທດມາສຳປະທານ ເປັນຄວາມຈິງຫຼືບໍ່ ແລະຖ້າເປັນຈິງຄືບໍ່ໃຫ້ຄົນລາວສຳປະທານ?.
ຈາກຂໍ້ສົງໄສຂອງປະຊາຊົນດັ່ງກ່າວຂ້າງເທິງນັ້ນ ທີມງານວາລະສານມະຫາຊົນເຮົາໄດ້ເຮັດໃບສະເໜີຂໍສຳພາດໄປແລ້ວເມື່ອກາງເດືອນ ກໍລະກົດ ທີ່ຜ່ານມາ ແຕ່ກໍຍັງບໍ່ທັນໄດ້ຮັບໂອກາດໃຫ້ເຂົ້າສຳພາດຈາກພາກສ່ວນທີ່ກ່ຽວຂ້ອງເທື່ອ ແລະໄດ້ສອບຖາມໄປທາງໂທລະສັບກໍໄດ້ຄຳຕອບວ່າ ເພິ່ນກຳລັງຄົ້ນຄວ້າຢູ່. ດັ່ງນັ້ນ, ຈຶ່ງແຈ້ງໃຫ້ທ່ານຜູ້ອ່ານຊາບ ແລະອົດໃຈລໍຄອຍຕໍ່ໄປ ຄິດວ່າເມື່ອເພິ່ນມີເວລາທີ່ເໝາະສົມກໍຄົງຈະໄດ້ຮັບຄຳຕອບຢ່າງແນ່ນອນ.
ແນວໃດກໍຕາມ, ໜ້າເຟສບຸກ ທີ່ໃຊ້ຊື່ “ຫວຍມືຖື SMS” ໄດ້ໂພສຮູບພາບແຜ່ນພັບອະທິບາຍການອອກເລກລາງວັນຫວຍພັດທະນາ ຂອງ ບໍລິສັດລັດ ວິສາຫະກິດ ຫວຍພັດທະນາ ເຊິ່ງໜ້າທຳອິດນັ້ນໄດ້ນຳສະເໜີ ຂໍ້ຄວາມຕອນໜຶ່ງທີ່ຄັດມາຈາກ ມະຕິຕົກລົງຂອງສະພາລັດຖະມົນຕີ ສະບັບເລກທີ 347 / ປສລ, ລົງວັນທີ 14 ທັນວາ 1982 ຂໍ້ຄວາມວ່າ “ການເປີດຫວຍພັດທະນາແມ່ນ ແນໃສ່ຈຸດປະສົງຢ່ອນອາລົມໃຫ້ປະຊາຊົນ, ລະດົມປະຊາຊົນທຸກຊັ້້ນຄົນ ປະກອບສ່ວນເຂົ້າໃນການພັດທະນາປະເທດຊາດ ແລະເກັບເອົາເງິນສົດສ່ວນໜຶ່ງຢູ່ໃນທ້ອງຕະຫຼາດຄືນ”. ໜ້າຕໍ່ໄປແມ່ນໄດ້ນຳສະເໜີສະຖານທີ່ການອອກຫວຍ, ການຄຸ້ມຄອງການອອກລາງວັນ, ການແຈ້ງຜົນການອອກຫວຍ, ອຸປະກອນທີ່ນຳໃຊ້ອອກລາງວັນ ແລະ ຂັ້ນຕອນແລະວິທີການອອກຫວຍລາງວັນ. ແລະທີ່ສຳຄັນທີ່ສຸດໃນແຜ່ນພັບກໍໄດ້ນຳສະເໜີຄະນະກຳມະການການອອກເລກລາງວັນຈາກພາກສ່ວນຕ່າງໆ ຈາກລັດຖະບານຄື:
1. ຕາງໜ້າຈາກສູນກາງແນວລາວສ້າງຊາດ 1 ທ່ານ
2. ຕາງໜ້າຈາກກະຊວງການເງິນ 1 ທ່ານ
3. ຕາງໜ້າຈາກຫ້ອງວ່າການລັດຖະບານ 1 ທ່ານ
