ທີມຣັດເຊຍຖືກຫ້າມເຂົ້າຮ່ວມການແຂ່ງຂັນກິລາໂອລິມປິກລະດູໜາວ 2018 ທີ່ປະເທດເກົາຫຼີໃຕ້ ດ້ວຍຂໍ້ກ່າວຫາວ່າລັດສະໜັບສະໜູນການໃຊ້ສານກະຕຸ້ນກັບນັກກິລາ ແຕ່ກໍ່ຍັງໃຫ້ໂອກາດນັກກິລາຂອງຣັດເຊຍເຂົ້າຮ່ວມການແຂ່ງຂັນໄດ້ແຕ່ຕ້ອງຢູ່ພາຍໃຕ້ເງື່ອນໄຂທີ່ເຂັ້ມງວດໂດຍຕ້ອງໃຊ້ທຸງໂອລິມປິກແທນ
ສຳນັກຂ່າວຕ່າງປະເທດລາຍງານຈາກເມືອງ ໂລຊານ ປະເທດສະວິດເຊີແລນ ເມື່ອວັນທີ 6 ທັນວາ 2017ວ່າ ຄະນະກຳມະການສາກົນ ໂອລິມປິກສາກົນ (ໄອໂອຊີ) ປະກາດຜົນການຕັດສິນຫຼັງປະຊຸມຫາລືຂອງຄະນະກຳມະການບໍລິຫານໂອລິມປິກສາກົນ ໂດຍພິຈາລະນາ ແລະ ກວດສອບຫຼັກຖານເລື່ອງທີ່ລັດຖະບານຣັດເຊຍສະໜັບສະໜູນການໃຊ້ສານກະຕຸ້ນນັກກິລາຂອງຣັດເຊຍເຊິ່ງຜ່ານມາຫຼາຍປີກ່ອນຈົນເຖິງຈຸດສຳຄັນໃນລະຫວ່າງການແຂ່ງຂັນກິລາໂອລິມປິກລະດູໜາວ 2014 ທີ່ເມືອງ ໂຊຊິຂອງຣັດເຊຍ ໂດຍຢືນຢັນຜົນການພິຈາລະນາວ່າ ຫ້າມທີມກິລາຣັດເຊຍເຂົ້າຮ່ວມການແຂ່ງຂັນກິລາໂອລິມປິກລະດູໜາວ 2018 ທີ່ເມືອງປຽງຊາງຂອງເກົາຫຼີໃຕ້ ເຊິ່ງຈະຈັດຂຶ້ນໃນເດືອນ ກຸມພາ 2018
ດ້ານທ່ານ ອາເລັກ ຊານເດີ ຊູຄອຟ ປະທານຄະນະກຳມະທິການໂອລິມປິຂອງຣັດເຊຍ ກ່າວວ່າ ການທີ່ໂອລິມປິກສາກົນລົງໂທດນັກກິລາຖືເປັນເລື່ອງທີ່ບໍ່ເປັນທຳ ແລະ ຂັດຕໍ່ສິນທຳ.