ຈາກເຫດການໄຟໄໝ້ ຕຶກເວີນເທຣດເຊັນເຕີວຽງຈັນ (World Trade Center) ບ່າຍວັນທີ 3 ທັນວາ 2017 ທີ່ຜ່ານມາ ເປັນເຫດການໄຟໄໝ້ອາຄານທີ່ກຳລັງກໍ່ສ້າງ ແລະສ້າງຄວາມຕື່ນຕົກໃຈໃຫ້ຜູ້ພົບເຫັນເປັນຢ່າງຍິ່ງ ແລະຕ່າງກໍຕັ້ງຂໍ້ສົງໄສວ່າ ເປັນຫຍັງອາຄານກຳລັງສ້າງກໍເກີດໄຟໄໝ້ແລ້ວ ມີຫຍັງເປັນເຫດກັນແທ້.
ທ່ານ ຈັນທະບູນ ແກ້ວມະນີວົງ ຫົວໜ້າພະແນກສະກັດກັ້ນ ແລະ ຕ້ານອັກຄີໄພ ນະຄອນຫລວງວຽງຈັນ ໄດ້ແຈ້ງໃຫ້ຮູ້ວ່າ: ເຫດການດັ່ງກ່າວ ເກີດຂຶ້ນໃນເວລາປະມານ 16:30 ໂມງ ສາເຫດແມ່ນຍ້ອນກຳມະກອນ ໄດ້ຈອດເຫລັກເຮັດໃຫ້ສະເກັດໄຟປິວ ໄປໃສ່ທໍ່ຢາງ ຈົນເກີດແປວໄຟລຸກໄໝ້ແຮງພໍສົມຄວນ ເຈົ້າໜ້າທີ່ມອດໄຟໄດ້ນຳລົດນ້ຳ 3 ຄັນເຂົ້າຊ່ວຍເຫລືອ, ໃຊ້ເວລາປະມານ 15 ນາທີ ກໍສາມາດຄວບຄຸມເພີງໄວ້ໄດ້, ໂຊກດີເຫດການຄັ້ງນີ້ ບໍ່ມີຄົນໄດ້ຮັບບາດເຈັບ ແລະ ເສຍຊີວິດ.
ອາຄານເວີນເທຣດເຊັນເຕີວຽງຈັນ ຕັ້ງຢູ່ຂ້າງໆ ສູນການຄ້າວຽງຈັນເຊັນເຕີ ຖະໜົນຄູວຽງ ບ້ານໜອງຈັນ ນະຄອນຫຼວງວຽງຈັນ ເປັນອາຄານທີ່ນັກລົງທຶນຕ່າງປະເທດມາລົງທຶນສ້າງໃຫ້ເປັນສູນການຄ້າທີ່ໃຫຍ່ແລະທັນສະໄໝທີ່ສຸດຂອງລາວ ເຊິ່ງຄາດວ່າຈະສາມາດເປີດໃຊ້ພາຍໃນປີ 2018.