4. ຕາງໜ້າຈາກກະຊວງຖະແຫຼງຂ່າວ-ວັດທະນະທຳແລະທ່ອງທ່ຽວ 1 ທ່ານ
5. ຕາງໜ້າຈາກກະຊວງຍຸຕິທຳ 1 ທ່ານ
6. ຕາງໜ້າຈາກກະຊວງປ້ອງກັນຄວາມສະຫງົບ 1 ທ່ານ
ເຊິ່ງຖ້າທ່ານຜູ້ອ່ານມີໂອກາດໄດ້ອ່ານແຜ່ນພັບດັ່ງກ່າວ ກໍຄົງຈະເຂົ້າໃຈໄດ້ເຖິງຈຸດປະສົງ, ຂັ້ນຕອນ ແລະຄວາມໂປ່ງໃສຂອງການອອກເລກລາງວັນຂອງ ບໍລິສັດລັດ ວິສາຫະກິດໄດ້ເປັນຢ່າງດີ. ເຖິງແນວນັ້ນກໍຕາມ ຜູ້ຄົນສ່ວນຫຼາຍທີ່ເຂົ້າອ່ານໃນເຟສບຸກກໍຍັງໄດ້ສະແດງຄຳເຫັນຕໍ່ວ່າ ແລະຮຽກຮ້ອງໃຫ້ມີການຖ່າຍທອດສົດການອອກເລກລາງວັນຜ່ານໂທລະພາບແຫ່ງຊາດຢູ່ ເຊິ່ງຜູ້ເບິ່ງແຍງໜ້າ “ຫວຍມືຖື SMS” ກໍໄດ້ໃຫ້ຄຳຕອບແລະຮັບເອົາຄຳຕຳໜິຕິຕຽນຕ່າງໆ ຈາກສັງຄົມ ດັ່ງນີ້: “ພວກເຮົານ້ອມຮັບເອົາຄຳຕິຕຽນຈາກ ທ່ານຈາກໃຈຈິງ, ແລະ ພວກ ເຮົາພວມພະຍາຍາມສຸດຂີດ ເພື່ອຜັກດັນ ໃຫ້ຂັ້ນເທິງອະນຸມັດຖ່າຍ ທອດສົດຄືນໃນມໍ່ໆນີ້ ແລະຫວັງຢ່າງຍິ່ງ ວ່າ: ສຽງຮຽກຮ້ອງຈາກສັງຄົມເຊັ່ນທ່ານ ຈະເປັນແຮງຊ່ວຍຜັກດັນທີ່ ສຳຄັນໃຫ້ແກ່ພວກເຮົາທີ່ຈະຊຸກຍູ້ໃຫ້ລັດຖະບານອະນຸມັດການຖ່າຍທອດສົດ ທາງໂທລະພາບຄືນໃໝ່ ໃຫ້ໄວທີ່ສຸດ, ສ່ວນປັດຈຸບັນນີ້ ຂໍໃຫ້ທ່ານກະລຸນາ ຕິດ ຕາມກວດກາຄວາມໂປ່ງໃສຂອງການອອກຫວຍພັດທະນາ ທີ່ເວັບໄຊ້: http://www.laolottery.org:8088/ ເລີ່ມແຕ່ມື້ນີ້ເປັນຕົ້ນ ໄປ.
ເອົາລະທ່ານຜູ້ອ່ານ ຫວັງວ່າທ່ານຜູ້ອ່ານຈະໄດ້ຮັບຄວາມກະຈ່າງແຈ້ງສ່ວນໜຶ່ງ ແລະໝັ້ນໃຈຕໍ່ການອອກເລກລາງວັນ ຂອງຫວຍພັດທະນາ ບໍ່ຫຼາຍກໍໜ້ອຍແລ້ວເນາະ!. ໂອກາດໜ້າຖ້າມີການຊີ້ແຈງຈາກພາກສ່ວນທີ່ກ່ຽວຂ້ອງຕື່ມ ເຮົາຈະນຳສະເໜີທ່ານອີກ.
ແອັດມິນຊຽງ ວາລະສານມະຫາຊົນ