ຍັງພຽງຫນຶ່ງເດືອນເຕັມກໍຈະໝົດປີ 2017 ຂະນະທີ່ການເກັບລາຍຮັບກໍອາດບໍ່ໄດ້ຕາມເປົ້າໝາຍອີກປີ, ແຕ່ຫາກພະຍາຍາມໃຫ້ໄດ້ຕາມແຜນສູ້ຊົນ. ຫລ້າສຸດທີ່ລັດຖະບານສະເຫນີໃນກອງປະຊຸມສະພາທີ່ຕົວເລກ 98.1%ຂອງແຜນການກໍຖືເປັນຕົວເລກທີ່ດີກວ່າປີຜ່ານມາ.
ສຳລັບຕົວເລກແຜນການຈັດເກັບລາຍຮັບປີ2018 ຕາມມະຕິກອງປະຊຸມສະໄໝ ເທື່ອທີ 4 ຂອງສະພາແຫ່ງຊາດ ຊຸດທີ VIII ໄດ້ຮັບຮອງເອົາແມ່ນສູ້ຊົນເກັບລາຍຮັບທັງໝົດບໍ່ໃຫ້ຫຼຸດ 25,452 ຕື້ກີບ, ໃນນັ້ນລາຍຮັບພູດສູນກາງ 20,472 ຕື້ກີບ; ລາຍຮັບພູດທ້ອງຖິ່ນ 4,979 ຕື້ກີບ.
ສ່ວນລາຍຈ່າຍທັງໝົດ 32,809 ຕື້ກີບ; ໃນນີ້ ລາຍຈ່າຍພູດສູນກາງ 23,832 ຕື້ກີບ, ລາຍຈ່າຍພູດທ້ອງຖິ່ນ 8,977 ຕື້ກີບ. ຂາດດູນງົບປະມານຈຳນວນ 7,357 ຕື້ກີບ ເທົ່າກັບ 4.92% ຂອງ GDP.
ສະພາແຫ່ງຊາດ ຍັງໄດ້ຮັບຮອງເອົາ 16 ກົນໄກ ແລະ ມາດຕະການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2018 ຕາມການສະເໜີຂອງລັດຖະບານ. ແຕ່ເພື່ອຮັບປະກັນ ການຈັດຕັ້ງປະຕິບັດແຜນງົບປະມານແຫ່ງລັດປີ 2017 ແລະ ແຜນການປີ 2018 ກອງປະຊຸມມອບໃຫ້ລັດຖະບານເອົາໃຈໃສ່ຈັດຕັ້ງປະຕິບັດມາດຕະການເພີ່ມຕື່ມຈຳນວນຫນຶ່ງດັ່ງນີ້: ມາດຕະການດ້ານລາຍຮັບ: ໃຫ້ຮີບຮ້ອນປັບປຸງ ແລະ ສ້າງນິຕິກຳທີ່ຈຳເປັນ ແລະ ຮີບດ່ວນ ເພື່ອສ້າງເງື່ອນໄຂເອື້ອອຳນວຍໃຫ້ແກ່ການຊຸກຍູ້ການຜະລິດ, ຄຸ້ມຄອງການຈັດເກັບລາຍຮັບ ໂດຍສະເພາະແມ່ນການຜັນຂະຫຍາຍໃຫ້ເປັນນິຕິກຳລຸ່ມກົດໝາຍ ຂອງບັນດາກົດໝາຍສະພາແຫ່ງຊາດໄດ້ຮັບຮອງຜ່ານມາ ໃຫ້ເປັນລະບົບຄົບຊຸດກວ່າເກົ່າ; ສືບຕໍ່ສຳຫຼວດຖານຫົວໜ່ວຍທຸລະກິດ ແລະ ຄົ້ນຄວ້າຍົກລະດັບຖານອາກອນຂອງບາງຫົວໜ່ວຍທຸລະກິດໃຫ້ສອດຄ່ອງກັບລະດັບການຂະຫຍາຍຕົວຂອງເສດຖະກິດໃນປັດຈຸບັນ.
ນອກນັ້ນ, ກໍ່ເລັ່ງລັດຫັນເປັນທັນສະໄໝໃນການຈັດເກັບລາຍຮັບຢ່າງມີຈຸດສຸມ ເປັນຕົ້ນ ຢູ່ໃນບັນດາຫົວໜ່ວຍທຸລະກິດທີ່ມີເງື່ອນໄຂ; ເອົາໃຈໃສ່ຄຸ້ມຄອງ ແລະ ສະກັດກັ້ນການຮົ່ວໄຫຼຈາກການເກັບອາກອນ, ພາສີ, ຄ່າທຳນຽມກ່ຽວກັບການນຳເຂົ້າສິນຄ້າຢູ່ໃນບັນດາດ່ານຊາຍແດນ ໃຫ້ຖືກຕ້ອງຕາມກົດໝາຍ ແລະ ລະບຽບການທີ່ກ່ຽວຂ້ອງ ດ້ວຍການເພີ່ມທະວີຄວາມຮັບຜິດຊອບຂອງເຈົ້າໜ້າທີ່ກ່ຽວຂ້ອງໃນການປະຕິບັດໜ້າທີ່ບໍລິການປະຊາຊົນ ໃຫ້ມີຄວາມວ່ອງໄວ ແລະ ໂປ່ງໃສ.

ແຫຼ່ງຂ່າວ: ເສດຖະກິດ-ການຄ້າ